الكل خونه

بسم الله، السلام عليكم

هسيب الصوره تتكلم، شكرا سيادة المشير، شرفت مصابين التحرير؟ زورت قتلة شارع الوزراء؟ لا بجد شكرا

جيش مصر العظيم .. فيديو/صور

بسم الله، السلام عليكم
دولة القانون تتكلم، بصوت جيشها العظيم، فيدوهات وصور تظهر مدى شموخ وعظمه الجيش المصري










شوفوا في الثانيه 0:22 من الفيديو، وكيف استخدم هذا الجندي الشريف، البياده -الحذاء العسكري- في تعليم البت
دي ازاي يكون احترام طوب مجلس الشعب والوزراء، في نفس الوقت الذي كان يشدها جندي اخر من ملابسها
وهي منزوعه في مشهد يظهر مدى حقاره هؤلاء الجنود، عرض وشرف مصر اتفضح، عرض اختي وشرفها
اتهان

شكرا جيش مصر العظيم، شكرا لكل سلاح رفع في الدفاع عن حجاره مجلس الشعب، وبناء مجلس الوزراء

شكرا يامن تطلقون على انفسكم حماة الوطن، يا مسلمين الجيش ومسيحييه، يا شرفاء الجيش، شكرا لكل القاده

شكرا على سحل وتعريه وانتزاع ملابس النساء والحريم .. 

الجن زوري والجن الازرق

بسم الله، السلام عليكم
ما هو الفرق بين الجن زوري والجن الازرق؟
من نحاية الموطن فكلاهما موطنه مصر!
الجن زوري اصغر بكثير من الجن الازرق حيث يبلغ عمره 81 سنه فقط!
كلاهما يستمتع باخذ راحته عند البحث والتفتيش!
فالجنزوري طلب مهله شهرين لتشكيل حكومه
والجن الازرق معروف في الامثال المصريه بنضاله في البحث!
كلاهما جن لكن يختلف الجن زوري عن الجن الازرق من ناحية اللون والتركيبه
فالجن زوري وبرغم من "صغر سنه" إلا انه لا يكاد يتحدث حتى يخرج التراب من فهمه
الجن زوري والجن الازرق وجميع الجنانيين يعملون ويعشيون سويا في عكر دار المجلس السنكري!
يمتاز الجن زوري عن غيره من الكائنات البهلاونيه بنشاطه المتفجر
اما بقيت الجنانين فنشاطهم برغم من تفجره إلى انه مخفي عن العامه نظرا لطبيعتهم الجنيه
يعيش الجن زوري على الفراخ/لحوم/مأكولات بحريه/اورنج جوس/اكل صحي وباهظ الثمن
فيما لم يستدل عن مأكولات باقي انواع الجنانيين
واخيرا يشترك الجن زوري والجن الازرق  بان كلاهما مخلاوقات اسطوريه
ويابخت من دون وخفف

حاميها حراميا .. كلاكيت الشوط التاني

ولادك يامصر

بسم الله، السلام  عليكم
لما تبقى قاعد بتتفرج على اللي بيحصل وحاسس انك صغير، وشربت اكبر مقلب في حياتك
مهي مصر حياتنا، ولو مش حياة حد فيكم فهي حياتي .. مقلب في الوزرا وعصام شرف، وقولنا مش مشكلها هانت كلها الانتخابات وهتتسحب الثقه ويغور هو واللي معاه عصام شرف النايم ابن التايه
لكن اننا ناخد مقلب في المجلس العسكري "حامي الثوره" اسمً بس!، احا ومليون احا
هو ده بقى المجلس العسكري؟ .. هي الدخليه هتقدر تعمل اللي عملته ده من غير اوامر!، عاوزين تفهموني يعني ان ابن الجزمه اللي الكداب المنافق وزير الدخليه العسوي يقدر يقول للداخليه تعمل حاجه زي دي من غير ما المجلس يدي امر!، مهو الوزرا كلهم متعينين اساسا علشان معندهمش شخصيه وبياخدوا اوامرهم من العسكري، بلاش
هو العسكري بسكوته على رئي يحى الجمل، لما العسكري شاف اللي حصل وبيحصل .. وهيحصل، متدخلش ليه وادى اوامر ان القوات دي تنسحب على الاقل لتأمين المنشئات الحيويه بس؟ ده الادهى كمان ان عساكر الجيش بيضربونا .. وتقولي مجلس عسكري!

مرحلة الاعداد للهجره

بسم الله، السلام عليكم
واضح اني متعدد الاهتمامات وبحب اتكلم في حاجات كتير، بس انا بتكتب التدوينه دي مش علشان اشكر في نفسي، علشان حاجه اهم بكتير، وهي ان فئه كبيره من المجتمع المصري بتعد نفسها من فتره كبيره علشان "تهاجر" -والله عندهم حق- مفيش انتماء!
الانتماء ده وسيله اخترعها ذوو التفكير متفائل لحث الناس على المشاركه في الدفاع عن الوطن وحقوق الوطن إلخ إلخ ..
طيب ياسيدي هو مش الحياه مصالح؟ وعلشان المصالح "مصالح" لازم تكون متبداله!
يعني مفيش شخص بيروح يشتري حاجه ببلاش، ولا في دوله بتدي من غير ماتاخد! و"كداب اللي يقولك كده" غير بين الاخوات وعدد محدود جدا من الناس اللي تقدر تعمل كده تحت مسيميات غبيه منها الشهامه والجدعنه والاخلاص والحب المتفاني، صلة الدم والقرابه
ده كان رد احد المهاجرين "في مرحله الاعداد" على سؤالي، انتا معندكش انتماء لمصر ولا ايه؟
عاوزين الحق! فيه في كلامه شئ من الواقعيه ويخليك تحس انك نفسك وعاوز تصدق، بس يمكن انا جرعتي متكسفه شويه من الانتماء للبلد دي؟، مش عارف، بس اللي اعرفه برده انها مش هتقف عليا يعني لو مشيت! .. بس ده في حال اني مشيت لوحدي، لإن لو تفكير 50% من شباب البلد دي زي تفكيري، البلد هتخلص وربنا! .. والحكومه مش هتلاقي حد تحكمه "على رأي عادل إمام في مسرحية الزعيم يجيبوا عقد عمل في السعوديه بقى"، بعض النظر عن التهريج شباب كتير الايام دي درجة الانتماء عندهم 00000%
الواد من دول خلص دارسه، نزل ع القهوه شويه، عاوز اسافر ومستعد اتخلى عن الجنسيه!
ده مش كده وبس .. لا ده هيطلع عيني علشان اوفر شروط التقدم للجنسيه ومنهم الشرط بتاع الفلوس اللي لازم تبقى في حسابك لما تهاجر وكل بلد حسب ظروفها!
يعني في بلدان بتطلب فوق الـ 10 الاف دولار زي كندا، ودول يعملوا بتاع 60 الف مصري .. عادي هيجيبهم علشان يسافر!
وليه لاء مهو نفسه يأمن حياة كريمه لولاده ولنفسه، نفسه لما يتعب يتجازه على تعبه، نفسه يتعامل باحترام في كل مكان!
نحن دوله تفتقد اقل مقومات الدوله! .. سريعا كده انا سمعت مره ان في قانون طلعه عبدالناصر الله يرحمه، بيقول فيما معناه، ان اي انسان يتولد على ارض البلد دي هو سيد! .. تفتكر انتا سيد؟ انا عن نفسي حاسس اني ريهام!

وقعوا في بعض

 

بسم الله، السلام عليكم
هم كده وقعوا في بعض، وبسم الله ماشاء الله الدستور داخل بيهل علينا!
ياترى مدنيه/علمانيه/اسلاميه/مسيحيه/ليبراليه/شيوعيه/ديمقراطيه/قوميه/اشتراكيه؟
انا قدرت اشتت تفكيرك صح؟ طيب خد دي كمان
اضرب اللي انا قولته ده في 3 .. ليييه؟ لان كل اتجاه فكري من دول في تلت انظمه .. يا يساري متطرف، يا يميني متطرف برده .. يا وسط :)، ده غير اصحاب الاتجاه الفكري الواحد بينهم اختلافات في كيفيه التطبيق، يعني انين قوميين وسطيين ده يقوله الحل الامثل ان النيتو يدخل ليبيا، والتاني يقوله لا العرب اولى ويتخانقوا :)
وبسم الله ماشاء الله عندنا في مصر كل حاجه بكل فروعها :)
هي ليه مصر متبقاش مصريه؟ يعني الحكومه تعمل الصح وبس، واللي عاوز يبقى علماني .. يتعلمن!
واللي عاوز يبقى ليبرالي، يترابلين!، واللي عاوز يبقى اسلامي بتأسلم والمسيحي يتأمسح والشيوعي يزيد تشيعا! والقومي يزيد قوميه .. بس في الاخر نحترم بعض ونعرف حقوق بعض .. ومحدش يقولي ان في كلب واحد بيطلع على التي في دلؤتي بيطبق اقل مبادء الديمقراطيه وهي الاستماع للأخر بلاش تقبله وبلاش تقبل وجهه نظره او فكره، لكن على الاقل اسمعه!
مفيش "كـلـب" من اللي قرفنا بيهم كل يوم بيعمل كده، مرشحين رئاسه، احزاب وحركات سياسيه ودينيه، شخصيات عامه .. مفيش كلب فيهم بيعمل كده
انا الاغلبيه الصامته، مش الحركه ياباشا علشان الحركة دي مش بيمثلني، ولا اللي بيطعلوا في التي في دول يرجعوا كلمتين حفظوهم وخلاص، انا بقى اللي بتفرج على كده، وبتفرج على اللي بيتكلم بإسمي .. وساكت! اذا كنت بتدور على الاغلبيه الصامته الحقيقيه، هم دول وصدقني مهما عملت هم مش هيتكلموا ومهما طلع مننا وقال انه بيتكلم بلسان حال الاغلبيه الصامته فهو بيكدب!
انا نفسي وانا واحد منهم اهو بقول اني لو طلعت اتكلم باسمهم متصدقنيش، لإني تلثوت بالماده الاعلاميه!
الدخول في المعترك السياسي اساسا والظهور في الاعلام وسيله الخروج الوحيده من الاغلبيه الصامته الحقيقيه!

ويابخت من دون وخفف

الإحاد .. احيه

بسم الله، السلام عليكم
بداية وعلشان نكون على نور وضلمه مع بعضنا كده لازم نحط خط تحت شوية كلمات
مش عارف ازاي سمحت لنفسي بوضع كلمة إلحاد في تدوينه كما واني مش عارف ابدا منين
الالحاد قضيه فكريه ولا قضيه دينيه؟ .. اعتقد في وجهة نظري اللولبيه شديدة التعمق انها الاتنين، بس احنا هنا مش بصدد اننا نفهم دماغ الملحد، لانك ببساطه مش هتفهم دماغه، لإن هو اساسا مش فاهم دماغ نفسه
ده لإن الملحد عنده حاجه من اتنين، انا اتكلمت مع شويه ملحدين قبل كده بس في قضاية غير عقائديه وطبعا كان بعيدا عن موضوع الالحاد
اولا لقيت الملحد ده متقلب فكريا، يعني معندوش انتماء فكري او توجه فكري واضح، مره يبقى علماني، ومره يبقى وطني، ومره شيوعي! .. ومره قومي .. والادهى من كده انه معندوش مسار نقدي واضح لخلافه العقائدي حول المعتقدات الاخرى، يعني مره يقولك انه بيكره الاديان، ومره بيحبها بس بيرفض القيوض فيها، ومره شديد الاحترام للأديان
على فكره اكتر من 90% من اللي التناقضات اللي ذكرتها دي تلاقيها في شخصيه ملحده واحده!
الملحد غالبا متمرد على قيوض دينه، وليس فكر او توجه فكري بعينه، هو رافض القيوض باي شكل وباي طريقه!
لدرجة انه ممكن يتعرى لإثبات وجه نظره، وبعدين يندم انه عمل كده لان المجتمع لا يسمح بمثل هذه التحديات الفكريه الصريحه
اقسم بالله او فضلت اكتب من بكره لبكره في هتلاقوا تناقضات كتيره ومش هقدر اوفيها حقها، لكن اخراً
إن قابلك ملحد قوله "احا اخرج من دماغي" لإن صدقني ياصديق .. القرب من العالم دي تطبيق صحيح لمقوله "لا تجادل الاحمق فقد يخطئ الناس في التفريق بينكما"
ويابخت من دون وخفف

