رسالتي لكل شاب وكل فتاة

بسم الله الرحمن الرحيم، رسالتي لكل شاب وكل فتاه ان المدونة لاتزال تحت الانشاء والتطوير والتعمير، تدوينات قليله انا عارف، ومش مهم لاني مش هدفي الاول اني اكون مدون وياااه واوفر والكلام ده، انا بكتب اللي انا حاسس اني حابب اشاركه مع الناس، وده غالبا مابيحصلش كتير، الصبر مفتاح الفرج ولو صبرت عليا سنه ولا تلاته كده .. احتمال تلاقي المدونة شكلها يعجبك!

الثلاثاء، 29 يناير، 2013

الخمر الحرام


بسم الله، السلام عليكم
ورايا شغل وقاعد بكتب اهو، مبسوطين :@ ؟

هو العنوان غريب شويه :)؟ وهزود على العنوان ده كمان، جزء بسيط (ما انا لازم اخترع العجله :@).. مش فاهم، صح؟، ركز معايا!

وانا على الفيس بوك لقيت لقيت بوست شكله شيك، من البوستات بتاعت الناس ولاد الناس المستحميين دول (ده البوست)-انصحك تقراه علشان تفهم كلامي كويس!
قيس على القاعده اللي جايا دي، تقريبا كل حاجه في حياتك بعيدا عن النهي المباشر، او الأمر المباشر من المولى عز وجل
عن أبي سعيد سعد بن سنان الخدري رضي الله عنه : أن رسول الله صلى الله عليه وسلم قال : ( لا ضرر ولا ضرار ) ، حديث حسن رواه ابن ماجة والدارقطني وغيرهما مسندا ، ورواه مالك في الموطأ مرسلا : عن عمرو بن يحيى عن أبيه عن النبي صلى الله عليه وسلم ، فأسقط أبا سعيد ، وله طرق يقوي بعضها بعضا .
وطبعا اللي اتكتب في هذا الحديث الموجز والبسط والصغير جدا، كثير ولا يعد ولا يحصى، بس اختصارا ان القاعده دي تتوافر شروط لتطبيقها، اولا انها لا تطبق على الاحكام، امر ونهي، وثانيها لا تطبق على عقوبات، وانا مش قاري اوي في شروط تطبيق قاعدة الحديث لكن ماعلينا ندخل في صلب الموضوع

اول حاجه، الخمر الحرام، والخمر حكمه معروف، حرام يعني حرام!، ليه؟ علشان مُسكر، يعني مذهب للعقل، يعني ببساطه اللي بيشربه بيبقى مغيب!، طيب الحكم ايه في "الخمر" الغير مسكر!
تعالوا الاول نبص للخمر ذات نفسه، في نوعين منه، نوع طبيعي وده بيخمر بالعتيق، والنوع التاني كميائي او مقطر، والاتنين خمر ومسكر طبعا

هتكلم عن النوع الكميائي الاول، هي الحرمانيه في عملية التقطير، او المادة المقطره؟ او المنتج اللي هو الخمر؟، كل الاذكيا هتقولي الحرامينه في المنتج المسكر اللي هو الخمر نفسه، النتاج عن عملية التقطير، ولو كان التقطيع حرام، او منتج التقطير حرام، مكنش تقطير البترول "حلال" ^_^
طيب افرض انا جيت قولتلك انا "هقطرلك" خمر، غير مسكر!، ونسبة الكحول (علميا الإيثانول) فيه =0% لكل ملي جرام، يبقى حرام ولا حلال؟

النوع التاني، اللي هو الخمر المعتق وده للي ميعرفهوش، انه بيتم صناعته او تكوينه بانه المنتج المراد استخراج النبيت منه يتساب فتره طويله علشان يتخمر او يأيض الكربوهيدرات في حالة انعدام الأكسجين بمساعدة الخمائر الطبيعيه، علشان يولد الإيثانول سواء للإستخراج وده بيتم عن طريق التقطير لإستخراج الايثانول النقي "تقريبا" او بيتساب في المنتج اللي هو بيصبح خامر او مخمر واختصارا اسم العملية دي زراع الخمائر، او التخمير، او زراعه الخمر، وطبعا في مواد كتير لو تم تخميرها تنتج خمر
طيب تعرفوا ان العيش البلدي بيتساب فتره من الوقت لحد ما يختمر!!!!!!!
وتقريبا معظم المعجنات بيتحط فيها مواد مُخمِره "بتخمر يعني" زي "الخميره البيرة" علشان تختمر فتره قبل ما يتم تسويتها، هل ده معناه ان العيش ده حرام!
طيب ايه رأيك لو قولتلك، ياسيدي انا هزرعلك خمره، يعني هخمر نبيت، وهفصل الايثانول منه "ودي الماده المسكره في معظم المواد المسكرة في اغلب الخمور عموماا"، هااا، هيبقى حرام ولا حلال؟

