رسالتي لكل شاب وكل فتاة

بسم الله الرحمن الرحيم، رسالتي لكل شاب وكل فتاه ان المدونة لاتزال تحت الانشاء والتطوير والتعمير، تدوينات قليله انا عارف، ومش مهم لاني مش هدفي الاول اني اكون مدون وياااه واوفر والكلام ده، انا بكتب اللي انا حاسس اني حابب اشاركه مع الناس، وده غالبا مابيحصلش كتير، الصبر مفتاح الفرج ولو صبرت عليا سنه ولا تلاته كده .. احتمال تلاقي المدونة شكلها يعجبك!

السبت، 31 أغسطس، 2013

إنتبهْ مِن فضْلِك ألثوّرة ترْجع إلى الخلف - 30/6 تصحيح ثوري :)


تصحيح مسار

بسم الله الرحمن الرحيم الرحيم
السلام عليكم ورحمة الله وبركاته


لكل اللي ميعرفنش، أنا محمد سمير، موليد سنة 1992، تحديدا 16/6، انا اللي كان عمري 19 سنه في ثوره 25/يناير 2011 وانا اللي عملت كل اللي اقدر عليه، علشان انزل الناس، وانا اللي شتمت واتشمت بسبب ثورة يناير، من عيال مبارك وغيرهم من اللي كانوا مصدقين، موهومين، مقتنعين ان مصر مبارك، كانت جنه!، بس الحقيقه انها لا كانت مصر، ولا ينفع تبقى مصر مبارك، مصر هتفضل مصر .. وبس.


نفس الشخص اللي شارك في ثورة 25/يناير 2011 هو نفس الشخص اللي مش اخوان، واللي بيكرهم، هو نفسه اللي مرضاش يعصر ليمون لما جه وقت العصر، وقاطع، وهو نفس الشخص اللي اتمرد لما حان وقت التمرد، علشان مصر كانت بتتحول واحده واحده من مصر وبس، إلى مصر الاخوان.

انا من اصحاب ثورة يناير، مش اللي كان قاعد ع الكنبه بيأزأز لب وبيستنى يشوف مين هيفوز علشان يرفع رجليه ويصقفله، انا من اللي شارك في 25 يناير، مش من اللي نزل في مصطفى محمود يقوله احنا اسفين يا ريس، انا من اصحاب ثورة 25 يناير مش من اللي ركبوا عليها بعد ما نجحت.

وانا نفس الشخص اللي اخوه كان بيتعالج عند دكتور "محب" واحتمال يكون "عامل" ومعرفتش غير يوم ما كان بيعمل عمليه في مستشفى اخواني وكنت بشتم فيهم في قلب مستشفاهم، وانا طالع ونازل كنت اشوف صوره مرسي في الرسبشن اتحسبن عليه قدام موظفين الرسبشن كلهم، وانا نفس الشخص اللي مرضاش يشرب بق ميه من المستشفى ونزلت اشتريت ميه من فلوسي.

انا نفس الشخص اللي قعد يضحك ويضحك معاه كتير من اللي كانوا في المستشفى على كتاب انجازات مرسي اللي لقيته بالصدفه في الاوضة اللي بات اخويا فيها ليلة الوحيده في المستشفى.

يبقى انا لما اقول على 30/6 2013 تصحيح ثوري، تبقى تصحيح ثوري، لاني وقت ما جات تمرد اتمردت، ومبخلتش على تمرد زي ما انا مبخلتش على يناير، كان اخويا في المستشفى بيعمل عمليه "خفيفه الحمد لله ونجحت" وانا بجري عليه، كنت بقنع الناس في كل مكان اقابلهم بانهم يمضوا على استمارات تمرد وينزلوا يوم 30/6.

--

يوم ما وافقنا ان الاخوان وبقية "المتأسلمين" يدخلوا وسيطنا في الميدان -بحجة حمايه شباب الجماعه لينا- (ايوه انا كنت مصدق كده في الاول، ماهم كانوا لازم يقوموا بدور بردو!) وافقنا اننا نسمح لاي حد غير ثوري انه يكون وسطنا، وايوه انا عندي تصنيف عنصري بحت، في انسان ثوري، وإنسان غير ثوري!!!!
زي ما في تصنيفات عنصريه تانيه كتيره، في نساء وفي رجال، في شباب وفيه شيوخ، فيه ابيض وفي اسود، وجود هذه النوعيات هو امر محتوم، ولما اجي اتكلم عن هذه النوعيات لازم اسميها بإسمها، لا يعني عنصريه، لكن انا قولت اني عنصري علشان اريح اي حد هيفكر يقول عليا عنصري، لو كانت تصنيفات ثوري وغير ثوري هي تصنيفات عنصريه، نعم انا عنصري، لكني لم اتعمد ان اكون عنصري، انا بس بوصفات التصينفات دي في المجتمع المصري!!!!!!