اسرائيل حولنا؟ يامرحبا يامرحبا

بسم الله، السلام عليكم
اوقات ببقى قاعد بتفرج على قناه اخباريه مع اصدقاء او قرايب او حد معرفه، ونشوف اللي بيحصل في فلسطين والاقي حد يقولي ياعم اقلب هو كل شويه "دم"، ومنهم اللي مش بلاقي عليه رد فعلا اساسا، ومنهم اللي مهتم بخبر اخر!
وكأن بقى قتل الصهاينه كل يوم في الفلسطينيين، شئ عادي، وكأن بقى طبيعي ان اسرائيل تبقى على حدود مصر، وطبيعي ان منتجات صهيونيه حولينا في كل مكان، وبقى طبيعي جدا قصف غزه من وقت لاخر، وطبيعي برده اعتقال وتعذيب وتهجير وبناء مستوطنات ... اسرائيل بقت شئ طبيعي
ايه يعني؟ دوله! شعب! قوه! .. عادي!!
اسرائيل تريد استقرار الوضع الامني في الشرق الاوسط :)
اسرائيل تناشد امريكا التدخل لحمايه الاستقرار في الشرق الاوسط :)
وكأن الشرق الاوسط ده بتاعها .. وكأنه مش بتاع العرب، وكأن ارضنا اتباعت علشان عقول بنت كلب لا بتفهم ولا ناويه تفهم
ياعم المنتج الفلاني ده يهودي، عادي، ياعم الموقع الفلاني ده اسرائيلي، برده عادي، ياعم .. فوكك
وكأن كل منتج "اللي هو رصاصه" بتشتريها من الصهاينه علشان تجيب هديه لانسان فلسطيني مثلا!
وكأن دمنا دم العروبه وارضنا ارض العروبه بقت عادي، وكأن القدس اللي راحت بمقدستها وكأن مقدسات فلسطين الاسلاميه والمسيحيه .. عادي
اذا كان الفلسطينيين بيشتروا .. عادي، واذا كان الفلسطينيين معاهم الجنسيه والباسبور الاسرائيلي .. عادي
اذا كانوا بقوا بيتجوزا من بعض .. عااااادي جدا ولا اي تأثير .. برفوا اسرائيل .. الخطه نجحت وبكره يخرجوك من بيتك ياللي بتتقرأ التدوينه دي .. وساعتها قول عادي
يابخت من حرق دم واتحرق دمه .. ودون وخفف

حرب النجوم "مش الفيلم" وقصة احمد سبايدر المنزلة

 

بسم الله، السلام عليكم
اذ فجأة شعرت اني محتار، فبعد ان لفيت هنا وهناك، وانا ملك اللف، وبعد ان بحثت هنا وهناك، وانا ملك متوج على عرش الجوجل -مازحا بالطبع, بدل ماحد يفتكرني مغرور ولا حاجه- وبحثت هنا وهناك، لكني لم ارى اي بلاغ يتقدم به إلى النائب العام على تهديد احمد اللي هموت واعرف اسم ابوه، احمد سبايدر وخلاص، الواضح بالاختطاف والتعذيب للناشطه نواره نجم، وبعدين ياريت الكلام فيه بلاغ واحد، لالا الكلام في اكتر من بلاغ، اولهم تهديد بالخطف والتعذيب، ثانيا سب وقذف، ثالثا سب وقذف مؤسسه او جريدة التحرير
دي حاجه، تاني حاجه بعد وصلة المدح في نفسي اللي فوق دي واللي باكد انها بهزار طبعا، لقيت ان مفيش جريدة محترمه توحد الله كتبت عن التهديد ده اي بتنجان، بوسه كبيره وحضن كبير وحط علامة استفاهم اكبر
وتحولت المعركه إلى حرب نجوم .. طبعا انا مش معترف باحمد العنكاوبتي -احمد سبايدر- كنجم ولا حاجه ده اخره يكتب كلمتين من ورا كي بورد واتعشت بس يلا، بس تحولت إلى حرب
- ع الهامش، احمد سبايدر ده اسم ابوه ايه؟، احمد سبايدر ده لعيب كوره زي مامكتوب في المصري اليوم في عدد قديم من 2006، ولا مغني -وربنا ما يحكم عليك تسمع حنجرته- ولا مناضل سياسي وربنا يكفيك تشطيح تفكيره .. يلا ربنا يتولاه زي ما قولته قبل كده
- ع الهامش التاني: حكاية الفنان في المنزلة، احمد سبايدر كان على قديمه اوي في 2009 تقريبا إن لم تخوني ذاكرتي، كان عامل اغنيه -او بيسموها اغنيه يعني- المهم الاغنيه دي كان ذاكر فيها اولاد عائلات كبيره في مدينة تابعه لمحافظة الدقلهيه اسمها المنزلة، المهم الاغنيه دي ذكر فيها اولاد العائلات دي بانهم بيشربوا مخدرات وما إلى ذالك، في ذات يوم اسود حدفة حظه انه ينزل فرح صديق شخصي واخ ليا اسمه "ح.ج"، ولهذا الـ "ح.ج" اصدقاء من كل حدب وصوب في هذه المدينة، ومعظمهم، بل كلهم من العائلات التي ذكرها بالخير احمد سبايدر الفنان، فسرت شائعه في الفرح ان الفنان موجود، وعلى الفور توجهة كتيبه ثم تبعها باقي الجيش من العائلات المذكوره و"كاد ان يفتك به" لكن لحسن الاقدار ولموقف صديقي "ح.ج" النبيل فقد خلصه من محنة واستعدى هذا الصديق والاخ الشخصي ليا روح الشهامه والرجوله في الجيش الذي اراد الفتك بالفنان، واقنعهم "باعجوبه والله" ان ده فرح شقيقته ولا يريد ان يفسد فرحتها بمشكله قد لا يعلم متى تحل إلى الله سبحانه وتعالى، وان احمد سبايدر نازلة مخصوص وتحت حماه وامانه بعد ربنا سبحانه وتعالى، إلى ان يعود من المكان الذي اتى منه، وارسل مع الفنان من ارسل واخذوه وانطقلوا مسرعين في اول سياره اجرة متجه إلى المنصوره
وعلى حين غره، فقد كان لهذا الفنان اصدقاء اخرين من المنزله فارسله حظه العثر مره اخرى إليها ولم اعرف الاسباب هذه المره، لكن يحكى لي انه وامام المدرسه الثانويه "احمد شلبايه" إن كنت فاكر كويس، تم الفتك به، وحضر من واتهه هذه الفرصه السعيده لينقتم من الفنان الذي شوه سمعة اناس وعائلاتهم بالكامل، وقد سمعت شائعات "لم اتأكد منها" ان بعض من كان قد اصطحبه لهنا قد ذهب به مسرعا إلى مستشفى المنزلة العام .. هذه شاكله ابناء مبارك ومعظم المشككين في الثوره :)
ويابخت من دون وخفف

عاجل جدي: بيان إئتلاف "خرفان من اجل الحياة"

قـرر السيـد / ضـانى أبو ليَـــة،

المنسق العـام لأئتـلاف "خرفـان من أجـل الحيـاة"،

والعضو المؤسس لتحـالف "مش علشان أنـا بـ ليَـة تكلوني بالطريقة ديـة"

عمل مليونية فى ميـدان صـوفي بالتنسيق مع ائتلافـات "القرن الديمقراطي"،

و"خرفـان إلى الأبـد"، وحزب "نحو مدبح مدنـي"

للتنديد بالمجـزرة المزمع عملها أول وثـانى وثـالث أيـام العيد،

على أن يقوم ائتـلاف "عاملنى بالمعروف .. ولا علشان أنـا خروف"

بالإجـراءات الأمنيـة وحمـاية الميـدان من أى جـاموس أو بقـر منـدس.

حمله (خليك نباتي و أنقذ حياتي)

الانترنت في مصر #2 كلمة حق

بسم الله، السلام عليكم
طبعا من فتره انا قعدت اشتم في تي اي داتا، وادعي على وزارة الاتصالات في مصر!
وانا كان عندي حق لاني بجد كنت -ولازلت- قرفان من النت، بس عموما عندي معلومتين او تلاته لو الكلام ده كان صحيح يبقى حلو اوي اوي
اول معلومه ان الديسلام بتاع البلد اللي انا فيها اتعمله اخيرا صيانه -كان عندي معلومات شبه مؤكده انه لم يتم عمل صيانه له من 15 سنه- وده ان دل على شئ يدل على انه بدأوا يهتموا
تاني حاجه عن معلومه شبه مؤكده ان اسعار الخطوط هتنزل 50% من بداية شهر يناير
ده انا كنت عارفه كله قبل النهارده، الجديد بقى هو الخبر اللي في سوالف سوفت على لسان وزير الاتصالات والعهده ع الراوي

@سوالف سوفت: وزارة الاتصالات في مصر تطلق شرارة مبادرة الانترنت السريع هذا الشهر

معنديش اي معلومات حول التكلفه بعد زيادة الحد الادنى، او التخفيض وهيبقى ازاي، ومعرفش اذا كان الخبر ده يلغي خبر التخفيض ولا لاء بس اللي اقدر اقوله، أفلح إن صدق!
يابخت من دون وخفف

اهلا على الديمقراطيه الامريكيه

بسم الله، السلام عليكم
لا تستعجب إن قلت لك أن هذه المره الرابعه التي امسح فيها التدوينه واعيد صياغتها
فهل اتى عليك يوم اردت صياغه مشاعرك فلم تستطيع؟، هل اتى عليك اليوم الذي باتت اناملك لا تعرف اين ومتى وكيف تضغط ازار حاسبك لتخرج مكنونك؟، اترى ذاك اليوم الذي لم تستطع من هول وكارثه المفاجئه الفجه، ان لا تستطيع ترتيب وصياغه واخراج افكارك؟
ببساطه، اليونسكو هي منظمه امميه وهي الذراع التراثي للأمم المتحده واحدى المنظمات التابعه له، بات كلنا يعرف هذا
هدتت "الوليات" المتحده بقطع المساعدات التي تساعد بها منظمه اليونسكو وقد فعلت، ألا بستعداء طفلي فانت تستعديني؟
امريكا هددت كمان انها هتقطع المساعدات عن الامم المتحده لو قررت الامم المتحده قبول عضويه فلسطين فيها، اييييييه هو الا يواجه الفكر إلى بالفكر وليس بالعضلات واستعراض القوى؟
مبدء اتعملناه من المبادء الكتير للديمقراطيه الامريكيه المزعومه
فلسطين شايفه انها علشان تحل عمليه السلام بالمنقطه لازم تكون عضوه في الامم المتحده، وتتفاوض كعضوه فيها، وهي شكلا لن تكون دولة إلى عندما تكون عضو كامل العضويه في الامم المتحده
امريكا والصهيونيه "وده كلامهم" شايفين ان احلال السلام في المنقطه يطلب العوده لطاولة المفاوضات هيئ هيئ هيئ هيئ لا ياراجل
طيب اقنعني واقنع الامم المتحده بفكرتك وخليهم يرفضوا عضوية فلسطين علشان لا ترى حل أخر بديل عن المفاوضات :)
زي ما انا اقنعت الامم المتحده بفكري ووجهة نظري .. لكن ازاي، امريكا التي تضع قواعد الدمقراطيه وبتطبقها زي ماهي عاوزه
عفوا امريكا اهلا على الديمقراطيه بتاعتك

نظرية تأمرية بحرف الاف

بسم الله، السلام عليكم
بحب انا اقرا الحاجات الغريبه!، ومن اغرف الحاجات اللي قرتها هي عن نظريه تأمريه جدا على حرف F او بالعربي إف :)
قال ايه بيقولك ان الانسان لما بيكون حاسس بالملل وهو بيقرأ حاجه
قال ايه ياخويا بيقرا المقالات على شكل حرف F
وطبعا اكيد الدراسه دي اتعملت على المقالات الانجليزي اللي هي يافكيك باشا من الشمال لليمين، ولو اتحول الموضوع للعربي هيبقى هو هو حرف F برده بس بالمقلوب يعني السنتين للشمال وعصاية الاف لليمين -,-
اللي حسيت بيه فعلا ان الكلام ده مظبوط سواء بقرا حاجه عربي او انجلش، باخد اول سطرين ورا بعض وبعدين انزل نص عصاية الاف وبعدين اخد سطر من النص ومكملوش للأخر واكمل لتحت وشكرا كده انا فهمت اللي عاوزين يقولوه
برغم اني "مبحبش كتر الكلام" وبأمن وبشده بمقوله خير الكلام ماقل ودل
ورافع -ومتفهمنيش غلط في رافع دي- ورافع شعار يابخت من دون وخفف، لقيت نفسي بتكلم كتير .. اوبس
فعلا في حاجات بحتاج اتعمق في شرحها او بحتاج ساعات اوصل معلومه بشكل اوضح او افضل، ساعات بتفهم غلط او اجزاء من كلامي بتتفهم غلط بكون مرغم استفيض في شرح وجهه نظري وفي الاخر بتهم نفسي و"ساعات بأتهم" بكتر الكلام
فعلا اوقات كتير الانسان بيناقض نفسه، على العموم .. يابخت من دون وخفف :)

الشعب الذي خلع مبارك!