احاديث النبي عن ان الدين يسر، ويسروا ولا تعسروا لم تكن للتباهي، الرحمن ليست صفة من صفات الله ليتباها بها، والجنه فيها خمر لذة للشاربين، تفتكر خمر الجنه مسكر؟ :)

كل الاحكام سواء بالامر او بالنهي لها سبب، منفعه او ضاره، المنفعه اعتقد انها لن تحقق إلا بالتباع الامر، والضرر لن يتجنب إلا بالتباع النهي!
العبره في الذكاء مش ان فلوسك تنقص، العبره في الذكاه ان اللي معاه يدي للي ممعهوش، فالتوازن او العدالة الاجتماعية تتحقق، زمان كانت زكاة المال والدهب، دلوقتي ممكن تزكي بهدوم ويبقى اسمه زكاة، تزكي بانك تتكفل بشراء مستلزمات غرفه في مستشفى خيري، زي 57357 ومؤسسة دكتور مجدي يعقوب لعلاج القلب بالمجان وبنك الطعام المصري وبنك الدواء، والاؤرمان، ومصر الخير، ورسالة، غيرررررهم، كل دي زكاة، بتأدي فرضك، بس مش زي الاوليين ما ادوه، مش فلوس!، لان وعلى رأي الاعلان، ممكن تدي فلوس وتروح، لكن الخدمه الحقيقية بتدوم

العبره في الصلاه مش تحجيمك او سجنك 5 مرات في اليوم، هي هدفها نفسي ومعنوي وروحاني واهدفها وفوائدها اكتر مني اني اعدها واحصيها في تدوينة واحده
والعبره في البعد عن الخمور او تجنب اذهاب العقل، لان ساعتها الانسان بيكون "مغيب" لا يعي ما يفعله، لان حرفيا الخمور والمخدرات وغيرها من مذهبات العقل، بتأثر على مناطق الوعي والادراك والسعاده والحزن والتفكير في المخ، زي ما حرفيا بتأثر على منطقة الذاكرة في المخ، وزي ما حرفيا بتأثر على معظم مناطق جسمك زي عضلاتك واعصابك

كلمتين الحب بين الواد وخطيبته، مش حرام! طالما في حدود، الانسان برغم جبروته وقوته إلا انه اضعف المخلوقات واشدها تأثراً، بس انتا اقتل فرخه قدام طفل خجول قادره على تحويله لطفل همجي او عدواني ويمكن جبان في دقايق هي ما تبقى للفرخه دي اثناء لفظها انفسها الاخيره وخروج روحها من جسدها، بس انتا اضرب عيل بالقلم كل يوم وده اكتر من كافي علشان تطلعه إما اشد الناس جبنا، او عدوانا، بس انتا امنع بنت او ولد غير اسوياء بدرجة بسيطه عن العاطفة طول فتره خطوبته او كتب كتابة وهو يا هيحصلة تبلد طول حياته، يا هيحصله توحش طول حياته!

مره قريت بوست وحابب اشاركه معاكم وانا فخور ومبسوط بيه والبوست مش من كتابتي ومش على لساني
قابلت صديق قديم ووجدت لحيته قد طالت، فقلت له خيرا بقيت إخواني ؟
فقال لي : بل سلفي أطيلها تقليدا للسلف الصالح.
قلت : وما شكل السلف الصالح قبل أن يكون صالحا أي طالحا أي مشركا ؟
وبنظرة ثاقبة نحوي قال : ماذا تقصد؟
قلت : ما أقصده أن السلف الصالح قبل أن يكون صالح كان يربي اللحي ؟
قال : نعم
قلت : ويلبس الجلباب ؟
قال : نعم
قلت : وينتعل النعال ؟
قال : نعم
قلت : إذا كان الشكل لم يتغير من مشرك إلى سلف صالح فما الجديد في الشكل لنقلده ؟!

