رسالتي لكل شاب وكل فتاة

بسم الله الرحمن الرحيم، رسالتي لكل شاب وكل فتاه ان المدونة لاتزال تحت الانشاء والتطوير والتعمير، تدوينات قليله انا عارف، ومش مهم لاني مش هدفي الاول اني اكون مدون وياااه واوفر والكلام ده، انا بكتب اللي انا حاسس اني حابب اشاركه مع الناس، وده غالبا مابيحصلش كتير، الصبر مفتاح الفرج ولو صبرت عليا سنه ولا تلاته كده .. احتمال تلاقي المدونة شكلها يعجبك!

الاثنين، 30 ديسمبر، 2013

المصرية للإتصالات تسعى للاستحواذ على رخصه المحمول الرابعه "او الرخصه الموحده" | زحمة تقنية

المعنى الحقيقي للفوضى غير الخلاقه

بسم الله، السلام عليكم

بصوا ياولاد
علشان نفهم الموضوع صح لازم نعرف شوية حاجات بسيطه، سريعه، ومهمه، اولهم انك علشان تعمل شبكه محمول في اي حته ف العالم، لازم تاخد ترخيص من حكومة البلد، لانك هتشتغل على ترددات راديو، فلازم الحكومه توافق
اول شبكه محمول في مصر هي شبكه موبينيل وكان "واعتقد انه مازال" الشركة المصرية لخدمات التليفون المحمول، في كلام عن ان الشركه كانت تابعه لمجموعه شركات اورنج "شركه موبيلات بردو" بنسبة 94% ثم اشترت حصتها اوراسكم، وفي كلام ان مصر هي اللي كانت تملك الحصه دي مش شركه اورنج، الله اعلم، انا مبحثتش كتير ف الموضوع
لكن، جات شركه فودافون وحصلت على الترخيص التاني لإنشاء تاني شبكه محمول في مصر، حلو كده؟
رخصه المحمول في مصر هي رخصه محدوده، او رخصه مقيده، لان الرخصه بتديك الحق في استخدام ترددات راديو بس، لكن مش رخصه بتديك الحق في تقديم خدمه متكامله للإتصالات، يعني مينفعش تعمل سنترال، مينفعش تربط المدن ببعض وتمد اسلاك ربط "سواء نحاس او فايبر"، وكان الموضوع ماشي تمام لحد ما الحكومه اتنزقت في قرشين، فطرحت الرخصه التالته بالتزامن مع الاعلان عن الجيل التالت، واخدتها اتصالات، وهفكركم ان لحد اللحظه دي، شركات المحمول كان ليها الحق في تقديم الخدمه المعتمده على تردد الراديو فقط
جه كلام عن ان مصر مزنوقه في فلوس تاني وهتطرح الرخصه الرابعه بالتزامن مع الجيل الرابع كالعاده، المصريه للإتصالات شركه مش بتقدم خدمات الاتصال اللاسلكي، هي بتقدم خدمات الاتصال السلكي بس، التليفون الارضي والانترنت "النطاق العريض اللي قرفونا بيه" ابو سلك نحاس ده
فالمصريه للمحمول عاوزه تدخل مجال الاتصالات اللاسلكيه، تقوم تعمل ايه؟ تضغط ع الحكومه انها تتطرح رخصه المحمول الرابعه في مصر، "وبسمع انها ضغطت لزيادة الارقام علشان تلم و014 و015 و016 و017 و018 و019، اللي كانوا متوزعين على فودافون وموبينيل واتصالات لان الارقام المتاحه بدات تقل

نرجع لمرجعونا هو ان المصريه للإتصالات بتضغط علشان تاخد رخصه المحمول الرابعه، وده معناه ايه؟ انها هتقدم خدمات محمول، وده معناه ايه؟، معناه انها هتاخد من نصيب وحصص الشركات التالته لان السوق في حالة تشبع "حالة التشبع ببساطه ومن غير تعقيدات، ان السوق مبقاش فيها مستهلكين جداد، يعني لو في 50 مليون مصري معاهم تليفونات محموله في مصر، فال50 مليون مصري مشتركين في الـ 3 شركات وده عمل تشبع، لان مفيش اعداد جديده من المستهليك هتدخل السوق وبالتالي اي شركه جديده هتدخل تقدم خدمات ف السوق، هتاخد من نصيب الشركات اللي قبلها والمنافسه"، وطبعا الشركات العامله مش موافقه وده حقها، لان سوقهم في حالة تشبع بنسبة يقال انها 112%، وبالتالي الشركات رافضه طرح الرخصه الرابعه، تقوم الحكومه علشان تسكهم، تعمل ايه؟، تطرح حاجه اسمها الرخصه المتكامله ^^

دي بقى حدوته، الرخصه دي بتدي الحق لحاملها او مالكها في تقديم خدمة اتصالات متكامله، يعني سلكيه "انترنت نطاق عريض او برودباند النحاس ده" وفايبر، وطبعا تليفون ارضي، ولاسلكيه زي المحمول، وعلشان يوافقوا كمان، هتصرح لهم باستخدام الجيل الرابع ^^
ده يزعلني ف ايه؟
سعر الميجا في مصر كام؟، المتوسط بتاعه 135 جنيه، فودافون 133، وTE Data "شركه مملوكه للمصريه للإتصالات المملوكه للدولة" 140 جنيه، وتقريبا نفس الاسعار عند Link اللي هتندمج في موبينيل، وعند اتصالات
مش غريبه ان سعر السلعه يكون متقارب جدا جدا جدا كده عند 4 موزعين؟
لاء، لان اساسا موبينيل "ولينك" وفودافون واتصالات، بياخدوا النت بتاعهم "اللي بيوزعوه لنا" عن طريق المصريه للإتصالات المالكه لشركة TE Data، ليه؟، لان المصريه للإتصالات هي الشركه المسؤله عن الـ international gateway بتاع مصر.
ايه المصطلح الغريب ده :D

الموضوع محتاجه شوية فهم زياده، في "عجاله كده" ايه هو الانترنت؟، هو اني اوصل جهازي بجهازك، واجهزتنا باجهزه تانيه، باختصار، هي مجموعه اجهزه متصله ببعض، بعضها يعمل كـ client يعني عميل (انا وانتا)
وبعضها يعمل كـ Server يعني مخدم او خادم، وده المكان اللي بنحط فيه المواد اللي بنطلها كلنا، زي المواقع، زي موقع جوجل كده، عنده سيرفرات كتير حاطط عليها كل ملفات الموقع، وانتا لما بتدخل تكتب google.com الجهاز بتاعك بيطلب من سيرفرات جوجل حاجه اسمها المحتوى، المحتوى ده هي البيانات اللي بتتعرض على الشاشه عندك زي شعار الموقع ونتائج البحث وهكذا
وبالتالي انا لازم ابقى موصول بالشبكه اللي موصول بيها جوجل (وكل المواقع) علشان اقدر اوصله، طيب لو الكبل بتاع النت بتاع مصر اللي في البحر (الكبل الام ^^) اتقطع، يحصل ايه؟
حاجه من اتنين، يا هيتفصل عندك النت خالص "الشركه هتريح دماغها وتفصله" يا هتفضل متصل بس بالسيرفرات اللي موجوده في مصر ودي عددها قليل او يكاد يكون معدوم

واساسا كلمة net ترجمها الحرفيه في اللغه العربيه هي "شبكه"
يعني لو جيت تترجم من العربيه للإنجليزيه جملة "هذه الشبكه لهذا العنكبوت" هتبقى
This "net" for this spider
يعني باختصار، النت ده عباره عن شبكه موصله الكوكب كله ببعضه، الصين متوصله بمصر عن طريق الشبكه دي ومصر متوصله بنيوزلاندا عن طريق نفس الشبكه وهكذا
الشبكه دي بتتعمل في البحر، وعلشان كل دوله تستفيد من الشبكه دي، لازم الشبكه تمر على حاجه اسمها gateway "يعني بوابه" ومصطلح international ترجمته الحرفيه هي "دوليه"، يبقى الترجمه الحرفيه للمصطلح كله هي: البوابه الدوليه"
معظم دول العالم المتقدمه، عندها اكتر من بوابه، واعداد كتيره، لان كل مازاد عدد البوابات الدوليه، كل ما كان نصيبك في شبكه الانترنت الدوليه اكبر، وبالتالي بتقدم في بلدك "او دولتك" خدمه احسن للمستهليك
مصر عندها بوابه واحده :)، ايييوه، بوابه واحده بس، وخمن كده مين المسؤل عنها؟ ^^
صح، المصريه للإتصالات، المالكه لشركة TE Data
وطبعا هي المالكه لكل سنترالات مصر، "البنه التحتيه للإنترنت"، علشان كده، TE Data هي المتحكم الوحيد في تسعير النت في مصر، لان البوابه تحت اديهم، والبنيه التحتيه كمان :)