بسم الله، السلام عليكم
الشعب الذي استطاع ان "يخلع" مبارك من الحكم، لم يستطع التحدث مع المتشددين!
لم ولن اقارن بين المتشددين من المسلمون ومبارك فهناك فرق شاسع، لكن كلاهما اعتبرهم وسيعتبرهم الكثيرين "مرض استشرى في مصر"، فتم القضاء على مبارك لكن التشدد الذي كان من محاسن مبارك انه تصدى له، اخذ فرصته!
فهانحن نرى قيادات حزب الاصاله والنور وغيرهم من الاحزاب الاسلاميه "المتشدده" التي تدعي انبثاقها عن الثوره ولكن اين كانوا عندنا نزلنا إلى الميدان، واين كانوا عندما "حرضنا" على النزول والحشد واين كانوا عندما تم اطلاق الرصاص علينا؟
محمودِ هو دور "شباب" الاخوان المسلمين فولاهم لسقط الكثير، لكن لأستمرت الثوره وكانت اكثر حده وزخم، لكن غير المحمود هو الدور الذي يدعيه الكثير بانه شارك وحرض ودعى وساند الثوره من احزاب لم نكن نعرف قياديها الذين يستولون على الساحه السياسيه ويقمون بالتهديد واخراج البيانات ولهجه القوى المزعومه التي يتحدثون بها!
غير المحمود هو جهلهم وعماهم فلإسلام يسر لا عسر، كما قدم رسول الله صلى الله عليه الاسلام درء المفسده على جلب المنفعه!
الموضوع إن تاولى الحديث عن الجماعات سيجرنا للتحدث في الامور الدينيه وهذه اشياء لا ادعي الفهم فيها!
لكن مجمع الاسلام انا قد "شربته بالملعقه" عن ام مؤمنه مطيعه لله مقيمه شعائر الاسلام، ولا تؤخذ الحكمه إلى من الحكماء والحكيم هو الذي يعرف الفرق بين الحق والباطل، لا من يريد تطبيق اعمى للشريعه
فما عرفت ابدا ان خافلت الشريعه بسبب قانون او نص دستوري! ومن منا يدعي هذا؟
من لوثت يده بالدماء مره الله يتولى امره ومنه وإليه رجوعه فهو الوحيد القادر على غفران الذنب، لكن نحن بشر نعرف الخوف ولا نعرف ماوقر في القلوب والعقول، انما نعرف الامور بدلالتها، ودلالات هذا الطريق الذي نمشي فيه استطيع الشعور بانه نفس الطريق الذي سلكتة الثوره الشيعيه في ايران وافلت بقيت التحدث عن ايران لتراه بعينك على الطبيعه!
يابخت من دون وخفف

4 ايام مش كتير؟

بسم الله، السلام عليكم،
فقط غبت 4 ايام وكلعاده -النت مفصول- في هذه الاربع ايام المريره بدون انترنت، بدون اتصال، بدون اطلاع، بدون محاولات ارضاء فضول .. حاسس وي كأني ميت!
وكلعاده اول 5 دقايق في رجوع وعمل النت من جديد الهث نحو المدونات الاخباريه التقنيه ثم اشاهد مافتني من اخبار محليه وعالميه على الرغم اني لا انقطع تماما عن الاخبار اثناء انقطاع النت، لكن فقط للإستذكار والتفتيش عن كثب :)
وكما اعرف ان العالم يتحرك اميالا في 4 ايام، لكن لاحظت خمول شديد في المدونات الاخباريه خصوصا التقنيه منها، لا اعلم ممكن لقلة الاخبار
لكني اعرف ان شهر اكتوبر من كل عام هو شهر غالبا مايكون حافل بالكثير من الاحداث من اطلاق لأجهزه كمبيوتر وقطع جديده، اطلاق العاب جديد وايضا اطلاق نسخ جديده من برامج موجوده بالفعل!
لكن على العموم اتفهم الحال فطبيعي يصيب البعض شئ من الخمول خصوصا مع اقتراب الاعياد الدينيه، وعيد الاضحى ع الابواب اعادة الله عليكم بالخير واليمن والبركات
لكن لتسجيل حاله -محمد سمير اصابتة خيبه الامل-
ويابخت من دون وخفف

وداعا ستيف جوبز #iSad

بسم الله، السلام عليكم
وكما قال اللمبي، "إحياناً" الواحد بينظر للي تحت رجليه ومش بيبص لبعيد .. مع إن البعيد ممكن .. بل وغالبا يكون افضل
وبمناسبه وفاة صاحب التفاحه الثالثه، التي غيرت العالم -ستيف جوبز Steve Jobs- اقولها، وداعا يا اخر الرجال الاذكياء ولهذا دلاله
وكما قالوا الجمله المشهور، هناك ثلاث تفاحات غيرت العالم، تفاحه ادم وتفاحه نيوتن، وتفاحه ستيف جوبز
ولآن الرجل كان يرسم الطريق والكل يسير خلفه كلقطيع فانا اقولها، وداعا يا اخر الرجال الاذكياء، تختلف او تتفق معه، لكن نظل في النهايه نقدر انه صاحب الثورات والسبع القائد لقطيع "البهائم"، وصاحب التحولات الجزريه المتلاحقه في عالم الكمبيوتر
فقبل ستيف كان الكمبيوتر ياخذ اوامره كتابة، افعل هذا وهذا ولا تفعل هذا وهذا، وكان مقصور وفقط على الشركات وليس كل الشركات، بل على اغنياء الشركات
فاتى سيف وطوره بل وصغره، والمبهر انه خفض سعره ليكون في متناول الجميع، فجرى وقلد من جرى وقلد، وسار في القطيع من اراد، لكنه لم يهتم، بل كان يصب اهتمامه على شئ اخر آلا وهو تحسين اختراعاته، فاصبحت ماركة Apple من اغلى المركات بل واكثرها احترام، وحين كبر حلم سيف جوبز لطلق الـ Ipod اصبح ايقونه يود الجميع الظهور بها، بتلك الساماعات البيضاء فضلتها نجمات العالم عن مجوهراتها الثمينه وهاهو سيف يخرج علينا باخر ماتوصل إليه ذكائه الخارق للعاده والخارج عن الصناديق المغلقه، هاهو الـ iphone ذو الزر الواحد والامكانيات العديده والشاشه التي تعمل باللمس، وخطى بل وعدى ورائه من عدى لكنهم لم يعرفوا انهم حتى كلما سبقوه فهو متفوق عليهم، فهو من رسم لهم مضمار السباق .. ولو انك ترى انه سباق غير عادل فكيف ارسم مضمار سباق بيني وبين اخرين؟، لكن من قال لك ان ستيف اراد ان يقود هذا القطيع، هو رسم المضمار لنفسه واقتحمه من اقتحمه، واصبح الـ iphone ايقونه اخرى، لم يكترث سيف كثيرا لمن هو خلفه او من سبقه بل فضل الاعتكاف على الايقونه الاخيره والتي ختم بها مشوار حياه الحافل بالنجاحات والانقلابات التكنلوجيه في جميع المجالات، وهاهو الـ ipad الاسم الحركي للكمبيوتر اللوحي والذي يربط الكثيرين منا بينه وبين اي كمبيوتر لوحي اخر وخطى ولم يكتفوا بل وطار على هذا المضمار من طار

قال الكثير لو لم يفكر نيوتن في التفاحه التي سقطت على راسه مثل كثير من من كانوا قبله، لما اكتشفت الجاذبية!

وداعا ستيف جوبز .. #iSad

على اسم مصر

عندما قال الشاعر العظيم عمنا صلاح جاهين على اسم مصر يقدر يقول التاريخ ماشاء
الراجل الطيب اللي اسمه جميل فارسي ده كاتب مقاله من 2008 على اعتقد، من اجمل المقالات عن مصر حبيت اشاركم بيها