ثوار 25/يناير، نزلوا يوم 30/6؟ المفاجئه، ان لو ثوار 25/يناير مكنوش نزلوا يوم 30/6، مكنش هيبقى في يوم 30/6 اصلا!
30/6 هي بمباركه ثوريه من ثوار 25/يناير
وايييوه، كان وسطنا فلول، بس معلش معلش، كان في يوم من الايام وسطنا اخوان :)
هي الثورات كده، لازم في طرف مبيحلقهاش غير لما تخلص علشان يركبها :)
بس المرادي الفلول مش هتركب، لان الثوره كانت اصلا على اللي هم فلولهم!

بس كده

الثلاثاء، 27 أغسطس، 2013

التوبة مقبولة إلا في وقت الحرب / دينا الوديدي - دين الجدعنه

بسم الله، السلام عليكم

 دينا الودادي - دين الجدعنه
كلمات: مصطفى ابراهيم - جرجس شكري
 
--
أدين بدين الجدعنه وبدين رفاق الدرب
وبقولة إحنا مش أنا في المعمعه والضرب
وبدين ما كنت مصدقهُ في المعركه الاولى
وبدين جثث في المشرحه، أسميها مجهوله

زينوا جسمه باللى عندنا ماحنا سبايا وراحوا أهالينا
زينوا جسمه باللى سابوه خربوا بلادنا و الطفل قتلوه

وادين مّن ساب على الأسفلت اخواته مقتوله
واقوله التوبه مقبوله إلا في وقت الحرب

الأربعاء، 21 أغسطس، 2013

انا اللي داس Restart

كله معايا؟ .. يلا يلا ..

بسم الله، السلام عليكم
القصه بدات كده


كان ياما كان،
كان في شعب مخنوق من طاغوت مفتري، اسمه ايه يا حلوين؟ .. محـمـد حـسني مبــارك، قام الشعب لما جاب اخره، نزله في الشوارع علشان يمشيه، وقد كان
ومشي الطاغوت مــبــارك الملعون..

كان في شعب مخنوق من طاغوت مفتري، اسمه ايه يا حلوين؟ .. حكم المجلس العسكري، قام الشعب لما جاب اخره، نزله في الشوارع علشان يمشيه، وقد كان
ومشي الطاغوت العسكري المعلون..

كان في شعب مخنوق من رئــيـس اهـــبـل، اسمه ايه يا حلوين؟ .. محمـد مرسـي العـيـاط، قام الشعب لما جاب اخره، نزله في الشوارع علشان يمشيه، وقد كان
ومـشي الاهبل محمد مرسي العياط..

كان في شعب مخنوق من ...

--
عارفة سواد العسل اهو ده اللى حالك ليه وصل
ازاى قوليلى مكملة وكل ده فيكى حصل

يا بلد معاندة نفسها يا كل حاجة وعكسها
ازاى وانا صبرى انتهى لسه بشوف فيكى امل

الاثنين، 19 أغسطس، 2013

كده هنلوث تراب مصر بدم الغزو

بسم الله


احنا لا سوريين بنهاجر، ولا ليبيين بنهرب من الحروب، احنا مصريين يا كلاب، مصرين طول عمرهم معروفين بجدعنتهم، بالعدوان الثلاثي واكتوبر 73 وحرب الاستنزاف والتاريخ فيه مئات المعارك والحروب اللي سطرت اسم مصر والمصريين والجيش المصري بحروف من نور على قائمه الدول التي لا يمكن اختراقها ولا هزيمه شعبها

انا نفسي ده يحصل، علشان التاريخ يزود سطور في كتاب مصر المشرف واسمي يكتب جنبه شهيد وبطل، وكتيير نفسهم ده يحصل علشان نرجع روح المصري القوي اللي جوانا

اعملوها وشوفوا المصريين اللي ديما جدعان، اللي ساعة الضرب تلاقيهم اول ناس بيجروا عليه يشوفوا في ايه
والله العظيم والله العظيم لو ده حصل، هتبقى يا مصر مقبره تاني للغزاه، التاريخ كله هيتغير لو ده حصل