اللي مزعلني بقى، ان الشركات التلاته اللي شغالين ف السوق حاليا، مش بيضغطوا علشان يعملوا لنفسهم Gateway خاصه بكل شركه فيهم، وبالتالي يقدروا يساهموا في البنيه التحتيه للإتصالات في مصر بانهم يعملوا سنترالات "خاصه" اخيرا ^^
ويوصلوا المدن ببعض عن طريق الاسلاك الفااااااااااااااااااااااااابر

تخيلوا لو ده حصل، يبقى تخلصنا وللأبد من العبودية لشركه TE Data اللي لسنا ادلدل علشان يخفضوا سعر النت في مصر او يحولوا للفايبر وهم ولا هم هنا

انتظروا حلقه تثقيفيه جديده الاسلاك الفايبر :)
انا عاشق للإسلاك الفايبر بصراحه وهتعرفوا ليه ^^

الأحد، 29 ديسمبر، 2013

دوّر عبدالمنعم ابوالفتوح الخطير في تفتيت الاصوات الكتير


بسم الله، السلام عليكم

علي كل لون يا باتستا، دي الجمله الوحيده اللي حضرتني لما اسم الراجل ده جه ف دماغي
متعرفش، هو اخوانجي ولا ثوري، هو معانا ولا معاهم، هو علينا ولا عليهم، هو بيحب مين ويكره مين
مبادئه عمله ازاي، هي ثوره ولا انقلاب يا ابوالفتوح؟..

.. غوره تاخدك :)

لو قعدت تتأمل ف الماضي السحيق "بهزر في السحيق دي" وفكرت في المرشحين، كانوا مين؟ كان في حمدين، والاهبل محمد مرسي "مورسيكو" والفشيق احمد فريق، على شويه حلوين كده من اللي هم، خالد علي، هشام البسطويسي، عمرو موسى "كان عاوز يبقى رئيس والمصحف" وعبدالله الاشعل "كنت مسميه عبدالله تصريحات" وحسام خيرالله، وابوالعز الحرير، وكان في اتنين من اللي هم، وساخه الوساخه، وقباحه القباحه، المذكور، البرتقاني عبدالمنعم ابو الفتوح، اللي شعاره هو: على كل لون يا باتيسا"، والتاني اللي اسمه محمد سليم العوا، والاتنين اخوان ودي مش معملومه ده تفسير وتحليل وهقولكم ليه، ولسه في انبهارات..

اللي حصل ده "الاعاده بين الفشيق ومورسيكو" كان من مصلحة الاخوان، وانا جاي ف السبب

مين في دول فلول؟، مفيش غير اتنين بس، احمد شفيق، وعمرو موسى "ايوه عمرو موسى فلول، ومش معنى انه رئيس لجنه الخمسين يبقى مش فلول وهيعملي فيها ثوري"، والباقي كله بما فيهم حمدين، جاي على قفا الثوره "ودي حاجه مش عيب بالمناسبه"
طبعا انتوا شوفتوا، في الاعاده مرسي اخدت كل الاصوات المؤيده لكل من، حمدين "بعضهم وانا مش منهم انا قاطعت" وابوالفتوح وهشام البسطويسي وخالد علي وعبدالله تصريحات وابوالعز الحريري، وحسام خيرالله
وشفيق اخدت اصوات بعض اصوات المسيحيين اول مره وكتير جدا من الفلول "الفلول كانوا متقسمين عليه هو وعمرو موسى"، في الاعاده بقى، الفلول والاقباط راحوا لشفيق، يفضل مين؟ الثورجيه والاخوان اللي ضاحكين على الناس باسم الاسلام "وزود باسم الثوره" :)
يبقى اتلعبت صح، الاخوان حريفة انتخابات من ايام مجلس الشعب، عارفين ازاي يفتتوا الاصوات ويلعبوا على الناس، بس لما تيجي تحلل، تلاقي حاجه غريبه جدا، لو افترضنا ان مكنش فيه العوا وابو الفتوح، كان مين هياخد الاصوات بتوعهم؟، كانوا هيروحوا لحمدين وش، دايريكت كده "واللي انا شايفه ان اصوات كتير كان يقدر ياخدها حمدين، انضحك عليها من ابو الفتوح والعوا"، ولو كان فعلا اخدها، كان ايه اللي حصل؟
كانت الاعاده هتكون مابين حمدين وشفيق، وكنا هنوصل لنفس النتيجه ويمكن نتيجه احسن، هو فوز حمدين او اكتساح حمدين، يعني ببساطه، دور العوا وخصوصا ابو الفتوح هو تفتيت الاصوات اللي مش مع الاخوان ولا الفلول "الثوار المثقفين والناس العاديه" والجماعه هتنجح نفسها بحاجتين، اضحك ع الغلابه الثوار الغلابه اللي تفكيرهم على قده بالدين وبالثوره، واعضاء الجماعه والمتعاطفين معاها اللي مكانوش قليلين

عرفتوا بقى ليه انا مستحقر ابوالفتوح؟، علشان ببساطه كده "في اعتقادي دي مش معلومه" كان في اتفاق مابينه وبين الجماعه هو والعوا، انزلوا الانتخابات علشان تفتتوا الاصوات، وتفكير الجماعه هو انه لو نجح ابو الفتوح اللي فرصته كانت افضل من العوا، يبقى مخسرناش كتير، لان ابو الفتوح اصلا اخوانجي، واهم حاجه هو انك تفتت الاصوات اللي حمدين ممكن ياخدها، لان حمدين ابعد ما يكون "بل هو عدو" الاخوان والجماعه وفوق كده، ناصري :)، وفاكرين الجمله الشهيره بتاعت مورسيكو الاهبل "الستينيات وما ادراك ما الستينيات"

من الاخر، الاقنعه بتقع، ودوركوا كان قذر يابوالفتوح انتا والعوا

الأربعاء، 25 ديسمبر، 2013

هو الانسان مسير ولا مخير؟ | تدوينة مهمه


اعوذ بالله من الشيطان الرجيم
بسم الله الرحمن الرحيم
{وَفِي السَّمَاءِ رِزْقُكُمْ وَمَا تُوعَدُونَ *فَوَرَبِّ السَّمَاءِ وَالْأَرْضِ إِنَّهُ لَحَقٌّ مِثْلَ مَا أَنَّكُمْ تَنْطِقُونَ} [الذريات 22:23]
صدق الله العظيم

تقريبا كده الموضوع اتحسم؟، اهو، وفي السماء رزقكم وما توعدون
يعني مهما جريت مش هاخد اكتر من رزقي
اممم، لاء
مش كده بظبط، المقصود بالرزق في الايه دي، هو المطر، وما توعدون، هو الجنه :) ، وده حسب تفسير ابن كثير -المصدر
التدوينه دي لها طابع فلسفي اكثر من الطابع الديني، ومفيش تعارض ابدا بين الاتنين
بعتذر عن طول التدوينه النسبي (بالنسبه لتدويناتي التانيه) بس حاول تقراها للأخر "لو وقتك يسمح"

تخيل كده سيادتك، لو انتا ماشي ف الشارع، وقومت مغمض عنيك ومعدي طريق سريع، وهوووووب، جات عربيه مسرعه ونطرتك 10 متر لقدام وقومت نازل متدشدش، تقدر لما اجي ازورك في المستشفى تقولي "ده قدري"؟، لاء، متقدرش، لانه مش قدرك، خالص، طيب تعالى نجرب نعكس الآيه.. 
تخيل كده سيادتك، لو انتا ماشي في الشارع، وقومت باصص يمينك وشمالك، ومتاكد ان مفيش عربيات طريق مسموح فيه بعبور المشاه، وزياده حرص استنيت اشاره العربيات حمرا "ساعتها اشارة المشاه بتكون خضرا" وقومت معدي، وفجاه هوووووب، عربيه مسرعه جات نطرتك نفس ال10 متر لقدام وقومت نازل متدشدش، ساعتها لما هاجي هتقولي بكل ثقه: ده قدري