يُخطئ من يقيّم الأفراد قياساً على تصرفهم في لحظه من الزمن أو فعل واحد من الأفعال
ويسري ذلك على الأمم, فيخطئ من يقيّم الدول على فتره من الزمان,
وهذا للأسف سوء حظ مصر مع مجموعة من الشباب العرب
الذين لم يعيشوا فترة ريادة مصر.
تلك الفترة كانت فيها مصر مثل الرجل الكبير تنفق بسخاء وبلا امتنان
وتقدم التضحيات المتوالية دون انتظار للشكر.
هل تعلم يا بني أن
جامعه القاهرة وحدها
قد علمت حوالي المليون طالب عربي ومعظمهم بدون أي رسوم دراسية؟
بل وكانت تصرف لهم مكافآت التفوق مثلهم مثل الطلاب المصريين؟
هل تعلم أن
مصر كانت تبعث مدرسيها لتدريس اللغة العربية للدول العربية المستعمرة
حتى لا تضمحل لغة القرآن لديهم, وذلك كذلك على حسابها؟
هل تعلم أن
أول طريق مسفلت من جدة إلى مكة المكرمة كان هدية من مصر؟
حركات التحرر العربي كانت مصر هي صوتها وهي مستودعها وخزنتها.
وكما قادت حركات التحرير فأنها قدمت حركات التنوير.
كم قدمت مصر للعالم العربي في كل مجال،
في الأدب والشعر والقصة وفي الصحافة والطباعة وفي الإعلام والمسرح
وفي كل فن من الفنون ناهيك عن الدراسات الحقوقية ونتاج فقهاء القانون الدستوري.
جئني بأمثال ما قدمت مصر؟
كما تألقت في الريادة القومية تألقت في الريادة الإسلامية.
فالدراسات الإسلامية ودراسات القرآن وعلم القراءات كان لها شرف الريادة.
وكان للأزهر دور عظيم في حماية الإسلام في حزام الصحراء الأفريقي.
وكان لها فضل تقديم الحركات التربوية الإصلاحية ..
أما على مستوى الحركة القومية العربية فقد كانت مصر أداتها ووقودها
وإن انكسر المشروع القومي في 67 فمن الظلم أن تحمل مصر وحدها وزر ذلك,
بل شفع لها أنها كانت تحمل الإرادة الصلبة للخروج من ذل الهزيمة.
إن صغر سنك يا بني قد حماك من أن تذوق طعم المرارة الذي حملته لنا هزيمة 67,
ولكن دعني أؤكد لك أنها كانت أقسى من أقسى ما يمكن أن تتصور,
ولكن هل تعلم عن الإرادة الحديدية التي كانت عند مصر يومها؟
أعادت بناء جيشها فحولته من رماد إلى مارد.
وفي ستة سنوات وبضعة أشهر فقط نقلت ذلك الجيش المنكسر
إلى اسود تصيح الله أكبر وتقتحم أكبر دفاعات عرفها التاريخ.
مليون جندي لم يثن عزيمتهم تفوق سلاح العدو ومدده ومن خلفة.
بالله عليك كم دولة في العالم مرت عليها ستة سنوات لم تزدها إلا اتكالاً؟
وستة أخرى لم تزدها إلا خبالا.
ثم انظر
بعد انتهاء الحرب فتحت نفقاً تحت قناة السويس التي شهدت كل تلك المعارك الطاحنة
أطلقت على النفق اسم الشهيد أحمد حمدي.
اسم بسيط ولكنه كبر باستشهاد صاحبه في أوائل المعركة.
انظر كم هي كبيرة
أن تطلق الاسم الصغير.
هل تعلم انه ليس منذ القرن الماضي فحسب،
بل منذ القرن ما قبل الماضي كان لمصر دستوراً مكتوباً.
شعبها شديد التحمل والصبر أمام المكاره والشدائد الفردية،
لكنه كم انتفض ضد الاستعمار والاستغلال والأذى العام.
مصر تمرض ولكنها لا تموت
إن اعتلت ومرضت اعتل العالم العربي
وان صحت واستيقظت صحوا
ولا أدل على ذلك من مأساة العراق والكويت,
فقد تكررت مرتين في العصر الحديث,
في أحداها قتلت المأساة في مهدها بتهديد حازم من مصر للزعيم عبد الكريم قاسم حاكم العراق
عندما فكر في الاعتداء على الكويت, ذلك عندما كانت مصر في أوج صحتها.
أما في المرة الأخرى فهل تعلم كم تكلف العالم العربي برعونه صدام حسين
في استيلاءه على الكويت؟.
هل تعلم إن مقادير العالم العربي رهنت لعقود بسبب رعونته
وعدم قدرة العالم العربي على أن يحل المشكلة بنفسه.
إن لمصر قدرة غريبة على بعث روح الحياة والإرادة في نفوس من يقدم إليها.
انظر إلى البطل صلاح الدين, بمصر حقق نصره العظيم.
أنظر إلى شجرة الدر, مملوكة أرمنية تشبعت بروح الإسلام
فأبت ألا أن تكون راية الإسلام مرفوعة فقادت الجيوش لصد الحملة الصليبية.
لله درك يا مصر الإسلام
لله درك يا مصر العروبة
إن ما تشاهدونه من حال العالم العربي اليوم هو
ما لم نتمنه لكم. وأن كان هو قدرنا, فانه اقل من مقدارنا واقل من مقدراتنا.
أيها الشباب
أعيدوا تقييم مصر.
ثم أعيدوا بث الإرادة في أنفسكم
فالحياة أعظم من أن تنقضي بلا إرادة.
أعيدوا لمصر قوتها تنقذوا مستقبلكم
نبذات ووقفات
هنا بعض نبذات قبل أكتشاف وخروج البترول ..
الحجاز .. توفيق جلال , كان رئيس تحرير جريدة الجهاد المصرية , وتوفيق نسيم كان رئيس وزراء مصر ,
حدثت مجاعة وأمراض أزهقت آلاف من الأرواح بأراضى الحجاز ... كتب توفيق جلال فى صدر صحيفته الى توفيق نسيم رئيس وزراء مصر , كتب يقول , من توفيق الى توفيق , فى أرض رسول الله آلاف يموتون من الجوع وفى مصر نسيم !! أصدر توفيق نسيم أوامره فورا ,
وعبرت المراكب تحمل آلاف الأطنان من الدقيق والمواد الغذائية , وآلاف من الجنيهات المصرية والتى
كانت عملتها أعلى وأقوى من العملة البريطانية
, غير الصرة السنوية التى كانت تبعث بها مصر
, وكانوا يشكرون مصر كثيرا على ذلك ..
الكويت .. كانت مصر تبعث بالعمال والمدرسين والأطباء والموظفين لمساعدة الأخوة بالكويت
, بأجور مدفوعة من مصر ..
ليبيا .. كانت جزأ من وزارة الشؤن الأجتماعية المصرية ..
كل هذا لم يكن منة من مصر , لكن كان دعما وواجبا وطنيا لأشقائها العرب ,
مذكرات الثورى العظيم ,
أحمد بن بلة وقيادات الثورة الجزائرية
تشهد , وهم يقولون ,
مهما قدمنا
وقدمت الجزائر لمصر , فلن نوفى حق مصرعلينا وما قدمته لنا... كذلك ما قدمته
مصر لثورة الفاتح من سبتمبر الليبية...
التضحيات الكبيرة والعظيمة والتى لا ينكرها
أبدا الشعب اليمنى
لما قدمته مصر لليمن وحتى أشرف أقتصاد مصر على الأنهيار
مصر التى سطعت منها شمس الحريه على ربوع الكره الارضيه
مصر التى وقفت بكل امكانيتها المتواضعه وشعبها العظيم
فى وجه القوى الغاشمه فرنسا وبريطانيا العظمى
مصر التى ساندت قضايا المظلومين بالعالم شرقا وغربا
فأحتضنت حركات النضال والتحرير من مشارق الارض الى مغاربها
دون تمييز الى اللون او الدين او العرق
فكانت قبله الثوار والمناضلين من ربوع الكره الارضيه
فااحتضنت بتريسيا لو مومبا وحركته
وحزب المؤتمر الافريقى ضد التمييز العنصرى بقياده مانديلا
وروبرت موجابى وابطال وزعماء افريقيا ومناضليها
وقدمت الدعم والمسانده للثوره الجزائريه والليبيه
واليمن والعراق وفلسطين
واستقبلت على ارضها عظماء ثوار العالم
فااستقبلت الثائر العالمى جيفارا
وفيدل كاسترو
ونهرو واحمد ساكارنو وذو الفقار على بوتو ومحمد اقبال
وتيتو
مصر التى تعطى بسخاء ...........لايمكن ان تغدر
مصر التى تجمع تحتضن ........ لايمكن ان تفرق وتقتل
مصر التى تأوى................ لايمكن ان تخون
هذه هى مصر الصابره الامنه المؤمنه المحتسبه
يأيها السفهاء يامن تتطاولون على مصر وشعبها
هذه هى مصر العظيمه....... فمن أنتم؟؟؟؟
هذا ماقدمته مصر للعرب والعالم..... فماذا قدمتم؟؟؟؟؟
مصـــــــــر هى
بلاد الشمس وضحاها،
غيطان النور،
قيامة الروح العظيمة،
انتفاض العشق،
اكتمال الوحى والثورة
"مراسى الحلم"
العِلم والدين الصحيح،
العامل البسيط
الفلاح الفصيح،
جنة الناس البسيطة
القاهرة القائدة الواعدة الموعودة
الساجدة الشاكرة الحامدة المحمودة
العارفة الكاشفة العابدة المعبودة
العالمة الدارسة الشاهدة المشهودة
سيمفونية الجرس والأدان
كنانة الرحمن
أرض الدفا والحنان
معشوقة الأنبيا والشُعرا والرسامين
صديقة الثوار
قلب العروبه النابض الناهض الجبار
عجينة الأرض التي لا تخلط العذب بالمالح
ولا الوليف الوفى بالقاسى والجارح
ولا الحليف الأليف بالغادر الفاضح
ولا فَرح بكره الجميل بليل وحزن امبارح
ولا صعيب المستحيل بالممكن الواضح
كونى مصر
دليل الإنسانية ومهدها

حتى لو كنت حمار قول لاء للإحتكار

Internet Speed and cost around the world - Info-graphic paper

اضغط على الصوره للتكبيرها - المصدر: dailyinfographic

حتى لو كنت حمار قول لا للإحتكار

اولا وعلى غير العاده -ولو اني حاسس  انها ممكن تكون عاده- حطيت لكم صوره في بداية التدوينه عباره عن Information Graphic Paper بتظهر بعنوان سرعة وسعر الانترنت حول العالم، والورقه بتظهر احسن مكان موجود فيه نت وتقدر تحصل عليه بسعر قد ايه، وطبعا اليابان كانت في المركز الاول حيث سعر الواحد ميجا هناك 0.27 سنت يعني اعلى من ربع دولار بـ 2 سنت بظبط

وزي ما معروف ياولاد ان الدولار بكام؟ شطار الدولار ربنا معاه ويتخطى حاجز ال6 جنيه اهو، حاليا هو بـ5.958 بتاريخ كتابة المقال

يعني لو قولنا 6 جنيه هيبقى سعر الواحد ميجا في اليابان بكام يا شطار؟ .. شاطرييييين السعر هيبقى 1.50 قرش (مأئه وخمسون قرش فقط لاغير) - جنيه ونص :)

وده إن دل على شئ يدل على ايه يا حلوين؟ صح صح يدل على ان TEData شركه واطيه ومستغله وبتكسب قد كده على قفانا، لا وايه يا حلوين .. TEData شركه حكوميه تابعه للهئيه العامه للأتصالات اللي تتبع بدورها وزاره الاتصالات اللي هي وزاره مصريه .. مش فلبينيه مثلا .. وطبعا معروف ان في مصر شوية شركات يتعدوا على صوابع الايد هم اللي محتكرين النت وعلى رأسهم TEDate وهي اللي بتحدد الاسعار كذالك، يعني لو TEData قالت ان سعر الكيلو 1000 جنيه .. الكل هيقول سمع وطاعه يامولاتي

وبحسبه بسيطه تقدر تقول ان سعر الـ 1mbps = في مصر 140 جنيه / 6 = 23.33 (ثلاثه وعشرون دولار فقط لاغير) يعني احنا المفروض نتحط بلا فخر وبكل شرف في اخر القائمه في الورقه دي بعد بولاندا اللي بيدفعوا فيها اقل من نص اللي بندفعوا لان هم عندهم 1mbps = 13$ زي ماهو موضح في الورقه

وعلشان كده يااهبل يا متخلف يا حمار .. قول لا للإحتكار ولتسقط TEData ولتذهب للجحيم ويارب كل اعضاء مجلس الاداره يجي لهم تسلخات

ع الهامش تشوفها في الخباثه - 

@اليوم السابع: بالفيديو.. عمال وموظفو سنترال الأوبرا يحتجزون رئيس مجلس الإدارة

@اليوم السابع: "قوات الأمن" تتفاوض مع العاملين لتحرير رئيس "المصرية للاتصالات"

@مصراوي: الأمن يحرر رئيس المصرية للاتصالات المحتجز عبر فتحة في مكتبه

بالالوان الطبيعيه، الايمان العميق بجانب الابداع الحقيقي

بسم الله، السلام عليكم
تحت مبدء وشعار يابخت من دون وخفف، القي مافي جعبتي
طبعا انا قديم لاني بتكلم عن حاجه بقلها اكتر من سنتين اهو، بس لما اتفرجت ع الفيلم من ساعه اتسفزني، فيلم بلألوان الطبيعيه
للثنائي المسمى بالصادم، اسامه فوزي، وهاني فوزي، فبعد ما تم القائه من قبل ماعساني ان اقول :)
الفيلم بيني وبينكم بيتكلم في مشكله حقيقه، باسلوب تصوير مختلف، بنظره اعم، ويمكن اشمل .. كمان الفيلم لمس جانب جديد لم يسلط الضوء عليه قبل كده، ودي نقط تتحسب في سكور هاني فوزي، واسامه فوزي، بس النقط اللي تتحسب عليهم هي ان الفيلم كان ممكن يتعالج بشكل احسن من كده، على الاقل علشان يناسب المشاهد العربي
عارفين، انا ديما بشوف ان في صراع قوي جدا بين الثقافه العربيه المنغلقه بعض الشئ، والثقافه الانجليزية المتفتحه، وده راجع لعدة اسباب منها ان منقطتنا دي هي مهد الديانات، مصر والسعوديه وفلسطين .. لو تلاحظوا كمان ان ده مش بس بسبب المسلمين
لا كمان بسبب المسيحيين، وكاثبات سريع هقولك شوف مسيحيات مصر ومسيحيات امريكا مثلا، هتلاقي ان المسيحيه المصريه مستحيل توافق على علاقه -اسف في التعبير الصارخ- جنسيه بدون زواج، زيها زي المسلمه بظبط، على عكس البنت المسيحيه الامريكيه فهي وبقول معظمهم مش كلهم، بيوافقوا على ده ومعندهمش مشكله انها تكون في علاقه طويله الامد، وفي بيخلفوا كمان والجواز بيجي في الاخر!
السبب زي ماقولت قبل كده راجع للثقافه القريبه جدا من مهد الديانه، زي قربنا من السعوديه وهي مهد الاسلام، وقربنا من فلسطين وهي مهد المسيحيه، لو جينا نشوف هنلاقي الازهر والكنيسه الأرثوذكسية سطوتها في مصر اكبر من مثلاتها في اروبا وامريكا .. وعلشان عارف ان في ناس حساسه، فانا قصدت السطوه يعني النفوذ وعلو الكلمه وقدر التأثير في الناس
كلها محاولات بائت بالفشل عندما حاولوا الارتقاء بالفن لمستوى الفن الغربيه والامريكي، فهم من ابتعدوا الفن فكيف نصل لهم؟
عندي شرح دال بسيط، في مصر عادة ماهو مصدر التقنيه الحديثه زي الكمبيوتر واللاب توب والتليفون الكذي -الاسمارت فون، والتاب وخلافه؟ اروبا وامريكا وهكذا
طيب لما جربت شركة مصريه صناعه التليفون وحضرتك اشتريته، حسيت بايه؟ بانه مختلف برغم انه يشبه الامريكي كتير، طيب والصيني؟ كذالك .. إلى اذا كانت شركه اروبيه او امريكيه لها مصنع في الصين
ده مردوده لان الثقافه بتختلف من هنا لهناك، هم مثلا هناك شايفين في التليفون ان الكاميرا مهمه، والسوفت ووير مهم ولذالك بيطوروه
انما هنا احنا شايفين ان الصوت العالي النقي اهم، ان الراديو ومساحه تخزين البيانات والاسماء اهم
وعلشان كده لما المصنع يبقى مصري بيديك تليفون في مميزات الثقافه المصريه اللي معكوسه في السلعه اللي هو صنعها، وكذالك الاروبي والامريكي
وعلشان كده بائت بالفشل كل المحاولات في ان تصل للابداع كما عرفناه من الغرب، وعلشان كده ارجوك يا استاذ هاني فوزي ويا استاذ اسامه فوزي، اعملوا لنا افلام بقدر ما وصلنا للفن وما يناسبنا :)