السبت، 26 يناير، 2013

الطريق إلى يوطوبيا .. استاذ بكره

بسم الله الرحمن الرحيم

انا انسان تافه!، بيحلم بالمدينة الفاضلة
بداية الكلام برمي السلام، يوطوبيا هي هدفي، الرخاء على الارض!، الرخاء غير المجرد من المسؤلية، النعيم غير المنعم، الراحه غير المتواكله، يوطوبيا بتاعتي فيها شغل، فيها عدل اساس كل شئ، عادل وليس مساواه!

لو كنت رئيس!
حلمت مره اني ابقى رئيس، وكانت اول قرارتي اني اشيل كرسي الحكم واستبدلة بكرسي خشب، من غير ما الشعب يعرف علشان المنصب يظل ذو مهابه، بس اكتشفت حاجتين مهمين.
ألاولى: ان المهابة مش بشكل الكرسي، او رأس الدولة!
وان الاحساس بمعاناة الناس مش هيولدة كرسي خشب مش مريح في القاعده
قعدت افكر احول مصر بتاعتي .. يوطوبيا ازاي، وابدأ بايه؟
اقتصاد، بيئه؟، سياسه، معارضه، ابدء بالفقرا، بكرامة الناس، هخلي الدولة اقوى، هبدء بالداخلية، ولا ابدء بالأمن الداخلي؟، ابدء بالخلاق؟ ولا بالدين؟، اكتشفت اني لازم ابدأ (بالتعليم).
اول قرار ليا في حكمي، هو دعوة "جميع" العاملين بوزارة التربية والتعليم، من اصغر فراش تم تعينه قبل الاجتماع بيوم، لوزير التعليم
مش هكتب خطاب، انا هقف اتكلم نص ساعه بس

اخوتي واخواتي، حملة العلم وراية، السلام عليكم ورحمة الله وبركاته

يمكن موقعي او منصبي كرئيس جمهورية بيفرض عليا اني اتكلم بشكل معين، واتصرف بشكل معين، لكن مين قالكوا اني وسطكم بصفتي رئيس جمهوريه؟، مين قال انكم موجودين هنا بصفة حملة راية العلم في مصر
اخواتي واخواتي الاعزاء، انا عارف ان العيشه صعبه عليكوا، يمكن من اول يوم حكمي للبلد مبقتش حاسس بالمعناة دي، لان المنصب ده هو اعلى منصب في الدولة، وله حسابات معينه في تأمين شاغله وحراسته، والحرص على اخراجه باحسن صورة، لانه ممثل الدولة الاول، انا بعتذر عن ده واوعدكم، ان في اوقات فراغي لما أأدي واجبي اليومي تجاه الوطن، ارجع محمد سمير المواطن العادي، اللي بيعاني وبيفكر في بكره، بيفكر يأمن دخل علشان يعيش اسرته عيشه كريمه، علشان أأمن لأولادي التلاته مستقبل كويس!

الاطفال هم بكره، انا بفكر في ولادي على انهم بكره بتاعهم، ويمكن بتاعي!، وانا بقعد اذاكر لهم كل يوم، بفكر واقول لنفسي، لو قولتلهم معلومه غلط وكانت سبب في تكوين جزء من شخصيتهم، كمان 15 20 سنه، كبر الجزء ده وكان مكون رئيسي في شخصيتهم، بس اتكون غلط، مش هكون انا اللي مسؤل
ابني بيروح مدرسة كويسه وازعم انه هيبتدوا من بكره او بداوا فعلا، يعملوه معاملة خاصه، بس وبصفتي رئيس الدولة ورئيس الجهاز التنفيذي فيها، بقول للي هيعامل اولادي معاملة خاصه علشان هم اولاد رئيس، بقول لهم، لو عرفتكوا، هعاقبكوا بالقانون، وهستخدم وبصفتي رئيس الجهاز التنفيذي في الدولة هستخدم حقي في تحريك دعوى قضائيه مستندا إلى قانون التميز وهسعى لفصلكم فصل نهائي عن وظايفكم.
لكن مش هنا بيت القصيد، اللي حابب اتكلم معاكوا فيه، واستسمحكم انكوا تستحملوا عدم مقدرتي على الايجاز، هو بكره اللي بين ادينا
بكره اللي بيعلب دلؤتي، او نايم او بيذاكر، او بيتفرج على قنوات الكارتون، بكره لو مكنش كويس النهارده، مش هيبقى كويس!
اول ما استلمت مهام وظفتي، قالولي ان جهاز المخابرات بفروعه، اكثر الاجهزه حساسيه في الدولة، بيسموه جهه سياديه!
النهارده وانا بين اديكم بأعلن وزارة التربية والتعليم جهة سياديه، وانها اكثر حساسيه من جميع اجهزه الدولة!