لسه مش فاهم؟، ابسطهالك، ايه هو القدر؟، القدر انك تبقى ماشي ف الشارع وفجاه ومن حيث لا تدري تنزل عليك صاقعه من السماء تجيب أجلك، او تتكعبل في سجاده تموت (زي محمد عبدالوهاب الله يرحمه) او تموت وانتا نايم، لكن تبقى طاير بعربيتك ف طريق مينفعش تمشي فيه سريع، ومش لابس حزام الامان، وقاعد تعدي على العربيات وتتقلب وتتفشفش ولما اجيلك المستشفى ازورك تقولي قدر، قدر مين؟، ده هيبقى قدر حد انتا موته، انما ده مش قدرك انتا، ده غلطك، ومش غلطك انك أذيت نفسك وبس، لاء، انتا كمان أذيت حد تاني اخد كل احطيتاته، وقدره هو انك تتغابى الغباء ده وتخبطه تموته، فهمت؟

بزمتك كده، لو مثلا انتا خاطب، وحصل بينك وبين خطيبتك او مراتك اي شويه مشاكل صغيرين، وانتا فجاه صممت على لانفصال برغم انها كانت رافضه وانتا اصريت، ينفع تفكر ان اللي حصل ده قدر؟، او ان ربنا بيعمل كده علشان عاوز لك الاحسن؟، بزمتك مش عيب تدخل ربنا في كل تافهه تعملها بغباء، بتحمل ربنا على غبائك انتا؟

الانسان مخير، مش مسير، انتا لو مسير تبقى لامؤخذه "حيوان" امكانياته محدوده، وعايش علشان غرزتين، البقاء، بقاء النوع، وبس
وساعتها يبقى ربنا بيحاسبك على ايه؟ على حاجات مخططه مسبقا؟ يعني تفتكر الحيوانات هتتحاسب معانا؟، لاء، الحيوانات لا تعقل، وبالتالي هي مسيره، لكن احنا نعقل، يبقى مخيرين، طبعا واكيد بعلم ربنا وبإرادته، لكن ف الاخر احنا مسؤلين عن افعالنا قصاد ربنا علشان احنا مخيرين مش مسيرين..

مش مصدقني؟
ليه الاطفال مرفوع عنهم القلم (مرفوع عنهم القلم يعني سيئاتهم مش بتتجسل في سجل السئيات) لحد سن البلوغ؟، علشان هم لا يعقلوا لسه بالدرجه الكافيه، ليه المريض العقلي "المجنون" مرفوع عنه القلم؟ لانه غير متحكم في افعاله ولا يعقلها، ليه النايم مرفوع عنه القلم؟، علشانه غائب عن الوعي، يعني لا يعقل ولا يتحكم بأفعاله، هو في حاله نوم "في جرائم بتحصل اثناء النوم، علشان محدش يقولي ان النائم لا يستطيع ان يرتكب ذنوب).

اللي فاكر انه مسير ده، عامل بظبط زي مريض السرطان اللي قرر ميتعالجش، ليه ياحج؟، يرد الحج: اصل الموت ده قدر، وانا قدري اني اموت بالسرطان!، ياراجل؟، قدرك انك تصاب بالمرض يمكن، لكن مش قدرك انك تموت بيه، لان ببساطه انتا قدامك تدور على علاج، واحتمال تلاقيه، بس انتا مدورتش :)

في ناس بتستسهل، يقولك بدل ما اصلح حنافيه بايظه، انا الغي الحنافيه اصلا، واشتغل بحنافيه المطبخ، ولما تيجي تقوله "ليه"؟ يقولك اصل ده قدر، ربنا عاوز كده، ربنا عاوزلي الاحسن، ربنا عمل كده علشان مخبيلي الاحسن، ويفضل كده لحد ما يلاقي نفسه لغى كل حنفيات الشقه، وقاعد من غير ميه :)، وبردو يصمم انه قدر وان ربنا هيطلعله شلال من تحت السرير.

لاء :) ..
لا تفتري على الله، انتا ملكش دعوى بقدر ومكتوب، انتا ليك دعوى بالصح والغلط، ليك دعوى بان لو في ايدك حاجه كويسه فيها عيب بسيط او حتى كبير، تحاول مره واتنين وتلاته انك تصلحه، لو انتا فيك المشكله، حسن من نفسك واشتغل عليها، لو انتا كسول، بلاش تكسل وتقول قدري اني كسول والرزق هيجيلي لحد عندي، وربنا مقدر لي اكون كسول لان ربنا مخبيلي حاجه احسن من الشغل.

لا تفتري على الله، وانتا كأنسان، ملكش دعوى بقدرك :)

الاثنين، 23 ديسمبر، 2013

انا محمد منير لما قال: يهمني الانسان

بسم الله الرحمن الرحيم
السلام عليكم ورحمة الله

يا ناس يا مكبوته، هي دي الحدوته
حدوته مصريه، حدوته مصريه

ربنا استخلف البشر في الارض ليه؟، علشان الناس، تخيلوا؟، قول لي، ايه فايدة الذكاه؟، والصيام والصلاه؟، ايه فايدة صدقة الابتسامه في وجهة اخيك صدقه؟، تفتكروا الرسول علية الصلاه والسلام كان قصده الاخ المسلم، ولا الاخ الشقيق، ولا الاخ ف الانسانيه، ولا الاخ ف الحياه؟، ايه فايدة الشغل؟، تفتكروا لو انا كنت مولود غني ومعايا ثروة تكفيني وتكفي وذرتي من بعدي اجيال واجيال، ان عدم الشغل هيكون راحه؟، ان عدم الشغل هيكون متعه؟ هي الجنه من غير ناس، بتنداس؟، هو ربنا مكنش قادر يخلقنا كلنا شبه بعض، نوع واحد بياكل نفس الاكل ونفس الشرب ونفس الشكل وبيخلف نفس العدد، عايش ف نفس المكان بنتكلم لغه واحده وبنحس بنفس الطريقه وبنفكر كمان بنفس الطريقه .. اييييييييييييييييييه

انتا لو عايش علشان نفسك، وانا لو عايش علشان نفسي، نبقى خساره نتشبه حتى بالحيوانات، لان حتى الحيوانات مش عايشه علشان نفسها وبس!، معظم الحيوانات بتصطاد في جماعات، حتى الحشرات زي النمل بيخزن اكله بالمواسم، ونظام عمل كامل، فيه العمال والملكه والمربيات والمستكشفين وغيرهم، يبقى اللي عايش علشان نفسه وبس، حتى كمان مينفعش يتوصف بحشره، هشتمه بايه ده؟

انا اللي ربنا مقدرني عليه حاليا بعمله، وهوَ اني اكتب، من نحية اعبر عن رأيي، ومن نحية اصحي فيك حاجه ماتت، فوق، لانك لما هتفوق هتبص تلاقيني مقصر في حق نفسي وحق الناس وقبل كل ده، مقصر في حق ربنا، هتفوقني، ولما هفوق ممكن الاقيك مقصر افوقك اكتر، الوحش بيعم، زي ما الحلو كمان بيعم، لو المصري سافر بره مصر اول حاجه بيعملها انه بيدور على امكان يرمي فيها الزباله، وبيبطل يدخل في الاماكن العامه وبيلتزم بقواعد المرور وبيستى الناس تنزل من الصب واي قبل ما يركب، وعلى النقيد تماما، الاجنبي لما بيعيش ف مصر، بياخد فتره لكنه بيتصرف زي المصريين، مهو عارف انه ملحقش يدخل المترو قبل غيره مش هيلاقي مكان لو ظروفه متسمحش بالوقوف، فبيزاحم اللي نازل علشان يلحق يركب قبل غيره، ولما بيدور على صناديق الزباله بيلاقيها مليانه وحوليها زباله، بيرمي ف الشارع عادي، ولما بيلاقي الناس بتدخن في المترو والمنشأت الحكوميه، بيدخن في نفس الاماكن هو كمان.