اقرأ ايها الاحمق .. دعوى مفتوحه للقرأءه

بسم الله، السلام عليكم

اقرأ ايها الاحمق .. دعوى مفتوحه لتقرأ

ربما هذا التوقيت لا "يصادف" عيد الكتاب، او يوم القراءه العالمي، او يوم الطفوله، او اي تاريخ في البشريه اصلا، لكنها دعوى فقط لتقرأ
زمان ولحد امبارح، كنت مقتنع بنظريه تآمريه غبيه .. وكان عندي اعتقاد اغبى!
النظريه مفادها ان من كتر ما اثروا علينا علشان نقرا .. ومن كتر ما كتاب زمان كانوا بيدعوا للقرأه "علشان ياكلوا عيش" استطاعوا ان يأثروا على عقولنا وشئ فشئ اصحبنا "منومين مغناطيسيناً"
والاعتقاد الغبي هو ان النت فيه كل حاجه، كل المعلومات اللي محتاج اعرفها وكما يقول الامريكيين "just google it" او جوجلها، وهي جمله تفيد بالبحث عنها في جوجل وبالتاكيد ستجد الحل!
لكني وجد منذ ساعه ان المعلومات المتوافره للبحث في جوجل مثلا عن "التأثير على اللاوعي" شحيحه لدرجة انه لايوجد معلومات اكيده :)، جرب بنفسك فانا اعطيتك الرابط -,-
لذا فهي دعوى عامه للقرأه، من قال اقرا لم يقولها عبثا ولم يقولها ليجعلك تشتري الكتب او تدفع اشتراك المكتبات، او لتدفع ثمن تأجيرك كتاب ما، فهي دعوى عامه للأرتقاء بفكرك ومستوى ادراكك لماهو حولك، اقرا فيما يعجبك، لكن اقرأ
ويابخت من دون وخفف

بلوجر في شكل جديد، يبدو ان الجميع حصل على ثياب جديده

بسم الله السلام عليكم، بداية احب ان اهنئ نفسي واياكم ببدايه كتابتي بالفصحى عوضا عن العاميه التي استخدمها بكثره، لكن سبحان مغير القلوب، وايضا بمناسبة بدايه تحدثي عن التقنيه بشكل اكبر حيث انه استحوذت عليا السياسه وامور مصر الداخليه في الاوقات الماضيه، لكن ما ان هدأت الامور عاودت للكتابه في الامور التي احبها واهتم بها.

 جوجل تطلق حمله الاحلال والتجديد، وبلوجر تلحق بالكرب.

يبدو ان جوجل لا تريد تفويت هذه المناسبه، فبعد ان ظهر جوجل+ -جوجل بلاس- للجميع واستطاع جذب الاهتمام والانظار إليه، هاهي عائله جوجل تتحلى بنفس الروح التنإنتقاميه (إختصار لوصف حاله التنافسيه الانتقاميه) من نفسها، وكما تعودنا من جوجل دائما فهي عندما لاتجد المنافسين، تجد منافسه مع نفسها
في البدايه اعتقدت ان الامور مأثور على جوجل + لكن خاب ظني وتحلت صفحه جوجل الرئيسيه من قبل وهو واضح وجلي في النسخ التي تستخدم تنسيق -اليسار:اليمين- في جوجل، وبعد اطلاق جوجل+ بايام هاهي تزين بلوجر بنفس الحله داخليا وفي صفحه بلوجر الرئيسيه.
لك ولي ملاحظات لكن نحن نتحدث عن الشكل، فقد زال عن الصفحه الرئيسيه كثيرا من اللون #البيج واستبدل بالابيض والراصاصي الفاتح
اخذت لوحه التحكم شكل اكثر انسابيه واناقه، لم يتم التجديد في محتويات الصفحه، لكن تم اعاده ترتيبها بشكل اكثر اناقه وانسيابيه
لم تعد الراوبط الهامه في الناف بار في الاعلى، وعوضا عن ذالك تم وضعها على يمين (في النسخه العربيه-والعكس في الانجليزيه).
تم اعاده توزيع محتويات صفحه الكتابه/او المحرر، للتلائم مع الشكل الجديد، واضيف عليها بعض الامور لتجعلها اسهل، مثلا مساحه الكتابه التي تظهر اسف روابط اعدادات المشاركات على اليسار (في النسخه العربيه-والعكس في الانجليزيه)
تفريغ مساحه اكبر للكتابه الحره، بدون ارباك الكاتب بالازرار التي لا يستخدمها البعض!
لنق نظره على التغيرات

      

*يبدو ان علينا جميعا ان ننتهج نهج جوجل ونفكر خارج الصندوق

صعب عليا الكلب

بسم الله، السلام عليكم، على غير العاده هكتب التدوينه دي وهحاول اكون فيها هادي وابعد عن الهزار شويه
كنت في يوم ماشي بعجلتي القديمه -ايام ما كان عندي عجله- المهم طلع عليا شويه "كلاب" وفضلوا جري ورايا حوالي 5 دقايق كامله لحد ما زهقوا وانا ركبي سابت، المهم قررت من بعدها اني ممشيش من الشارع ده تاني، وظل الحال على ماهو عليه لحد ما مبقتش بركب العجله تاني، وفي يوم قررت ارجع من الشارع اياه، وكلعاده ولانه شارع له ظروف خاصه صاحبه مربي كلاب، لقيت قائد مجموعه الكلاب اللي كانوا بيجروا ورايا واقف في الشارع، استجمعت قوايا وعديت عادي، مره في مره اتجرأت وبقيت بمشي عادي
لحد ما في يوم كنت جايب عشا وراجع وجري الكلب ورايا تاني بس كان لواحده، وبأعجوبه فلت منه، المهم عدت الايام وكذا مره بقيت اتحاشى المشي في الشارع ده، لحد ما في يوم راجع مستعجل قررت امشي من الشارع ده، افاجئ بالكلب ماشي على 3 رجول بس، والظاهر كمان ان كان في رجل من 3 اللي ماشي عليهم متعوره .. وصعب عليا الكلب جدا
اول يوم شوفت فيه المخلوع حسني مبارك مصعبش عليا بالعكس انا كنت شمتان فيه، اه انا حسني مبارك مضرنيش بشكل شخصي، بس ضرني وضر بلدي وازاني ولو بطريقه غير مباشره
وفضلت اتفرج على جلسات القضيه يوم ورا التاني، والجلسه رقم 3 وقفوا البث، زعلت طبعا زي اللي زعلوا بس كنت حريص اعرف كل اللي بيحصل جوه لحظه بلحظه، ومن اماكن كتير وطرق اكتر، بس اهمها اني كنت اتعرفت على صحفي بالدصفه وضربنا صحبيه جامده -طبعا مينفعش اقول اسمه لانه مصدري ^^- وبقيت اتصل بيه اول ما الجلسه تخلص اتاكد من اللي سمعته على الجزيره وفي اماكن كتير، المهم دخلت على اليوم السابع النهارده لقيت الخبر ده @اليوم السابع: ننشر صورة لمبارك فوق سريره فى استراحة المحكمة .. دخلت وكلي فضول اني اشوف وصل لأيه واول ما شوفته قومت متحسبن عليه، وحسيت اني جسمي اشعر وانا بتحسبن و وانا بكتب التدوينه دي، بس فعلا .. الكلب صعب عليا، بس هو مصعبش عليا علشان سنه او حالته الصحيه .. لالا كل ده يتعدى، اللي خلاه يعصب عليا هو انه لو كان احترم في يوم من الايام وعمل حساب ليوم زي ده، مكنش وصل ووصلنا لكده، حسبي الله ونعم الوكيل فيك يا مبارك، سبحان المعز المزل، يهب الملك لمن يشاء وينزعه ممن يشاء، يعز من يشاء ويزل من يشاء بيده الملك وهو على كل شئ قدير، ياارب اجعلنا نعمل الف مليون حساب لوقفتنا قدامك ويوم حسابك، واجعلنا ديما فاكرين ان كلنا راع وكل راعٍ مسؤل عن رعيته ولو كان حيوان اليف
هحتفظ بالصوره في المدونة هنا للذكرى الخالده

زلازل تكنولوجيه تضرب اسواق الارض

بسم الله، السلام عليكم
مره واحد صاحبي سئلني وقالي، يامحمد ياخويا .. ايه سر حبك للتكولوجيا؟ جوبته ببساطه بشوف احلامي بتتحق فيها -وخيم الصمت- ماعلينا، كان عندي عاده يوميه اني بفتح @سوالف و@تيدوز اشوف شويه اخبار هنا، اخبار هناك، مقاله هنا، نقد هناك .. إلى ان جاء اليوم المنشود، وقررت تغير موبيلي العقيم (nokia 7610 الدمعه) وصدقوا حين سموه الدمعه بجد، المهم عقدت النيه واسقريت على Nokia N8 برغم الانتقادات اللي سمعتها عن نوكيا وانها مبقتش زي الاول وبتاع، قررت ادعم شركتي المفضله وكشفت راسي واتجهت وقولت يارب يطوروا النظام العقيم اللي اسمه Symbian ده بقى، وزي ما احنا عارفيين ياولاد ان الـ Nokia N8 بيشتغل بنظام تشغيل Symbian^3 OS وقررت إن النظام لو معجبنيش هدور على اي ابلكيشن يخليه شبه الايفون وخلاص، ام هند وانا بدور على رفيوهات علشان أأكد حجز التليفون من المحل اللي هشتريه منه في اسكندريه، وقعت على موقع مكنتش دخلته من حوالي سنه ونص، وإذ بي افاجئ ان المواقع اللي بدخل عليها دي مواقع "هلس وفتشه كبيره اوي" واخرهم يحطلوا لنا 3 4 اخبار كل يوم وكل واشكر على كده.
لقيت هناك عالم اكبر من ماكنت متخيله، وكله كوم ومؤتمر IFA 2011 ده كوم تاني خالص، المؤتمر ده فيه كل الشركات القديمه والجديده اللي جايا تستعرض عضلاتها، ومش اي عضلات لالالا، دي عضلات وسباق محفوف بالمخاطر، وكأن كل شركه لو تقدر تسحر هتعمل كده علشان تخلي المستهلك او الزبون زي ما انا بحب اسميه، يثق فيها ويشتري منهم، تليفونات واجهزه كمبيوتر ولاب توب وتابليت ترضي جميع الازواق والاهتمامات، سواء كنت رجل اعمال هتخلص شغلك، او شاب حابب تضيع وقت، او مصور ومبتقدرش تستغنى عن الكاميرات، شغال في شغل وبتدون ملاحظات كتير؟ طيب تحب تلعب وتضيع شويه وقت؟ ولا تتفرج على فيديو 3D؟ اي كانت اهتماماتك هتلاقيها
من فتره كبيره كنت اتفرجت على فيلم اسمه Wall-E .. مش عارف ليه حاسس ان كوكب الارض كلها ربع ساعه ويتحول لمقلب زباله كبير زي اللي كان في الفيلم، عموما، لو اتحول للكوكب اللي موجود في الفيلم، هنبقى متطرين ندور على حد يعملنا سفينه اكسيوم :D
ويابخت من دون وخفف

البسوا علشان خارجيين، اكتشفوا كوكب يصلح للحياه زي الارض!