لو سمحتوا يا جماعه، انا هسكت 3 دقائق بس وهطلب منكم تتخيلوا اولادكم وهم متعورين لاقدر الله، جرح في الوجهه وتمت خياطته، والولد بخير الحمد لله، لكن هيفضل في وشه علامه طول عمره، اتخيلوا اولادكم بعد 20 سنه هيكون شكلهم عامل ازاي!
هستأذنكم تتخيلوا كمان مره، لو اولادكم في ضربهم مدرس زميل لكم في الفصل بصورة شبه اسبوعيه، هتكون شخصيتهم شكلها ازاي بعد 20 سنه؟
رجال مشوهين، بكره مشوه، بكره اضرب وهو صغير في المدرسه، وطلع عنيف، بيداري خوفه بعنفه!، تخيلوا اطفال بدون قدوة، والمعلم هو خير قدوة.
هطلب منكم تتذكروا كام مره انضربتوا وانتوا صغيرين في المدرسه او في البيت او في اي مكان وده اثر عليكم ازاي دلؤتي، وازاي مبقاش عندكم قدرة على الاحتمال، عاوزين بكره بتاعنا يكون كده؟، يكون زينا!
عاوزين اولادنا ابني وابنك يطلع جاهل برغم حصولة على شهاده، خلاص بنعلمهم ليه وبنصرف عليهم دم قلبنا ليه؟، بلاش يتعلموا طالما هيطلعوا جهله في الاخر
التعليم مش شرح دروس وحفظها وواجب في البيت وصحيان الصبح ونوم بدري!
التعليم ان الطفل، ابني وابنك وبنتي وبنتك، يلاقوا قدوه، يحبوا!، يحبوا المدرسه، والمدرس والمدرسّة، يحبوا زمايلهم واصدقائهم، التعليم هو تنشئة الطفل على الحاجات اللي هتفيده بكره، مش انه يتعلم 1+1=2 لاء، ده بس مش هيفيده، مش هستفاد بشاب حافظ كتب القانون عن ظهر قلب، لو مكنش عارف روح القانون، مش هتسفاد بهذا الشاب لو مكنش متشبع بالعدل