هي البيئه، ابدء بنفسك، اعمل اعمال خير بسيطه واخلص النيه فيها لله، لو عندك مدونه اكتب فكره وحمس الناس للخير، لو ليك صحاب قول لهم بلاش يرموا زباله غير ف صناديق الزباله، وقولهم يستنوا الناس تنزل من المترو قبل ما يركبوا، قول لهم لو شافوا عجوز/ه يقعدوهم همَ اولى، ووقول للي شغال فيهم يتقي الله ف شغله وربنا هيجازيه خير لانه بيتقيه، قول للناس تبتسم برغم الهم والغم، قول لهم يقولوا الحمد لله بكل اخلاص وسماحه ورضا وطيبة نفس، لانه فعلا الحمد لله وانا في عز المصايب، حقيقي انا عندي مشاكل بالهبل ومخنوق جدا، لكن بحمد ربنا برضا وطيب نفس وقناعه ان ربنا عاوزني كده علشان يبعدني عن حاجه مش خير، او يوديني لحاجه خير، او حتى (علشان اتعلم بس، وده في حد ذاته، استفاده، خير ليا يعني، وخير ليك، لما هتعلم هكتب اللي اتعملته ف المدونه وممكن انتا تقراه، وتتعلمه، وتعلمه لغيرك واكسب فيك وفيهم وفيكوا ثواب).

هذه ليست دعوى للتفائل، المستقبل مش ظاهر اصلا علشان نتفائل او حتى نتشائم منه، البلد حلتها زي الزفت، سواء من الاخوان ولا الفلول ولا اللي لسه منفعين ورجال الاعمال الفاسدين والاسعار واخلاق الناس وغيره وغيره، بس دي دعوى للثقه في ربنا، تفائل بربنا خير، مش تفائل في المستقبل، خليها ثقه ف الله، ان ربنا معاك، ابدا بنفسك وانا بدات بنفسي ولو قدرنا نبقى 100 بدأوا بنفسهم، هتشوفوا الدنيا هتتغير ازاي

اخيرا وبسرعه علشان عارف اني طولت -على غير العاده :P- ثورة 25 يناير العظيمه ((عظيمة غصب عن عين الكل وغصب عن عين التخين وغصب عن عين امن الدولة والامن الوطني والجيش والشرطه والبشر كلها وقبلهم كلهم غصب عن عين مبارك وكلابه) وثورة 30 يونيو العظيمه ((غصب عن عين الاخوان وحزب النور واي كلب كان منتفع او هينفع في وجود الجماعه))، بدأوا بواحد بدأ بنفسه، اتغير، غير نفسه، شافه صاحبه فتغير، وغير 10 معاه، و10 دول لما اتغيروا، غيروا اهليهم اللي كان عددهم 100، وال100 غيروا 5 الاف، ونزلوا شوية عيال لابسين اسود يطالبوا بحق خالد سعيد وغيره من اللي ماتوا على ايد كلاب امن الدولة والداخليه.

احنا شعب وبلد فيها كل العبر، وفيها كل المساوء، مفيناش حاجه وحده حلوه، مفيش اي بارقه امل، مفيش اي نور، مفيش حتى شمعه، بس في ربنا، دور معايا على شمعه وسيب الباقي يلعن الظلام، يمكن حد مننا يلاقيها ويولع لهم نور خافت يخليهم يغيروا ويدوروا بيه هم كمان على شمعه، وسنتين تلاته وهنلاقي الاوضه نورت، وبعدين الشقه والعماره والحي والمدينه والمحافظه والبلد كلها، رجعت تنور تاني.

الأحد، 22 ديسمبر، 2013

كتر النفخ يجيب تفجير


بسم الله، السلام عليكم

عاوز تثبت "تقريبا" اي حد على موقفه؟، هاجم موقفه، ببساطه.. حطه في موقف دفاعي، وافترج على الانبهارات، مش مصدقني؟، جرب!
هات حد من صحابك مختلف معاه في حاجه معينه، ويفضل تكون حاجه جديده لم يسبق لكم النقاش فيها كتير، وابدا بالهجوم، هتلاقيه بيدافع وبدا يشن عليك هجوم عنيف وسريع ومباغت، هتلاقي نفسك ف موقف دفاع، هتدافع، وهترجع تهاجم مما يدفعه للدفاع ثم الهجوم، هتدخل في سجال كلامي، ثم مناقشه حاده، هيخرج منها الطرفين كل واحد مصمم اكتر مما كان على وجهة نظرة او رأيه.
والحل؟، متقوليش بلاش نقاش، بس متهاجمش، متحطش اللي قدامك وانتا بتتناقش معاه في موقف دفاعي!

-ديك النهار- كنت بتناقش خلال تعليقات الفيس مع حد بخصوص السيسي، هل هو كويس ولا وحش، قولنا مليون مره انه كويس وبطل، بس ميتنفخش، متنفخوش السيسي اكتر من كده، كل اللي عمله السيسي انه أدى واجبه نحية الشعب ونحية ضميره، لا اكتر ولا اقل، وكلمة شكر تبقى كفايا اوي عليه، مش ننتخبه رئيس -جامهوريه- يعني!

وانا -كـ محمد سمير- شايف انه بطل، وعرض نفسه لخطر، وعرض البلد كلها لمحنه، كان ممكن يطلع قرار بإقالته وساعتها كانت هتبقى كارثه بكل المقاييس، كان ممكن يتم اعتقاله بواسطة الحرس الجمهوري، وكان ممكن مورسيكو ببساطه لا يستجيب، او كان ممكن الحرس الجمهوري يدافع عن مورسيكو وقت اعتقاله، وساعتها ندخل في شبه حرب أهليه مابين الحرس الجمهوري والجيش المصري اللي الحرس الجمهوري يعتبر احد فروعه او فرقه.

لكن السيسي خاطر بكل ده علشان ينقذ البلد من مصايب مورسيكو وجماعته اللي شبعنا كلام فيها، بس هل من المعقول اني لما اروح اشتري عيش من الفرن والاقي العيش كويس وشكله حلو وميزانه مظبوط وفي معاده، اقول شكرا للفران؟ ولا اجيبه واجوزه بنتي علشان اتقى الله وأدى واجبه ورضي ضميره قدام ربنا واتقى الله في الناس؟

فران حلو، يبقى كويس، شكرا يا فران، سيسي حلو؟ يبقى كويس، شكرا سيسي، مش اكتر ومش اقل، لكن نعمله حمله وننتخبه رئيس جمهورية وننفخ فيه ليل نهار ونخلق منه فرعون جديد -هي عادة المصريين ولا هيشتروها يعني- مينفعش ابدا!
من الاخر كده، كتر النفخ يجيب تفجير

السبت، 21 ديسمبر، 2013

عبدالفتاح السيسي.. نص كلمة


السلام عليكم، بسم الله

مين الحمار ده؟!

السؤال اللي هيجنني، مين الحمار ده اللي عاوز يوقع الفريق اول عبدالفتاح السيسي، الوقعه السودا دي؟، السيسي مينفعش للحكم، لسبب بسيط، حد يختلف على شخصيه عبدالناصر؟، بالعكس، انا شخصيا "برغم اخطائه الكارثيه" بحبه جدا وبحترمه، لكن قبل ما اقول اني بحبه وبحترمه، قولت "برغم"، معأن شخصيه جمال عبدالناصر، شخصيه فيها روح الزعامه، كان يقدر يكون زعيم واب روحي حقيقي بدون اخطاء لثورة 52، لكن، يا كان عنده حمار يغريه بالكرسي والسلطه والمنصب، يا كان عنده حلم حاول يحققه من خلال المنصب، وابشركم انه فشل، وده بظبط اللي السيسي لو اترشح وبقى رئيس هيوصله

لما جات انتخابات الرئاسه نزلت اول مره واديت صوتي وصوت اسري لواحد ناصري، طبعا معروف "حمضين ^^" معنديش مشكله اقول عليه كده، لانه راجل سياسيه يحتمل النقد واخطائه وارده، فيه اللي ينفع يتجاوز عنه، زي اعلانه الترشح المبكر، واللي مينفعش يتجاوز عنه وساعتها تقوم عليه ثوره، والنسر عنده رؤيه ووجهة نظر انا مقتنع بيها بجانب اقتناعي بشخصيته، ده غير العامل الاهم "the x Factor" اللي هو برنامجه، برنامج مصر محتجاله، برنامج اقرب للتجربة الاشتراكيه برغم اني مش اشتراكي ولا حتى ناصري، بالعكس، انا لبيرالي كمان، يعني مبدأي ضد مبدأ الاشتراكيه جملة وتفصيلا، ومع ذالك انتخبته لاني "وجهة نظري" اعتقد ان مصر محتاجه تعاون الاشتراكيه، عن تفرد الرأسماليه بتاعت اللبيراليه!