بسم الله، السلام عليكم
اوعوا تفهموني صح، لما قولت البسوا علشان خارجيين كان قصدي بجد :)، انا عن نفسي ناوي البس علشان رايح شقيق الارض، وبعدين ده كوكب مش بعيد ولا حاجه، ده مسافة 36 سنه ضوئيه بس، يعني حوالي 365 بليون كيلو متر
انا عن نفسي عاوز هناك شقه، لا شقه ايه تلاقي الاسعار فيه في الارض، انا عاوز قصر و80 عربيه 40 سبورت والباقي متنور مابين 4×4 وعائلي سيدان ولاموزينات بقى، بعيدا عن الترقيه والكلام اللي مش بيأكل عيش تفتكروا ياترى الكوكب ده عليه بشر ولا لا؟، ياترى عليه اي نوع من انواع الكائنات الحيه، طيب المقال ده محددش هو الكوكب ده في انهي مجره؟ ولا معانا في درب التبانه؟ طيب تفتكروا الانسان هيجي عليه يوم يدوس الكوكب ده برجليه؟، انا عن نفسي اعتقد انها لو حصلت هتبقى محتاجه مئات او يمكن الاف السنين على ما يطوروا "شئ" يكون سريع بما فيه الكافيه علشان ياخد احياء من الارض يوصلهم احياء للكوكب، ويرجعهم احياء :)، بس عموما لو ده حصل اعتقد ان هيكون حصل تطور كبير جدا في نظريه النسبيه بتاعت اينشتاين اللي اثبت فيها نظريا امكانيه سفر البشر عن طريق طي الزمكان او انطواء ابعاد الارض (اقرأ عن النسبيه لأينشتاين وانتا تفهم لو مش فاهم).. عملا بمدء يابخت من دون وخفف .. السلام عليكم

• @اليوم السابع: اكتشاف كوكب يشبه الأرض صالح للسكن

اول ايام العيد: كارثه

بسم الله، السلام عليكم
ايه رأيكم لو دخلت عليك انا في يوم ساعة الاذان، ولقيتك بتتفرج على ماتش كوره ومقومتش تصلي
قومت ماسك شومه وطاخ ضربك على دماغك جايبلك ارتجاج في المخيخ -,-
ولما انتا عملتلي محضر قولت في اقوالي اني كنت بمنعك من ترك الصلاه
يعني بصريح العباره عملت زي الدبه اللي قتلت صاحبها!
عايزين الحق؟ انا عمري ما شوفت او سمعت او قرأت حديث عن سيدنا محمد (ص) يحث فيه المسلمين على ارغام المسلمين غير المتلزمين بالألتزام
ده ربنا بيقول لغير المسلمين من شاء منكم فليإمن ومن شاء منكم فليكفر
يعني ربنا سبها للعباد اللي عاوز يكون مؤمن بالله ورسوله براحته واللي مش عاوز برضه براحته
تقوم انتا يا مسلم تجبرني اني التزم؟ طيب تيجي ازاي دي
طيب افرض انا راجل مش كويس وعاوز احط فلوسي في بنوك حضرتك بتقول عليها رباويه "والبنوك بتاعتكم يا بتوع ربنا هي اللي مش رباويه صح؟" انتا ولامؤخذه مالك؟
للمعلومه انا معرفش هل ايام الرسول (ص) كان فيه اماكن بيشربوا فيها الخمره ولا لاء، وهل لو كان، سيدنا محمد كان بيهدها ولا لاء
بس ده محتاج اجابه، بالرجوع للكارثه بقى لو حابب تقرأ اقرا الخبر ده

@اليوم السابع: الدعوة السلفية تعرض الملامح العامة لبرنامجها السياسى والاقتصادى والدينى.. نسعى لإقامة دين الله فى الأرض.. والنظام القضائى لابد أن يتضمن الحدود والتعزيرات.. وتجنب النظام الربوى وأنظمة الميسر

رمضانيات: سيجاره؟ لا، اعتبرني ابن اختك

بسم الله، السلام عليكم
عملا بمدا يابخت من دون وخفف، احب ابشر نفسي وكل اللي بيتابعوني، اننا داخلين على ايام سودا
لكن لم تنعم امريكي، قصدي لن تنعم اسرائيل واقسم بالله بأقولها، لن تنعم اسرائيل بيوم واحد رجل عسكري اسرئيلي صهيوني خسيس هتخطي ارض مصر، وجثتي هتبقى في مقدمه الجثث وطبعا الكلام ده بمناسبة ما ذكر @اليوم السابع: سامح سيف اليزل: إسرائيل تريد احتلال 7 كيلو لتوسيع حدودها
لكن بالعوده لأسم التدوينه الغريب انا حصلت لي حاجه عجيبه من يومين تلاته، واقف في الشارع بتصرمح قدام نت كافي "سيبر يعني" عامل نفسي ابن ناس وكده ^^
المهم واقف وبشرب سيجارتي لقيت "نفر" معدي رمى السلام رديت، قالي معاك سيجاره؟ قولتله الحقيقه انا مبدخنش "اه والسيجاره كانت في ايدي" قالي اعتبرني ابن اختك :)
انا لاحظت ان من بعد الثوره الناس عشمها ذات في بعض اوي، يعني جالي احساس ان السلام بقى بيترمي كتير
ده غير الدأون اللي كترت في البلد
وكله كوم .. واخونا المسلمين قصدي الأخوان المسلمين كوم تاني
والله انا للحظه حسيت ان هم اللي قاموا بالثوره مش احنا =))
لا صحيح بتكلم بجد، ده بلى ازرق بعيد عن السامعين
ويابخت من زار وغار، فوتكم بألعاَفيه :)

وعد وربنا يقدرني على وفائه

بسم الله، السلام عليكم
انا يمكن "لمحت" اني بحاول اعمل دراسه او بحث عن انجازات الرئيس المخلوع مبارك، وكنت عاوز اسلط الضوء في البحث ده عن اهم انجازات حكمه اللي امدت لحد 30 سنه إلا شهور، لكن.
في تطور ونمو فكري في دماغي كده قولت ليه ياض يا محمد متعملش البحث ده وبعدين تعمل مقارنه بسيطه!
وفكرت في بلد كويسه جدا، اقدر اعمل عليها مقارنه وهي تركيا ورئيس الوزراء رجب طيب اردوجان
وعلشان ابقى منصف هاخد اول فتره رجب طيب اردجان وهي منذ 14 مارس سنة 2003
ويوم 14 مارس سنة 2003 في مصر!
وهحاول اعمل ايه اوجه التشابه والاختلاف والانجازات هنا وهناك وربنا يقدرني يارب
بالمناسبه للي مبيحبوش "الملل" البحث بتاع مبارك والمقارنه بتاعت مبارك واردوغان هيبقوا طوال ومملين -,-

مسيو رمضان .. صدمني "بحبك ياهنيدي"

بسم الله، السلام عليكم
طبعا مش عاوز اقول انا قد ايه بحب الراجل اللي اسمه محمد هنيدي ده، راجل محترم اخلاق، تحس ان فيلمه نضيف
يعني تاخد اسرتك وانتا مطمن وداخل فيلم لهنيدي، قصه هادفه فعلا مش كلام اياه، محترم، لا رجل عريانه ولا مشهد مخل ولا ولا "اللي بنشوفه في الافلام ده"
هم بصراحه كلهم محترمين، لكن مثلا حد زي السقا برغم انه ممثل مبدع زي ما بيقولوا إلى ان فيلم افريكانو كان في مشهد مكنش اللي هو
ابراهيم الابيض على سبيل المثال برده كان في ايحاء
لكن لو رجعنا لمسيو رمضان والقصير الظريف محمد هنيدي هقول اني يمكن علشان متعودتش على هنيدي في التلفزيون
كمان مخرج المسلسل تحس انه مش متمكن من ادواته، برغم اني حاسس ان الفكره جديده وعارف ان ده انطباع اولي، لكن قالوا زمان لطالما دام الانطباع الاولي! -بشد الياء-
كمان مفيهوش نفس حس هنيدي على الشاشه الذهبيه زي ما بيقولوا، يعني حسيت ان الاداء واقع بنسبه بسيطه ويارب يخيب املي لاني بحب الراجل ده ونفسي اشوفه في حاجه كويسه
مش عارف يمكن علشان التحول من السنيما للتلفزيون يكون عاملي انا حاله من اللا مبالاه او عدم التقبل .. مش عارف لكن ده احساسي نحية مسيو رمضان وحبيت انقله، لكن في النهايه برغم كل "الملاحيظ" إلا اني اكيد هشوف المسلسل
بالمناسبه "معجبنيش حكاية الاحتكار دي" ^.^

تجربتي مع التورنت .. ملل

بسم الله، السلام عليكم
نسيت اقول وانا بعرف نفسي في اول @تدوينة اني مدمن العاب
وطبعا بدوّن كتير -,- اثناء تحميلي لعبة Mass Effect 2 كنت بحمل من الميديا فاير، وكلنا عارفين يا ولاد ان الميديا فاير بيضرب الملفات المضغوطه
خلصت تحميل والجو لطيف، نقلت اللعبه من على اللاب للجهاز وبفك الضغط واذ بي افاجئ ان في جزئين مضروبين
مش مشكله نحملهم من جديد والجو جميل والشمس طالعه، حملتهم بعد عناء البحث عن نفس الملفات على سيرفرات تانيه غير اللي اضرب على الميديا فاير، ونقلت الملفات الجديده من اللاب للجهاز وبسطب تاني، واذ بي افاجئ بـ 3 ملفات مضروبه برده
اعمل ايه؟ اعمل ايه؟ جالتي فكره، كنت سمعت عن ان ينفع الواحد مننا يعمل Check up للملفات الـ Iso بس لازم يكون من ملف تورنت، مش بطال هجرب التورنت لاني كنت اول مره احمل بيه ونشوف
وزي ما كلنا عارفين برده ياولاد ان لعبة mass Effect 2 قديمه نسبيا، من 2010 يعني
المهم ربنا هداني لموقع ابن حلال جبت منه الملف وبعمل التشيك اب، جميل جدا البرنامج لقى ان في ملفات ناقصه في الملف الـ Iso وقرر ينزلها
اتفاجئت تاني برده لما لقيت ان اللي ناقص من ملف الـ Iso يعد 10% من حجم الملف الكلي، قولت مش مشكله الواحد يصبر ساعه في سبيل لعبه جديده تكسر الملل
10% - 100% = كام يا شطار؟ شاطريين، = 90% وعلشان اكون اكثر تحديدا 89.7%
الكلام ده كان الصبح الساعه 9 :) .. من ساعتها لحد دلؤتي الساعه 4 الدهر، الحمد لله بفضل الله والشكر لله، وصلت اخيرا لـ 89.8 :)
حلو التورنت، انصح اي حد ناوي او حابب يشل حد صاحبه/قريبه/جاره .. يديله اي برنامج تورنت وما اكثرهم ويعرفه على لعبه حلوه جدا واهم حاجه تعجبه وميكونش ليها اي اثر على النت غير من التورنت :)
ويفضل لمفعول اسرع ان اللعبه تكون قديمه نسبيا

ربنا معرفهوش بالعقل

بسم الله، السلام عليكم
كنت بقرأ زي العاده اخر الاخبار على @اليوم السابع وتحديد مقال أ/خالد صلاح: خالد صلاح يكتب "كلمة واحدة": «سيدنا إبراهيم» فى رمضان، وكلعاده برده بحب اتفرج على الكومنتات كده واشوف الناس ردود افعلها ايه :)
احد التعليقات علق على كلام أ/خالد صلاح وقال ان ربنا بيتعرف بالرسُول والانبياء! .. ياالله فعلا لو في ناس كتير فاهمه كده ممن بيقولوا عن نفسهم اسلاميين او مفكرين اسلاميين وغيرهم تبقى مصيبه حلت بالدين اللي هم بيدعوا انهم مفكرين فيه
كأي ولد عادي وانا صغير سئلت ولدتي وقولت لها، هو سيدنا جبريل نزل على سيدنا محمد (ص) امتى؟
قالتلي وهو في اوائل الـ40 من عمره وساعتها كان نضج وربنا اختار الوقت ده بزات لان ده سن النضوج في كل حاجه
وببرآئه الاطفال سئلتها تاني، طيب قبل ما سيدنا محمد (ص) يبقى مسلم .. كان من الكافر؟
بعد ما عنفتني امي قالتلي سيدنا محمد عمره ما عمل زي ما الكفار بيعملوا، وفهمتني انه كان بيقعد قدام بيت السيده أمنه الي ربته يتفكر في خلق الله

انا معتقدش اني قادر على اني اقول وجهة نظري خصوصا في حاجه دينيه، لأني لا ادعي اني مفكر ديني او فاهم للدرجه في الدين .. واعتقد ان حتى لو عندي رأي يستحن اخليه لنفسي في المسائل اللي زي دي، لكن انا علقت على الموضوع ده علشان اعمل سترس على حجم الاختلاف والتشرزم اللي موجود على الساحه دلؤتي، هو عموما مفيش اتنين في مصر من زمان بيتفقوا
وإن اتفقوا في وجة النظر يختلفوا في آليات التطبيق، وإن اتفقوا في آليات التطبيق يختلفوا في الاولوليات، وان اتفقوا في كل حاجه يختلفوا في معاد التنفيذ :)
هي دي الثوره؟ هي دي الثوره اللي انا شاركت فيها وكنت احد المحرضين؟ هي دي الروح الثوريه يا ثوريين؟
هو ايه، مبارك كان مخوفنا للدرجة اننا نتفقن في اننا نخلعه ونختلف في اننا نملي الفراغ ونصحح اواضع البلد بعد المخلوع واعوانه؟
انا يمكن كنت بسمع موضوع الفلول ده واسكت، فلول بتقول وبتوقع وفلول بطلع اشاعات، مكنتش مصدق!
كان بيتئلي ان دي كلها صدف واننا بنتخبط بعد ما كنا في ضلمه فتره طويله وطلعنا .. اثار الحبس يعني!
لكن انا صدقت موضوع الفلول ده لما شوفت التشرزم والغوغائيه في اطلاق الاراء وكل واحد محكم رأيه
قولت ايه في الاستفتاء؟ قولت لاء ولو اتعمل تاني هقول لاء، بس احترمت اللي قالوا اه وادام هم الاغلبيه يبقى خلاص يتنفذ اللي الاغلبيه قالوا عليه، برغم حاجات كتير وبرغم اني شايف ان الطريق الاقصر للأستقرار هو دستور جديد وده اللي كان منتظر يحصل لو الاغلبيه قالت لاء في الاستفتاء، لكن طالما اتقال اه يبقى نرضخ لرأي الاغلبيه، هي دي الديمقراطيه واللي اعرفه عنها؟

خصوصيتك وامانك على الانترنت في خطر!