اللي بنعمله اننا بنحفظ اطفالنا، نظرية حافظ مش فاهم، حافظ اننا انتصرنا يوم 6 اكتوبر سنة 1973، بس مش فاهم ليه وازاي انتصرنا، مش حابب انتصرنا لانه مش عارف احنا كان لازم ننتصر ليه، ببساطه، احنا بنحفظ اطفالنا مش بنفهمهم! وإن فهمناهم، بنفهم في بيئه وجو لا يساعدوا على الفهم، فصول فيها 50 و 80 طالب احيانا، وهي قدرتها الاستيعابيه 30 طالب بس
مدرس كل همه اليوم يعدي علشان بكره يعدي علشان بعده يعدي علشان يجي اخر الشهر ويقبض مرتبه
كل همه انه يحفظ العيال المقرر علشان لو موجه دخل وسئلهم يجابوا علشان يبقى عمل اللي عليه! ومش هو ده اللي عليه
موجه كل همه انه يلاقي اكبر عدد من الاطفال اللي مش فاهمه علشان يحمل المسؤلية للمدرس ويبقى هو مكتشف المدرسين اللي مش بيعملوا اللي عليهم، وبكده يبقى عمل اللي عليه ومش هو ده اللي عليه
مدير مدرسة كل همه ان المدرسة تبقى ماشيه زي الساعه، بالكدب بقى بالغش، بالضرب، بالحرق، المهم تمشي زي الساعه، علشان الادارة التعليمية متحرموش من منصبه!
مدرسة متخانقه مع جوزها وجايا قرفانه ومش طايقه اطفال صغيرين لسه مش عارفين 1+1= كام، علشان يعرفوا الغلط من الصح، متعرفش ان هي وسيلتهم الوحيده علشان يعرفوا الغلط من الصح!
اتقوا الله في الاطفال يا مدرسين مصر، زي ما بتعامل ابن غيرك في المدرسة، ابنك انتا ممكن يكون بيتعامل نفس المعاملة في مدرسة تانيه، وإن كان ليك زمايل هناك بيجاملوك في ابنك، فاعرف انك مش هتفضل موجود جنبه العمر كله، اعرف ان حق طالب ممكن يكون راح بسبب ابنك اللي اهتم به المدرس لمجرد انه ابن زميله، ومهتمش بطالب تاني متفوق اكتر منه، حرمت مستحق علشان ابنك النهارده، تفتكر بكره لو ابنك له حق في حاجه، هيعرف ياخدها؟
تفتكر اللي اخد حق مش حقه ده، هيطلع انسان سوي، عااااادل!!!، هطلع ابنك انسان عادل؟، صالح!، يفيد نفسه واسرتك واسرته قبل مجتمعه؟!، ولا هيطلع انسان اناني زي ما انتا انسان اناني لانك اتربيت تربية غلط وكنت اداة في ايد مدرس زميل والدك بيجامله فيك؟!

ابنوا معايا بكره، ابني مصر لو سمحت ايها المعلم، انتوا مش امل مصر، انتوا مصر!، اتقي الله في ولادك في الفصل!، افصل نفسك تماما لما تدخل فصلك عن اي حاجه في الدنيا، وركز في انك توصل المعلومة الصحيحه والمؤكده لابنك، وانسى زميلك اللي متخانق معاه ومديرك اللي خاصم منك، اعمل خير لله، تعليمك في طلابك حسنه جارية ليك، لو هتموت فقير مال، هتبعث غني بيهم، لو مالك لم ينفع اولادك علشان قليل، عمل الخير في اولاد غيرك هو ده اللي هينفعهم، ربي اطفالك على العدل والخير والحب اللي بتديه لاطفال غيرك، هيطلعوا هم كمان متشبعين بالعدل والخير والحب حتى لو كلامي ده مأثرش في زميل لك ولم يتقي الله في ابنك في التعليم
لكن على الاقل، مش هتبقى خسرتهم كل حاجه، خسروا التعليم، بس شافوا والدهم وهو قدوة لجيل كامل، مدرسة اخرجت علماء واطباء ومحامين ومهندسين وعمال بيشهدوا ان والدهم صاحب فضل عليهم، وهم كمان هيعملوا الخير من بعدك علشان عاوزين يبقوا زيك، يعملوا الخير للناس بغض النظر الخير ده هيعود عليهم بايه!
انشروا رساله الخير دي بين كل البشر، قول لزوجتك تهتم بالاولاد من النهارده في تعليمهم وزراعه الخير والحب والعدل فيهم، علشان لما نموت كلنا نموت واحنا سابين شجر مثمر، بيعود بالخير على الاجيال اللي بعده، والجيل اللي بعده هياخد خير جيل ابنائك ويصدرها للجيل اللي بعده، نحن صناع تاريخ، ومهما كان دورك صغيرك، وعملت خير او شر صغير، صدقني مع الوقت واثناء انتظارك للقاء المولى عز وجل، هيكبر وهتبان ثماره سواء ثمار الخير او الشر!
ده مش كلام خطب وشعارات، ده كلام مسؤل شاف البلد دي من فوق، الكلام ده مكنتش محضره، الكلام ده مقعدتش اكتب فيه ساعات وامسح وازوق في الجمل، واوزن الجمل قبل ما اكتبها، مفيش مساعدين ليا ساعدوني، ولا مصححين لغه صححهولي، الكلام ده خارج من قلبي وضميري، لقلبكم وضمايركم، صناع التاريخ، اتقنوا صناعته ارجوكم، وسيذكر التاريخ كل منكم بطريقه او باخرى بما صنعت ايديه