نصيحه لبريطانيا وللملكه اللي مخها خرف: إعمليها :)

الأحد، 18 أغسطس، 2013

الملخص

بسم الله، السلام عليكم

في فدماغي كذا حاجه عاوز اقولهم واقترحهم، بسرعه وفي جمل مركزه

بالنسبه لموقف البرادعي -انا احترمته جدا- لسببين:
الأول ان البرادعي راجل مسالم، مبيحبش العنف، واعتقد انه كان بيدعم الحوار للخروج من ازمه ميدان رابعه العدويه، يعني الفض يبقى باستخدام النقاش والوصول لاتفاقات مشتركه.
التاني، ان البرادعي من زمان مواقفه معروفه، حتى لو غلط الغلطه دي، هزعل منه علشان الغلطه، وعلشان ساب مصر في وقت زي ده، لكن هقدر ان المبادئ لا تتجزئ، طالما هو مسالم وشايف -من وجهة نظره- ان في موقف غير مسالم، يبقى طبيعي انه لا يدعمه، ولو كان عمل غير كده كنت استغربت جدا وبدات اشك فيه!
بس عتبي عليه وزعلي منه، أنه ساب مصر في الوقت ده، كان يقدر يطلع بيان يقول فيه انه رفض استخدام الحل الامني لفض الميدان، وهيظل جنب مصر لحد ما تعدي الازمه وبعدين هيعلن استقالته مسببه برفضه الحل الامني.

بالنسبه لمواقف دول كتير من مصر وعلى رأسها امريكا والمانيا (جدير بالذكر ان اخر خبر من المانيا كان على @اليوم_السابع: ميركل: ألمانيا تدرس وقف صادرات السلاح إلى مصر) احنا نقدر ناخد مواقف كتير ومنها مثلا
"التلويح" بالتقارب المصري الروسي (ودي حاجه هتقلق الطرفين وهتغير معطيات ومجرى اللعبه بالكامل)
التهاون على الحدود مع الكيان الصهيوني
شويه افارقه يعدوا كل يومين تلاته مثلا
ممازحه السفن التجاريه من البلدين ^^
-يعني نهزر شويه، نتأخر شويه، نأخرهم شويه، كده يعني
نتلكك للكيان الصهيوني على اي حاجه ونستدعي السفير للتشاور
نقلب دول الخليج على امريكا والمانيا :)
- خصوصا السعوديه والامارات والكويت، خير داعمين لنا الايام دي وممكن نستخدم ورقة دول الخليج

بالنسبه للدول المسانده الاوروبيه بس
المفروض اننا لا نبالغ في الترحيب او الشكر على المواقف، باعتبار انها صح، والتذكير ديما ان الدول دي اخده مواقف صح في العموم لا تستحق الشكر، لكن تفضلا من مصر بنشكرهم على استيعاب الحقيقه كامله

بالنسبه للدول العربيه بس
المفروض الدول دي نوطت علاقتنا اكتر معاها، ليس باعتبار المصالح المشتركه، في روابط اخوه ودين وعروبه تربط بين جميع ابناء الوطن العربي حتى المختلفين معاهم ومن ضمنهم قطر!!!
لكن في النهايه تظل العروبه دافع ومصر هي ام الدنيا ومصر هي "الشقيقة الكبرى" للعرب كلهم، فده واجب الكبير، انه يستوعب (الصغير) ويتحتويه ويطبطب عليه ويوقله عيب يا حبيبي يا وطني الاصغر ياللي يوم ورا يوم امواله بتكتر، ويقوله مينفعش كده

ويابخت من دوْن وخفف

الجمعة، 9 أغسطس، 2013

نقط نقط نقط



بسم الله، السلام عليكم

لكل التلاته اربعه اللي مستنيين اني اكتب حاجه جديده، اتبسطوا ..
انا مش عارف اكتب!

فوت احداث كتير جدا، معلقتش عليها
المد الثوري (30/6/2013) معرفتش اكتب عنه حرف
حتى القضايا اللي انا مؤمن بيها، او وجهات نظري في حاجه معينه، مش عارف اكتب عنها حاجه

تقريبا انا هفضل على كده فتره، يمكن دماغي مش راقيه، او غزالتي مش تمام
بس اللي اقدر اقوله من غير ما اكتب قبله يمكن، هو اني
مش عارف اكتب حاجه

بس هحاول اكمل تدوينه من التدوينات القديمه