بسم الله، السلام عليكم

تدوينة مطولة عن بعض اخطار عدم الخصوصيه فيها شوية شرح عن هجمات الـ DDos Attack وشوية نصايح علشان تعمل ارقام سريه قويه
تصنيف التدوينة: للمبتدئين

اخيرا رجعت للحاجه اللي بفهم فيها، الحمد لله ان الواحد اتخلص من همومه السياسيه والمشاكل النفساوية ورجع للحاجه اللي بيحبها
المهم، العنوان زي ما انتا شوفتوه صادم وانا قاصد انه يكون صادم!
خصوصيتك وامانك على الانترنت في خطر، ايوه حضرتك في خطر
اولا محدش يقولي انه مثلا انا بقالي سنه او عشرين سنه على النت، عمر ما حد اخترقني او اخترق خصوصيتي على النت
هقوله حضرتك غلطان، لان مفيش جهاز على وجه الكون دلؤتي مش مخطر بطريقه او بأخرى، واذا مكنش فيروسات هيبقى تروجان وغيره كتير.
الاخطراق الايام دي مبقاش اختراق لمجرد الهزار او اللعب والعبث زي ما بيقولوا، او حتى علشان يضرك ضرر شخصي!
الاختراق دلؤتي بقى اكبر واعم من كده
المشكله فعلا خطيره جدا ومحتاجه لحلول فوريه وجزريه .. ويمكن دلؤتي مفيش جهاز بيستخدم الانترنت من الـ 2 مليار جهاز مش عليهم انتي فيروس او مضاد للفيروسات
وبصراحه الناس مأصرش، مدينا اكتر من حل في كتير زي KasperSky - Avira - Nod32 وغيرهم ياما
بس مش هنا الامان والحمايه، اصل الامان هيبقى على ايه ولا على ايه!
انتا مفكرتش انك كل مره بتدخل فيها منتدى معين علشان تجيب حاجه او تشوف حاجهن ممكن تخترق!
وكل مره بتدخل فيها منتدى وبتسجل .. رقمك السري اللي سجلت بيه + اميلك بيكونوا في خطر!
انتا متعرفش ان في اسواق اسمها Emails Markets او اسواق الاميلات، وان اميلك ممكن يكون معرض انه يتباع وسط الاميلات اللي بالملايين كل يوم بتُتداول في الاسواق دي
خلينا نكون صرحا مع بعض، انتا كام مره استخدمت في الرقم السري في كذا حاجه مختلفه؟
رقمك السري هو هو اللي بتسجل دخول بيه لأميلك، اكونت الفيسبوك بتاعك، بعض المنتديات، ولو عندك موقع ممكن يكون بنفس الرقم السري برده
انتا متعرفش انك بشوية برامج بسيطه ممكن تقوي فرصك في النجاه من طوفان الاختراق؟
طيب خد الاصعب والاقوى، انتا متعرفش ان جهازك ممكن يقوم من وراك بعمليات ضرر كبيره؟
ازاي؟ هقول لحضرتك، في دلؤتي ثغره، او الله اعلم يمكن طريقه، اسمها خدمات الحرمان من الخدمات/DDos attack مقال كامل @ويكيبيديا عن هذا النوع من الهجمات، الهجمات دي تقدر تخلصها في جمله بسيطه بتقول
عدد اجهزه كبير= ضغط (على خادم الهدف/مستضيف الهدف) مما يؤدي إلى شلل الهدف -والهدف هنا غالبا ما بيكون موقع او سيرفر/خادم-
وطبعا كل ما ذات عدد الاجهزه، كل ما الضرر كان اكبر وتقدر تلخص شرح الطريقه بجمله بسيطة تانيه بتقول
كل خادم/سيرفر بيسمح بعدد من الطلبات اللي بتقدم له، والطلبات هنا "غالبا" بتكون من زائري الموقع وبتم كلأتي
انا مستخدم داخل ازور موقع @google بكتب في شريط العنوان اسم الموقع www.google.com وبدوس اذهب او انتر اي ماكان
جهازي هنا بيقوم باعت طلب للموقع بيقوله انا مسموح ليا ادخل؟ بيقوله ايوه اتفضل وادي بيانات الدخول، وبيبعت حاجه اسمها DNS، بيقوم الجهاز داخل وعامل داونلود لمحتوى الموقع وبيعرضه وطبعا كل ده بيتم بسرعه مش ببطئ زي ما انا بشرحه كده
زي ما قولنا، خادم/سيرفر بيسمح بعدد معين من الزوار، كل ما زات العدد كل ما كان تحميل الموقع ابطئ
هنا بقى مربط الفرس زي ما بيقولوا، انا لو مخترق وبتحكم في عدد 20 جهاز .. يعني انا مخترق 20 جهاز اقدر اتحكم فيهم واخليهم يعملوا اللي انا عاوزه
وعاوز اضر موقع example.com ( والموقع ده الخادم بتاعه محدود الامكانيات وسامح بعدد 10 طلبات/زائرين فقط)
هنا بقى لما اقوم انا مدي الامر للـ 20 جهاز اللي انا متحكم فيهم بالدخول في نفس الوقت على الموقع المستهدف، الخادم بتاع الموقع مبيقدرش يتعامل مع الطلبات الكتيره دي، فبتتشل حركته تماما وبيقف، لا بيتعامل مع الطلبات اللي انا كمخترق بعتها، ولا طلبات غيري
س:انا لو تم اختراقي، دوري هيكون ايه في الموضوع ده؟
حضرتك لو تم اختراقك دورك انك هتكون الجهاز رقم 20 في مجموعه المخترق الفلاني .. والمخترق ده وإن طالت المده ممكن يستخدم جهازك في عمل هجمات DDos Attack
س: (مسهجننا) طيب عادي منا هعرف ان الموقع بيفتح قدامي من غير ما اكون انا اللي فاتحته وبالتالي هعرف اني مخترق وهقفله!
هرد على حضرتك واقولك ان 90% من اصحاب الاجهزه اللي مخترقه وبتستخدم اجهزتهم في الهجمات دي مش بيعرفوا انهم تم اختراقهم لان ارسال الطلبات دي بيتم في الخفاء، يعني المخترق مش بيفتح صفحة نت او المتصفح بتاعك ويفتح الموقع اللي عاوز يشل حركته ويدوس انتر والكلام ده .. لالا ده بس بيدي اوردر بسيط للتروجان اللي في جهازك انه يطلب وبكميات كبيره مش طلب او اتنين، انه يدخل كأنه مستخدم عادي جدا على الموقع
شوف بقى انتا مثلا لما تكون في شبكه مع مخترقه مكونه من 1000 جهاز وكل جهاز بيطلع 100 طلب مثلا في الدقيقه يبقى اضرب 100×1000=100000 الف طلب .. ضاعف الرقم ده لو هم مجموعه مخترقين وكل مخترق معاه اجهزه اكبر شوف كميه الضرر
كلماتك السريه، انتا لسه مش سئلت نفسك وقولت في يوم .. انا ليه كل كلماتي السريه = كلمه واحده؟، انتا لسه مُصر تكسل وتنفض وتستسهل لحد ما يجي يوم تقول ياريت اللي جرا ماكان؟، مكسل يااخي في برامج، مواقع كتير موثوقه تقدر تحفظ عليها كلماتك السريه كلها في مكان واحد مشفره ومحدش يقدر يدخل يشوفها غير برقم سري انتا حاطه
ليه مثلا مفكرتش تعمل لكل حاجه، حاجه
يعني تصنف الخطر مثلا الاميلات خطر 1، كلمه سر لواحدها، .. اكونت الفيس بووك وتويتر والمواقع الاجتماعيه التانيه خطر 2، كلمة سر لواحدها، المنتديات والكلام الجميل ده، خطر 3، كلمة سر خاصه بيها، ده لأمانك الشخصي
لان جهازك ده شخصي، ممكن يكون عليه صور عيلتك، مراتك او اولادك او اخواتك .. تخيل مصيبه ان الحاجات دي تقع تحت ايد حد مبيخفش ربنا في عبيده، هيحصلك ايه؟
مش ممكن حاجه زي دي صوره لمراتك لاقدر الله او اختك او اي بنت تعرفها او تربطك بيها علاقه اسريه او غيره، تتكرب على جسم عريان بالفوتوشوب وتنزل المواقع كأنها بنت عربيه وفي المواقع الزفت والكلام ده؟حاجه من اتنينن يا تحمي نفسك واسرتك، يا تحمي اسرتك بس وبالتالي انتا مطلوب منك لو هتنفض يبقى تمسح كل الصور المهمه وخصوصا صور البنات والاطفال

ودول شوية افكار كويسه ممكن تستعين بيها وانتا بتعمل رقم سري لكل حاجه زي مثلا الاميلات
اميلك الياهو ممكن يكون yma1l@acu.^tx
اميلك الهوت ميل ممكن يكون: rak^^h0tM@i1
وممكن تخترع حاجات كتير لبقيت الارقام زي الفيس بووك وتويتر وغيره
لاحظ وانتا بتعمل رقمك السري انك تستخدم في نفس الرقم المكونات دي
الحروف الانجليزية الكبيره M والصغيره m

الرموز $ او ^ او غيرهم في كتير وبتعملهم بانك بتضغط زرار شفت Shift + الارقام اللي فوق في لوحة المفاتيح مش اللي على الجنب
الارقام العاديه: 2 8 9 6 إلخ
ابعد عن الكلمات المكونه من حروف متتابعه او مشهوره او معروفه زي مثلا كلمة mohamed او cool والحاجات دي بتتخمن بسرعه
او عن اي تواريخ ميلاد، او ارقام تليفونات
اخترع كلمة وحاول تكتبها باستخدام الحروف والرموز يعني مثلا لو حبيت تكتب رقم رسمي وفيه كلمة com ممكن يتكتب بالطريقه دي
c0^^ وهنا الـ ^^ = حرف الـ M والصفر 0 = حرف الـ O
متتخدعش ابدا في برامج زي برنامج سرقة الباس وورد، او برنامج سرقة اكونت الفيسبوك، لان مفيش برامج بتعمل كده، وصدقني لو حد معاه البرنامج ده مستحيل ينشره على النت :)، البرامج دي 99% منها برامج متلغمه وإن شاء الله هبقى اعمل تدوينة اشرح فيها شرح مطول شويه عن كلمة تلغيم للي مش عارفينها
والسلام عليكم

ايه حكاية السياسه معايا؟

بسم الله، السلام عليكم
انا مش فاهم نفسي بجد، كل ما اقول ياض ارجع لعلقك وسيبك من السياسه اللي مش جايبه همها، الاقي حوار حصل شغل دماغي
اخرهم كان حوار اتهام المجلس العسكري في بيان رسمي بحاجات عجيبه اتكلمت عنها في تدوينة @موقعة العباسية .. فخ المجلس العسكري، وبيني وبينكم انا حاسس ان كل حاجه ليها علاقه بالسياسه، بس انا نيتي مبقاش سياسي، بس المصيبه ان كل حاجه اليومين دول ليها علاقه بالسياسه!
ولو ضربنا امثله هنقول كتير، بس مش مجاله، انا بس نفسي افكني من الحوار ده، انا لسه صغير حتى مقفلتش الـ20 ربيعً -,- .. وبحاول اكون متفتح والسياسه دي هتجينا لورا، كل ما اقول لنفسي ياض ارجع لتصميم والشغل والحاجات اللي بتنفع الاقي السياسه نطة في نفوخي، بتنخرب كده زي السوس، كل ما تشيل سوسه تلاقي الف سوسه وسوسه .. انا اه لما فكرت افتح المدونة وابقى مدلون بقى -ونبي حلوه مدلون دي- ساعتها كان في نيتي اقول رأي كمشاهد للمشهد السياسي، بس مش كده يعني، ده انا من يوم ما فتحت المنتدى مش ورايا غير السياسه .. لا وبحضر لتفنيد وتدوينه كبيره عن مبارك .. حاسس ان انسب تعبير للي انا فيه ده مكون من تلت حروف حرفين متشابين يتوسطهم حرف الـ حه/حاء ^^
عموما التدوينة دي للتذكير اني هدي لنفسي فرصه ابعبر عن كل حاجه ومش ضروري استرس على السياسه يعني، خليني شوية اشارك معاكم كام تثميم عاجبني ولونها صعبه ;) وياريت محدش يفكر يسئل ليه، اتنيل اظبط شكل المدونة دي اللي حاسس ان شكلها يدي على مدونات العصور الوسطى .. عموما هنشوف ايه اللي جاي وربنا يستر على عبيده .. "وعبيد عبيده"