لكني مش هرشح حد المره اللي جايا غير لو نزل احمد فشيق، هنزل علشان انجح خصمه الثوري ومش هعصر على نفسي لمون، لاني معصرتش السنه اللي فاتت وقاطعت، مش هعمل غلطه معملتهاش قبل كده وشوف عواقبها كمان، بس مش هرشح ولا هنتخب حمدين لسبب، اني مش عاوز احس او اتهم او ارضي غرور جوايا، باني دافعت عن عدم ترشح السيسي علشان افضي الساحه لحمدين، لان مش دي الحقيقه والله يعلم

الحقيقه، اني مش بس خايف من حكم العسكر، وده في حد ذاته كارثي، حكم عسكري، حكم كارثي، ولو ربنا قدر وشاء، هنحتاج 120 سنه وهو ضعف السنين من ايام الله يرحمه ويحسن إليه محمد نجيب، ثم المغفور له إن شاء الله عبدالناصر، ثم بطل الحرب "فقط" المغفور له إن شاء الله السادات، ثم المخلوع حسني مبارك، ثم ثوره!
تخيلوا هيجي كام سادات تاني بأخطائه، وكام ناصر تاني بكوارثه، وكام طاغوت تاني زي مبارك بكوارثه ومصايبه وبكل سلطاته؟

عاوزين حكم عسكري علشان ده اللي هيظبط البلد يا بلد جبانه مبقتش بتعرف تداري عار جبنها غير ف الافارول الميري؟، ولا فاكرين ان الخلاص ف الحكم العسكري؟، مبتتعلموش؟، سيبوا السيسي بطل، أدى واجبه اللي كُلف بيه وهو انه يقف مع الثوره "او الموجه الثوريه" التانيه، ونزهوه عن الحكم ومصايبه، نزهوه عن ان يبقاله خصوم سياسيه مشروعه، وخصومه فكريه مشروعه، واتعظوا من تركيا، من ايام اتاتورك لحد من 10 15 سنه، وهي مكنش عايش لها رئيس ولا حكومه ولا برلمان، ليه؟، علشان الجيش فيها كان رقم واحد، ليه؟ علشان ثار وحكم تركيا، ولا مش شايفين اسرائيل؟، هناك، 90% بل اكتر، من المناصب والقيادات العليا، زي ما يكون بتشرط في السي في بتاع الملتحق بيها، انه يكون رتبه سابقه في الجيش الصهيوني.
مشفتوش نص بل كل دول افريقيا؟، كل يومين نسمع انقلاب برئاسه قائد الحرس الجمهوري، ويحكم سنه ولا اتنين في قلائل، ثم يجي حد من الجيش تاني ينقلب عليه، ويحكم في نفس ظروف او اسوء من ظروف سلفه، ويتم الانقلاب عليه، ولو محدش انقلب عليه، بيرجع السابق يطالب بمكانه

زي ما قولنا انه مينفعش يتم خلط الدين بالسياسه، لازم كمان نعرف انه مستحيل يتم خلط العسكريه بالسياسه، والاخطر لما نبقى خارجين من تجربة زي الزفت لاسوء نظام فاشي عرفته مصر، عاملين زي المستجير من الرمضاء بالنار

سيبوا عبدالفتاح السيسي بطل، زي ابطال كتير عاشوا وماتوا من غير ما يحكموا، زي احمد عرابي وسعد زغلول وغيره، عاشوا ابطال، وماتوا ابطال، ولسه ابطال، لكن عبدالناصر والسادات، اي حد عنده ضمير ودم وبصيره قبل البصر، هيقول انه بيحترمهم لانهم ابطال، لكن..
وديما "لكن" هتسبق اي صفه جميله هنصف بيها الحكام
متحكموش على السيسي بلكن قبل ما نذكر محاسنه وبطولاته.

الخميس، 5 ديسمبر، 2013

كلمات سرعة الايام - مريم صالح

بسم الله، السلام عليكم


معلومات عن الاغنيه:
الصوت الجميل ده لـ: مريم صالح "بقول للي ميعرفش"
الكلمات المركزه دي لـ: مصطفى إبراهيم
والالحان "على غير العاده" لـ: تامر ابوغزاله

احسب لي سرعة الأيام
بطول العمر
على المدة
مع إهمال أثر خوفك
وتأثيره على الغده

فاتفرز ريحة مش هي
حافظها الكلب في الشارع
بنسبة مية في الميه
هايجري وراك
تقوم واقع

فاتيجي في وش عربيه
تقوم شيلاك في سكتها
وتاخد سرعة رأسيه
وتنزل رشق في ساعتها

وتيجي الخبطة في دماغك
وتنسى إنت اسمك إيه
وسنك كام
وعنوانك
بتتمشى لوحدك ليه


وترمي كل أسئلتك وارا ضهرك
وتقلع هدمة الأحزان قصاد الناس
ماهيش فارقه
تكون عريان ولا بلباس

ومش فارقة بقى تشوفك
ما دام الحسبة مش نافعه
مع إهمال أثر خوفك
مش فارقة
مش فارقة

..
زي كل مره، انا هنا بكتب اللي بحبه واللي بيعجبني
فمينفعش تصنف المدونة على انها سياسيه
او ترفيهيه، او تعليميه او ثقافيه!
هي كل ده واكتر بكتير ^^

الأحد، 1 ديسمبر، 2013

المؤامره الكونيه


بسم الله الرحمن الرحيم
السلام عليكم ورحمة الله وبركاته

على طريقه اغنية "اغيب اغيب" لعمرو دياب رجعت لكم
ومش ناسي (وبحضر) طبعا لـ "المُكَون المجنون للمكنون"

لأن المغلوب ليس فقط مولع بتقليد الغالب -ابن خلدون
ولان الانسان كائن صعب الاعتراف باخطائه لاسباب كتير منها كبريائه وغروره

لان 11 سبتمر ليست اعظم الاحداث

اعظم الاحداث على وجهة الاطلاق يصعب ترتيبها على بشكل تصاعدي، لكن يمكن محاولة حصرها، فعلى سبيل المثال، كان الموت الاسود او الطاعون الاسود الذي ضرب اوروبا عام 1347 واحد من اخطر الابوئه المنتشره على مستوى القارة، ومات مالا يقل عن ثلث سكان اوروبا، ويقال ان هذه الفتره كانت مشهوره بالاوبئه، فكان مرض الطاعون او الموت الاسود، واحد من اوبئه عديده ضربت اوروبا في نفس الفتره، مما ادى إلى عدد وفيات يصعب حصرها.
على ذكر الاوبئه لا ننسى ايضا مرض الجدري، وهو ظل لفتره ليست بعيده واحد من اخطر الاوبئه الغير قابلة للاحتواء إلى وظل يقتل سنويا عدد كبير من البشر إلى ان تم التخلص من اخر حالة عام 1980 وكانت في اثيوبيا، ويعد الجدري اول مرض ينتصر عليه البشر، ويقال انه قتل الملايين على مر السنين التي استوطن فيها اجسام ضحاياه.
ايضا الملاريا التي مازالت وباء نعاني منه، وقبلها الانفلونزا الاسبانيه التي قدر عدد المصابين بعدواها بـ 500 مليون نسمة مات منهم ما يقدر بـ 20 إلى 100 مليون انسان، أي ما يعادل ضعفي ضحايا الحرب العالمية الاولى، ويعادل او حتى يتخطى عدد ضحايا الحرب العالميه الثانيه المقدر عددهم بحوالي مابين 50 إلى 85 مليون انسان.

كان ولازالت كارثه مفاعل تشرنوبال الذي انفجر سنة 1986 تعد ثاني اكبر كارثه نوويه على وجه الكره الارضيه، بعد قنبلتي هروشيما ونجازاكي، فقد اسقط حوالي 36 ضحيه واصيب اكتر من 2000 شخص، وذكرت المنظمة الطبية الألمانية ضد الحروب النووية أن المنطقة المحيطة بمفاعل تشرنوبل شهدت تصاعدا كبيرا في معدلات الإصابة بسرطان الغدة الدرقية أكثر من أي أنواع أخرى من السرطان ولا سيما بين من كانوا في سن 18 عاما وقت وقوع الكارثة، كما تسببت حادثة مفاعل تشرنوبل في تلوث 1.4 مليون هكتار من الأراضي الزراعية في أوكرانيا وروسيا البيضاء بالإشعاعات الملوثة.

ناهيك عن البراكين والزلازل وكوارث الطبيعه الام التي ضربت العالم خلال المئه سنه الاخيره فقط، حتى بات عددها صعب احصائه، والاصعب منه احصاء اعداد ضحاياها.