عريان الـ .. ويحب التأميز

بسم الله، السلام عليكم
راح امن الدولة .. وجه الامن الوطني ياسلام، ونبي تنفع مطلع اغنيه -,-
سيبنا من الاغاني، اولا دعوني ابرز مخاوفي ألا وهي "المخابرات العسكريه" اوبس سوري، جه سياديه، والمخوف التاني، هو الجيش ذات نفسه
اولا هطرح وجه نظري في الحوار ده واسباب الطرح وايه علاقته بمخاوفي
انا ضد محاكمة المدنيين قدام المحاكم العسكريه، او بمعنى اعم أني عاوز كل انسان يقف قدام قاضيه الطبيعي
بس انا مش مطاط زيهم، لا انا ضد المحاكم العسكريه إلى في حاله حيزاة السلاح باي شكل واي نوع والبلطجه وطبعا لازم يكون بالجرم المشهود، او "متلبس" علشان يقف قدام محكمه عسكريه
اسباب طرحي لرأي اني عارف اني لو اتقفشت .. هيطلع عيني ^^
علاقته ايه بالتدوينة؟ .. اممم اوكى شوف الصوره دي

اضغط على الصوره للمشاهدهبالحجم الطبيعي

اعتقد الصوره احسن من الف تعبير، ومثل عريان الـ .. ويحب التأميز ينطبق تماما على الـ .. الحدق يفهم
شكرا صفحة @وثائق امن الدولة| وثائق امن مبارك وعصابته على الفيس بووك

موقعة العباسية .. فخ المجلس العسكري

بسم الله، السلام عليكم
يتم الان التعدي من قبل مجموعه من البطاجليه المجهولين تبعيتهم، على المسيره المتجهه من ميدان التحرير إلى مقر المجلس الاعلى للقوات المسلحه بصفته الحاكم للبلاد
حيث استخدم المعدون على المسيره زجاجات وقنابل الملوتوف والسيوف والاسلحه البيضا حسبما جاء في قناة الجزيرة مباشر مصر

تحديث في تمام الساعه 9.07 مساءً يوم 23 يوليو 2011

شاهد عيان للجزيرة مباشر مصر: عدد المصابين تخطى الـ 100 مصاب معظمهم جروح قطعيه وردود وكسور خفيفه.
شاهد عيان للجزيرة مباشر مصر: تم استخدام الرصاص الحي والمطاطي من قبل البلطجيه في الاعتداء على المسيره

تحديث: في تمام الساعه 3.28 صباحاً يوم 24 يوليو  2011
بداية القصه: بعد ما افصح به المجلس الاعلى للقوات المسلحه الحاكم السياسي للبلاد عن اتهام صريح لحركة 6 ابريل احد الاضلع الرئيسية في اشعال شراره ثوره 25 يناير، بالعماله الاجنبيه وتقاضي المال من من مؤسسة Freedom House او بيت الحرية التابع لأحد رجال الاعمال اليهود ويدعى سويرس، اتفقت الحركة بحشد مظاهرة احتجاجيه والتجه بها للمجلس العسكري لتوصيل اعتراض صريح على هذه الاتهاماتن وكانت تحمل مطالب اخرى
فجأت المسيره بمن يعترض طريقها في منقطه العباسية حيث على بعد امتار مقر المجلس الاعلى للقوات المسلحه ونشبت معركه بين الطرفان غير معلومة الفاعل او المحرك الرئيسي فيها ادت إلى وقوع اعداد من المصابين وصل عددهم 143 حسب تصريح رسمي لوزارة الصحه نشرتة القناة الاولى، والفضائيه المصريه
يذكر ان المجلس الاعلى للقوات المسلحه قد نشر بيانه الصادر بتاريخ 22 يوليو 2011 ويحمل رقم 69 يتهم فيه بعض الحركات التي لم يذكر اسمها لكنه ذكر اسم حركة 6 ابريل بالعماله وتقاضي المال والتدريب على قلب نظام الحكم في صربيا
وفي تحريك للأحداث من قبل المجلس الاعلى للقوات المسلحه، قام بارسال "فيديو" مدة 9 دقايق حسب ماذكرة الاعلاميه منى الشاذلي في برنامج العاشره مساءً حيث يعرض بعض اللقطات من من وصنهم المجلس الاعلى للقوات المسلحه "صاحب الفيديو" باهالي منطقه العباسية يعترضون فيه على توجه مسيرة 6 ابريل للمجلس، حيث قال احدهم إن من يريد الذهاب للمجلس سوف نتصدى له ولو بالقوة وهو ما حدث بالفعل

لغز كبير اسمه محمد حسني مبارك

بسم الله، السلام عليكم
لو الحريه تباع وتشتري، كنت هتدفع فيها كام؟
طيب لو الحقيقه بتشتري، هل هتدفع فيها اكتر من تمن الحريه؟
السؤال ده جه في دماغي وانا بقرأ خبر في @اليوم السابع: عادل حمودة يكشف أكبر فضيحة مالية وعسكرية لمبارك بالمستندات بجريدة الفجر .. شيك بـ120 مليون دولار من الشيخ زايد لمبارك دفعة أولى ثمن دخول الجيش المصرى فى حرب الكويت!
في الوقت نفسه اللي "بتوع انا اسف يا مخلوع" هيموتوا نفسهم علشان مبارك
حد منكم ممكن يفكر ان قناعتي في انه خان مصر بطريقه او بأخرى بتتهز وهتنهار، هقوله لاء
انا مش بسئل هم مموتين نفسهم علشانه ليه، لاني في الغالب عارف ولو حبيت الخص في جملتين بتوع انا اسف يا مخلوع هقول
ان الناس دي منهم فرعين، اللي مش مصدق ومقتنع ان مبارك شريف وشمعته أيده ودول كتير
والقياده العليا بتاعت الحركة اللي معروف هم مين ونفسهم "تكية" ابوهم ترجع من جديد .. وده بعدهم
اللي محيرني بجد مش بتوع انا اسف يا مخلوع، اللي محيرني هو لغز كبير اسمه محمد حسني السيد مبارك وعلئته
الراجل ده كان بيعمل في مصر كده ليه؟، كان بيعمل فينا كشعب كده ليه؟ طيب لو سرق هو مكنش عنده اللي يكفي ومكنش عارف ومتاكد ومخطط ان ابنه يمسك وبالتالي هيفضل هو الرئيس الفعلي للبلد، وهيفضل في النعيم اللي هو فيه وهي هي نفس المواكب وحركات رؤساء الجمهوريه دول؟
بلاش، بتوع انا اسف يا مخلوع، الفئه اللي مصدقه ان مبارك شمعتة أيده وشريفه شريفه، مش شايفين اللي بيطلع كل يوم من فضايحه؟
انا عن نفسي فضولي ممكن يدفعي اني ادفع عمري كله إلا 3 ايام اعرف فيها لغز محمد حسني السيد مبارك

خطة مبارك للهروب على لسان عمر عفيفي

بسم الله الرحمن الرحيم .. السلام عليكم ورحمة الله، اقسم بالله ان اقول الحقيقه ولا شئ غير الحقيقه التي اعرفها
انا قصدت اني احلف لاني عارف ان في كتير مش هيصدقوني لكن الامر لله، اثناء تصفح للنت ودعبستي على حاجه مش مهم ذكرها دلؤتي وجدت مدونه @سيناء حيث انا واثناء تصفحي للمدونة وجدت الاتي

وصلنا حالا من مصادرنا بالقاهرة ومن احد المصادر الموثوق بها بمكان سيادي حساس
ان الأيام القادمه سيتم عمليه وهميه تستهدف مستشفي شرم الشيخ بالهاون والحريق والتدمير الجزئي للمستشفي سيعلن بعدها وفاة مبارك وسوزان الغير موجودان في مصر حاليا
وسيتم ألصاق التهمه للشرفاء من عرب سيناء والقبض عليهم
وعندما تطرقوا في الاجتماع للخسائر البشريه كان الرد من أحد قادة المؤسسات السياديه غريب جدا
معلش مهم حيموتوا من أجل استقرار الوطن والنظام
هذا كل ما وصلنا وليس لدينا اي معلومات أخري عمن سيقوم بالتنفيذ أو موعد التنفيذ
ولكن نحذر من هذا السيناريو الخطير الذي تم نقاشه الساعه 11 مساءا واستمر الأجتماع لمدة ساعتين ونصف وشارك فيه قيادات سابقه بجهاز امن الدوله
وكان ما نشرته الصحف الأسرائيليه عن عدم سيطرة مصر علي سيناء وتواجد 400 فرد من تنظيم القاعده بسيناء تمهيد لتلك العملية القذرة التي تم الأعداد لها في تل ابيب وستتم بتنفيذ حقير من عملائهم والمتعاملين معهم بذلك الجهاز السيادي تحت مايسمي التعاون الدولي لمكافحة الأرهاب
ونحذر بدو سيناء من أهلنا الأبطال مما يحاك لهم من خطط حقيره للأساءة لسمعتهم والتضحية بهم
والله أعلم
العقيد عمر

منقول حرفيا من مدونة @سيناء حيث انا من تدوينة  سيناء ومبارك وسيناريو عمر عفيفي !!!

لو الكلام ده حصل يبقى احنا شربنا اكبر مقلب في تاريخ مصر وشعبها يمكن من ايام الفراعنه من 7 الاف سنة!
لو الكلام ده حصل يبقى لا كانت ثوره ولا كان اقلاب، ده احنا "كنا بنهزر معاك ياريس"
لو الكلام ده حصل يبقى دمك ياشهيد راح هدر، يبقى لا تشفع لنا يا شهيد يوم نحتاج الشفاعه
لو الكلام ده حصل يبقى حسبي الله ونعم الوكيل

اصطبحنا واصطبح الملك لله

بسم الله والسلام عليكم
احب اهني نفسي اولا، ثم ادارة موقع جوجل وبلوجر ثانيا، على اني اخيرا قررت ادي لنفسي فرصه التعبير عن رائي الحبيس
واحب اهني ادارة الجوجل اللي بلوجر تباعهم، اني اخترت بلوجر بعد تفكير عميق وعروض احترافيه في اماكن تانيه
واحب اهني شعب مصر واقولهم مبروك عليكوا انا


اعرفكم بنفسي، محمد سمير، إنسان كائن اعيش ويتعايش -,- انا مش بجامل نفسي ولا بتكبر عليكم دي الصراحه بجد
وصلت الدنيا يوم 16/6 ومش هقول سنة كام لاني نجم وليا اعداء وليا فلوس في السوق
بدخل نت من ايام الموس ابو بلية تحت العجيب ده ووندوز 98 ومحدش يسئلني هم ليه سموه 98
وبقول عليا مثقف ومبحبش الفشار
بشجع الاسماعيلي وبشرب كوفي ميكس "مشروب الاغنيه الايام دي بعد الكاباتشينو"
حلمي وحلم حياتي عربية كروز شيفرلية موديل السنه اللي هتعطف على المعرض فيها واشتريها منه
اسعى وراء المال :D ولتاني مره هقول اني بتكلم بجد
ليا اعداء كتير من ضمنهم واهمهم وعلى رأسهم الصراصير، برايص لاء، فران ايزي، حشرات طائره وزاحفه مفيش مشكله
وقتي مش ملكي، لانه ملك وناشونال جيوجرافيك، وناشونال جيوجرافيك ابوظبي وادفينشر، الجزيره الوثائقيه ولما عرفوا اني مهتم للدرجادي بالقنوات الوثائقيه قرروا يطلقوا علشاني قناة النيل الوثائقيه
واضح من اسمي ان مسلم، برغم ان ابويا مشككني شويه :)
اتعاول ولا اعول "واتعاول فعل عوالة وتعني خالي شغل" وللبنات ريحوا نفسكوا، انا خالي شغل اه بس مش خالي القلب
متمدد ريفي لكن متمدن، زي القرع أمد لبره من على طول
مدمن افلام انجلش وشاي ولب وكوكا اكشن وMBC اكشن برده
لغتي الام هي الانجليزية وده واضح من كلامي فوق
اموت في القرش والقرش الابيض ينفع في المحيط الاسود والحاجات دي، اه انا قولت دي فوق معلش ولامؤخذه
كفايا عليكوا كده علشان يابخت من دون وخفف يعني ولو حابب تسبلي فلوس ولا حاجه قصدي كومنت تقدر تحطه كومنت براحتك بقى بس انا هقفل الكومنتات في التدوينه دي