على الصعيد السياسي، كان هناك عمليات ارهابيه "عمليات عسكريه ضد مدنيين لتحقيق اهداف سياسيه" الكثير الكثير، ومن تقريبا جميع الاطراف، سواء العرب، واليهود، والاروبيين، والامريكان
على سبيل التذكير وليس الاحصاء:
حادثه  إغراق السفينة رينبو واريور في نيوزلاندا التي قام بها عملاء الاستخبارات الفرنسيه ولحقها عدة عمليات بواسطة الاخير في لبنان
ارهاب الاباء المؤسسون لدولة اسرائيل الدولة المزعومه والكيان الاستيطاني قبل عام 1947 ضد المصالح البريطانيه في فلسطين التاريخيه تحت الانتداب البريطاني، ثم تبعها عام 1954 عدد من العمليات قامت بها دولة الاحتلال الارهابيه وتندرج تحت فئه "العلم المزيف-اي الحاق الضرر بالعدو عن طريق فعل افعال اجراميه والساقها به" وكانت ضد مصالح مصريه وامريكيه وبريطانيه في مصر
ثم العمليات الارهابيه الامريكيه ضد الكتله الشيوعيه سواء ابان بداية الحرب البارده ثم البدء في تفكيك الاتحاد السوفيتي عن طريق الحرب بالوكاله وهي حرب تمول فيها جهات معينه لتقوم بالحرب نيابة عن دولة اخرى ضد عدوهم المشترك!

لكن ومع كل هذا، يظل اليوم الاسود الموافق 11 سبتمر هو اليوم الذي ذاق فيه العرب عامة والمسلمين خاصة مراره الشعور بالمهانه، وهو بداية المصطلح المطاط والقابل لألف تفسير

الحرب على الارهاب

فبعد ان كانت المؤامره الانجلوسكسونيه والمؤامره الغربيه، والمؤامره الصليبيه، ظهر مصطلح جديد وهو المؤامره ضد المسلمين
فتعداد سكان الارض كسر بنجاح المليار السابع وصرنا 7 مليارات نسمه نستنفذ هذا الكوكب لأخر قطرة ماء، ولم تعد كلمة مؤامره متبوعه باسم الشعب الذي اتخذه احدهم عدو، او الامه التي تعكر صفو احدهم مقبولة، فكانت النتيجه هي "الحرب على الاسلام"
لا ولن نعرف من هو العدو، لكن اللعبه تستوجب وجود عدو، يجمعنا تحت راية الخوف ولا يفرق، يجعلنا خافئين ابد الدهر من هذا العدو الفائق القوه الذي يجب ان نعد الخطوات جيدا قبل المضي في طريق لعله يسلكه.
فتارة تسمع هذا الطاعن في السن يتحدث عن الماسونيه التي وإن كانت حقيقه فهو يقويها بكلامه هذا، وتارة اخرى ترى متشدق باسم الدين يرعبك من الامريكان الذين هم حولك في كل مكان "وهذا صحيح"، ثم يقرر احدهم اللاحاق بالركاب ويستفيض في محاولات اقناعاك بهذا الهراء ويرسم لك خريطه الشرق الاوسط الجديد والقديم، ويدخل الاعداء من حدود الدولة هذه إلى تلك، وفجاه تشعر انك يجب ان توقف كل شئ، وتهرول إلى ملجئ القصف لعلك تجد مكان وسط الزحام، تسأنس بالخائفين وتمني نفسك ان تخرج من هذه المؤامره حياً.

جعلونا لا نحلم بالغد، لاننا نريد ان يمضي يومنا دون ان نقتل، جعلونا نتخلى عن طوعيا عن كل شئ فقط لأجل البقاء، وهذه بداية النهايه

بداية النهاية

هل تعرف ماهو انسان نياندرتال؟، هو انسان بدائي متحدر من اصولة الافريقيه، هاجر واستوطن قارة اوروبا قبل 350000 عام قبل ان ينقرض فقط منذ 24000 عام تقريبا وسبب الانقراض؟ هو ظهور الانسان العاقل او الانسان الحالي، فقبل حوالي 45000 الف عام ظهر الانسان العاقل "الانسان الحالي" المتطور، بقدره فريده على صنع ادوات معقده وطريق صيد افضل وتكوين جماعات وترابطات عائليه اقوى وظلوا سويا مدة تقترب من 15000 الف، لم يحاربوا بعض، ولم يكون الانسان الحالي هو السبب المباشر في انقراض النياندرتال البدائي، فقط وكل ما كان في الامر، ان الاقوى استمر، والضعيف زال.
لم يجيبوا بعد على اسئله مثل: هل حاول الانسان البدائي تقليد المتطور ام استسلم وكانت نهايته حتميه؟ وإلى ان يجيبوا عن هذه الاسئله لا يسعني إلى ان اقول ان انه لا مكان للمهزوم في هذه الدنيا حتى وإن كان ضعيف البنيه والقوى الجسديه او حتى العقليه، فقط انتصر، تستمر، ولا اعني الانتصار الغير شريف، او الانتصار على حساب الاخر، فقط انتصر بالطرق المشروعه والاخلاقيه والدينيه والحياة سترحب بك وبمن بعدك، وستفني الحياة من هم اقل جودة لأنها السنه، شات ام ابيت، المنتصر ياخد ما للمهزوم.

فمابالك بألامه العربيه وقد انهزمت قبل حتى ان تبدا المعركه، ويلاً لهم وويلاً لنا إن انصتنا، لا تجعل كلام هؤلاء عن مؤامره قد تكون موجوده وقد لا تكون موجود يشغلك ويخيفك ويثنيك عن تحقيق حلمك، املئ الارض بك، تمتلئ الارض بك.

إيِنعم، قد لا تكون موجوده!

اتذكر النياتدرتال؟، هل تستطيع الجزم بان الانسان الحالي، اراد التخلص منه وكان هذا سبب انقراضه؟، إن كنت تشك في هذا دعني اسئلك سؤال اخر، إذا، كيف استمروا بالعيش سويا لأكثر من 15000 عام؟
اشك ان ذالك الاحساس البدائي انتاب ذالك الانسان البدائي: احساس الشعور بالمؤامره عليه وعلى اخوته من الانسان المعاصر، وهذا سام بل كان السبب الرئيسي في فنائه.
فبدل ان يشغل نفسه بالمحافظه على مكانته ومحالة تطوير ما وصل إليه وتخطي الانسان المعاصر، خاف وظل يخرج فقط ليصطاد وظل فقط مهتما بمرور يوما اخر وهو سالم من شر هذا الانسان المعاصر الجديد! وهذا كفيل بهلاك اعتى الامم، فقط اقنع الناس ان كوكب المريخ "الاخ الاصغر للارض" به كائنات اقوى منا ومتفوقه علينا بمراحلة، وشاهد ماذا يسحدث للكوكب بالكامل وهو يشعر بانه فاني لا محالة

ياصديقي لا تهتم بالمؤامره الكونيه، او حتى مؤامره جارك الذي يريد اخذ شقتك ليفتحها على شقته ^^ كن انت الذي تحيك لهم المؤامرات، ليس لتنجو، وإنما لتزدهر!


ويابخت من دون وخفف :D
-
مصادر ومراجع وربنا يستر:
الاوبئه والامراض: وباء إنفلونزا 1918 او الانفلونزا الاسبانية - Smallpox (لا ينصح للقلوب الضعيفه لوجود صور مقززه) - Black death 'discriminated' between victims
الحروب العالمية الاولى والثانيه: مش محتاجه مراجع :D
مفاعل تشرنوبل: كارثة تشيرنوبيل - كارثة تشرنوبل النووية
منظمة السلام الاخضر وعملية اغراق سفينة رايبو ووريور او مقاتل قوس قزح: Eyes of Fire: The Last Voyage of the Rainbow Warrior
النيانرتال: من هم النياندرتاليون؟ - أُفول الإنسان النياندرتالي - العلماء يفكون الشفرة الوراثية للإنسان البدائي المنقرض "نياندرتال"
دولة الاحتلال وعمليات الرايه المزيفه: إسرائيل تنزلق نحو المزيد من التطرّف! - History of American False Flag Operations
الحرب بالوكالة وتفكيك الاتحاد السوفيتي والحرب الباردة: انهيار الاتحاد السوفيتيتدهور قوة الاتحاد السوفيتي وأسباب الانهيار وللحرب الباردة والحرب بالوكالة استرعت ببعض المراجع من: المراجع والمصادر للحرب الباردة
الصوره المستخدمه: he Stargate TV and Movie Conspiracy: Stargate Atlantis, SG-1, and Universe وبمناسبة الصور: الهرم اللي في النص ده شبيه جدا واظن انه هرم من اهرامات الجيزة

الأربعاء، 20 نوفمبر، 2013

المُكَون المجنون للمكنون، قريبا..


هموت واعرف.. إنتا نازل تبص على ايه؟
إحنا مش قولنا قريباً
ده إنتا قارئ غريب

يآ أخي ولسه بتقرا؟
ياعم كفايا قرايا بقى
ارحم نفسك شويه!
ياعم التدوينه دي مش هتفيدك
طيب اعمل حاجه مفيده!
بردو لسه مصمم؟
إنتا حر! "مالم تضر!"

الأربعاء، 6 نوفمبر، 2013

لان التوبه مش سهله.. استرجل.. واوعى تتوب


بسم الله الرحمن الرحيم
السلام عليكم ورحمة الله

اولا انا في قمة الاسف على حجم الصوره الكبير المقصود، انا كنت اقدر اصغرها جدا، لكن تعمدت جدا الف انتباه حضرتك للصوره بشكل يستفزك، وطالما استفيزتك يبقى حواسك هتكون منتبه جدا للصوره المُستفزه دي.. بس والله، نيتي خير.

تخيل معايا ان اليافطه دي اتحط على طريق مصر اسماعلية لمدة 24 ساعه فقط "بقصد الهزار"، كام واحد هيتوه؟، نقول مثلا الف مسافر؟، عشر الاف مسافر؟.
تخيل بس انك لو حبيت تتوب على ذنب زي ده، محتاج المليون مسافر دول يعفوا عنك
تخيل انك متعرفش ولا واحد من المليون مسافر، يبقى هتستنى ليوم القيامه، يمكن يسامحوك
تخيل في منهم 10 لم يسامحوك، ربنا هيقبل التوبه بتاعتك على ال990 شخص، لكن مش هيقبل توبك في ال10 اشخاص، لان ربنا ممكن يسامحك ويغفر في حقه إن شاء، لكن مش بيسامح ولا يغفر في حق عبد من عباده، خصوصا انه مكنش قادر ياخد حقه!

                                                                                   

                             متخيل حـجم الكارثه؟                             

                                                                                   


قيس بقى، كام مره شتمت فيها شعوب بالكامل؟، كام مره اغتبت فيها اصحابك وكام واحد كان مفتون بسبب لبسِك او مشيتِك او طرقيتِك في الكلام يا انسه؟ كام مره أذيت انسان بحاجه رميتها على الارض، سواء اذيت بصره او اذيته هو شخصيا بانه اتكعبل او اتزحلق فيها وحطيت مجهود اضافي على عامل النظافه في الحي بتاعك او مدينتك او دولتك؟
كام واحد أذيته وانتا راكن صف تاني او صف تالت او وقفت ربع ساعه تستنى المدام لما تخلص الكوافير وانتا قافل على حد ورافض تعديه؟، كام واحد اتأذى بسبب انك عطلت المرور او كسرت اشاره او كسرت على واحد، كام واحد وقع عليه ضرر بسبب التدخين السلبي لانك بتدخن جنبه في الميكروباص او التاكسي او الاوتوبيس؟، كام واحد تأذى بسبب البيرفيوم المزعج او الجامد اللي انتا بتستخدمه وحطه بكميه رهيبه او ان رحتك مش كويسه اصلا بسبب قلة نظافتك البدنيه؟
كام انسان تأذى بسبب انه سمعك وانتا بتشتم ولا صوت الموتوسيكل بتاعك قلق نومه وصحاه، او بتضرب كلكس من غير لزوم، كام واحد اتأذى بسبب انك مشغل اغاني بصوت عالي؟ وكام واحد اتأذى بسبب انك يا مدام قررتي تنفضي السجاده من الشباك ولا البلكونه على اللي ماشي تحتها، وكميه التراب اللي دخلت للجيران من الشباك بتاعهم بسبب كده؟ وكام واحد تأذى من اكياس الزبالة اللي حضرتك مش بترميها في مكانها لمجرد ان المكان المخصص بعيد شويه عنك؟
كام واحد كدبت عليه وانتا بتبيع له حاجه؟ وكام واحد "بخست" بضاعته وانتا بتشتريها علشان تقلل تمنها، وكام واحد اتأذي يا دكتور بسبب ان حضرتك مركزتش وانتا بتسمع اعراض مرضه، وكام واحد معالجتوش كويس واجبرته يرجع يكشف عندك تاني؟ وكام واحد مرضه يستحق دوا معين وانتا كتبت له على دوا تاني لمجرد انك واخد من الشركه المنتجه فلوس ولا اتوعدت برحلة على حساب الشركه، وكام واحد اتأذى بسبب ان عمال السفلته مراعوش ربنا وسفلته الشارع كويس فكان فيه مطبات او باظ بسرعه لانه مش معمول طبقا للموصفات الفنيه الدقيقه، وكام واحد تأذى بسبب شجرة قررت حضرتك تشيلها من مكانها، وكام واحد تأذى لانك موقفتش في الطابور، وكام واحد تأذى علشان انتا ليك واسطه او قريب مهم!

احنا لما هنيجي نتوب، في حاجات كتير "كوارث" مش هنقدر نتوب عنها، لان ربنا مش هو صاحب الحق الوحيد فيها علشان يغفر لنا فيها.

احسب معايا كده
لو بس عملت 100 غلطه في حياتك، وفيه عدد 100 واحد اتأذى بسبب كل غلطه على حدى، يبقى 100 غلطه × 100 شخص = 10000 شخص "عشر الاف شخص"
لو سامحك 80 من غلطه، يبقى 80×100=8000 شخص "تمن الاف شخص"
يفضل 2000 شخص لم يسامحوا في حقهم وعاوزين ربنا يجيب لهم حقهم منك، ازاي؟
ان حضرتك تدخل النار بذنوبك في حق الناس دي
اللي ابنه توفى بسبب ان حضرتك معطل الطريق وهو كان في طريقه لمستشفى علشان زوجته تولد
اللي اتزحلق في حاجه انتا رميتها في الارض وقع اتكسرله رجل
اللي صدرة وجعه بسبب التدخين السلبي، او اللي استفزيت حساسيته جيوبه الانفيه بسبب ريحتك سواء حاطط بيرفيوم نفاذ او ريحتك مش نضيفه
اللي سرقت منه محفظته او رفضت ترجعهاله بعد ما لقيتها وهو واسرته تعبوا لمدة كبيره بسبب ان مفيش فلوس، واستلف وترتب عليها مشاكل اكبر وانتا كنت البدايه
واللي وزعت رقم تليفونها على صحابك وقعدوا يعاكسوها واهلها عقبوها بسبب كده
والافلام اللي مش كويسه اللي انتا وزعتها وكانت سبب في ان حد غيرك يعمل معصيه وهي انه يتفرج على الافلام دي ويوزعها كمان لغيره

تخيل بقى انك لو معملتش كل الحاجات دي بنية انك تكف الاذى عن الناس، وان ربنا يسامحك ويغفرلك على ذنوب عملتها في حقه وحق نفسك "بس" ويحبك، تخيل بقى ربنا هيجازيك ازاي في الدنيا والاهم والابقى والاحسن، في الاخرة :)

الخلاصه: متعملش ذنوب مش هتقدر تتوب عنها، ومتعملش ذنوب مش هتقدر تضمن مسامحه اصحاب الحق فيها

السبت، 26 أكتوبر، 2013

كلمات اغنيه حلم هادي - هاني عادل


كلمات اغنيه حلم هادي - هاني عادل


بعد السنين..
صارت الشوارع ديقه، متزوقه
نيون يلعلع.. في الليالي الممسوخين

آلوان تخض، شبه الربيع
وبكام تبيع؟
وبكام تسافر لجل ما..
تحس الحياه

سراب واخدنا لمنتهاه..

مرت سنين.. زي الثواني
 حلم سلم، حلم تاني
لو حلم هادي.. مايكفنيش

رافض اعيش جواكي لكن..
بإيديّا ايه؟
نورك واخدني لأخرتي..
معأني لسه بأيد شموع
شموع بتحلف، بالحنين
يمكن تعيش.. يمكن تعيش



ويابخت من دوّن وخفف

الثلاثاء، 22 أكتوبر، 2013

حاجات بتشغل بالي

بسم الله، السلام عليكم

تدوينه من غير صوره

"إحيانا" بقعد افكر، ايه آخر المشاكل اللي ع النت؟، وبعد تفكير عميق وتعمق في اصل الموضوع عرفت، ان معظم، بل تقريبا كل الخناقات اللي ع النت مكنتش هتحصل ع الحقيقه والعكس صحيح.

ديما بقعد افكر، هو صح الواحد كل ما صوباع رجله الصغير يتخبط يقوم يقعد ع الفيس بوك ويعملها مناحه؟، انا اعرف ان زمان كنا بنشير صورة "وانا كنت بشير تصميماتي بما اني -كنت- مصمم جرافيك" وكنا بنشير صفحة "موفيده" او حلوه، كنا بنشير حاجات تفرحنا، ونصايح لبعض، لكن اشير مشاعري؟، مش عارف ليه مش متقبلها خالص، خصوصا لما يبقى حد كان بيحب وينفصل لاي سبب عن حبيبته، ولا لما صاحب يعمل "الدنيئه" مع صاحبه، الطرف الزعلان يقلب صفحته مناحه.

مفيش اكتر من الكتب، كتب في كل حته كتب كتب كتب، ده انا ذات نفسي فكرت -ورجعت عن التفكير ده- اني أألف كتاب، انا شايف ان احسن من اننا نقعد نألف ليل ونهار كتب، الافضل اننا نقرأ اللي موجود قبل ما نألف جديد، الموضوع بيفكرني باليوتيوب، احيانا بفتح اليوتيوب وانا زهقان بدور على فيديو كويس ولا حاجه، واقعد ادور ساعات على ما الاقي فيديو كويس وجديد، معأن اليوتيوب مليااان فيديوهات وتقريبا الواحد محتاج يقضي عشرات السنين من غير نوم علشان يتفرج عليها كلها، لكن الكويس بيضيع وسط الوحش الكتير اللي موجود "واللي اصحابه فاكرين انه كويس".

الهرجله + الكسل = مصيبه + حب النظام .. كارثه
انا بقيت كسول جدا جدا، لدرجة ممكن تستفزك لو قعدت احكيلك ياللي بتقرا تدويناتي، لكن المشكله اني بحب النظام وبحب اكون منظم ودقيق، لكن الكسل والهرجله حاجتين بيمعوني من اني اعمل الحاجه اللي بحبها، وتقريبا بسبب الكسل بدات افقد اهتمامي بحاجات كتير والاهم اني بدات افقد نشاطي، اعتقد اني لازم اخد خطوه علشان استرجع نشاطي تاني وبالتالي اخف الكسل شويه وابدأ استرجع اهتماماتي.

الخميس، 10 أكتوبر، 2013

الفيلم الوثائقي: الكائن الاخوانجي «الفاضل» | فيِ محاولة لفهم نفسيته

اصفر علشان بقت موضه!

بسم الله، السلام عليكم

في ذات مره من ذوات المرات، كنت بشتري حاجه من سوبر ماركت كان في اشاعات في المنطقه "بتاعتي طبعا" انه اخوانجي، في ست واقفه جنبي، ويبدا الحوار "الجزيره دي قناة خاينه" وعميله، "فلان" مديِّقينها عليه وخايف يخرج اليومين دول، طيب "ام فلان" قالتلك كده فعلا؟
انا واقف زي الاهبل في الفصل طبعا، مش عارف ايه بيتقال ليه، فضلت ساكت لحد ما اللي شغال هناك وجهلي سؤال، انتا بقى مع مين؟ قولتله لو في السياسه انا مش اخوانجي طبعا، ومش سيسي طبعا، قالي ازاي مهو يا كده يا كده، قولتله لا ياعم انا الثورتين لا بأيد حكم العسكر ولا مع الاخوان ومؤيد لـ 30/6، وانتا؟ .. قالي انا زيك "احرار 25" قولتله كويس، بيبيعوا ايه احرار 25 دول؟ قالي مشوفتش المظاهره بتاعتهم امبارح، قولت امبارح؟ .. دول اخوان، قالي لاء اسمهم احرار 25، قولتله طيب، انتا مؤيد لـ 30/6؟ قالي لاء، قولتله ياراجل مش تقول انك اخوان!! فسكت.

فدخلت ست قالتله هي "أم فلان" عاوزه منك ايه، ووجهت كلامها للست اللي واقفه جنبي، كل شويه الناس تعدي عليه "في اشاره للي شغال في المحل" وتقوله هنطلبلك امن الدوله وهنطلبلك القسم ويقولوه سيسي، يرضيكي كده يا أم فلان؟، فانتا قاطعتها موجه كلامي للي شغال في المحل وفي لحظه عمري ما كنت اتوقع انها تيجي واذا فجاه: وايه المشكله لما تكون اخوان، فأبتسم ابتسامه مهزوم وقالي مش عارف بس انا احرار 25!

استكمالا لتلك اللحظه مكملتش كلام "خوفت ارجع اقع فيه واشتم الاخوان ولا اختلف معاه في الرأي، وكنوع من انواع الترضيه سكت وسمحتله يبيع لزبون مش معترض على ان اللي بيبع له، اخوانجي!

من يومها وانا متأكد، ان في شريحه في الناس دي اسمهم "الكائن الاخوانجي" وفي توصيفي وفي محاولة فهمي توصلت لشوية استنتاجات:
يتميز الكائن الاخوانجي بنفسيه تميل دائما وابدا للدفاع، فهو كائن مغيب ومقهور فكرياً والاهم انه مقهور نفسيا نتيحه لانه ملاحق، سواء امنيا، او حتى فكرياً، التركيبه دي من البشر بتخلق انسان دائم التبرير، معدوم الثقه في من حولة دائرة الامان عنده محدوده جدا، قليل التفكير "في حد بيفكر له ديما" 

اهم ميزه في هذه الكائن انه مدافع شرس، سواء فكريا، او بدنيا او امنيا، بمعنى انه عنده استعداد يقعد يتجادل ويتناقش معاك مليون سنه مع اصراره على عدم اقتناعه بكلامك مهما قولت وبررت وفسرت وحاولت تقنعه، لانك بالنسبه له خارج دايره الامان بتاعته، وبالتالي هو لا يثق فيك ولا في كلامك، ده كمان ممكن يدّخل الدين في الموضوع ويستبيح الكذب عليك "بحجه انك كافر او انه بيحاول يدرء الضاره المقدمه على جلب المنفعه، ده غير انه ممكن يستبيح الكذب عليك بحجه انك كافر، حتى لو مقلهاش بشكل مباشر او مقلهاش اصلاً ^^".

في محاولته لدرء الضاره ممكن يتخيل ان فكرك ده فكر "جرثومي" يجب التخلص منه، بايه؟، يكدب عليك، ممكن يكدب على نفسه ويصدق كدبته وبعدين يقنعك بكدبه هو مصدقها، وده بيظهر كتير سواء في الفيس بوك او في التلفزيون او لما تتكلم مع حد منهم.

نرجع تاني لشخصيه الاخوانجي، هي شخصيه غير انهزاميه لكن هشه جدا، بمعنى انه مبيستسلمش بسهوله "ويمكن ميستسلمش ابدا، نتيجة غسيل المخ اللي معمول له" لكن هشاشه الشخصيه نابعه في ايمانه انه مختلف عن العالم، ده بيخلق له حاله تجبره على التبرير الدائم، بيبرر ليه هو مختلف من الاساس، وبعدين بيبرر افعاله كلاً على حدى، وبعدين بيبرر اخطائه.


الجيتو الاخوانجي

دايرة الامان الديقه جدا للاخوانجي هي طوق النجاه "في اعتقاده" وهي سبب تعاسته في "ايماني انا"، لان:
يوم الاخوانجي بيبدا بانه يصحى الصبح يصبح على زوجته الاخوانجيه، يطمن على ولاده اللي بيلبسوا علشان رايحيين مدرسه اخوانجيه، كل مدرسينها من الاخوان، ياكل من الفطار اللي اشتراه قبلها بيوم من سوبر ماركت اخوانجي، ينزل يركب عربيته اللي اشتراها من معرض الاخوانجي، ويروح شغله في شركه او محل الاخوانجي، بيرجع لزوجته الاخوانجيه يطمن على عياله اللي رجعوا من المدرسه الاخوانجيه يتغدى من الخضار اللي "احتمال" يكون اشتراه من اخوانجي، ولو حد من العيال جاله برد ياخده ويروح للدكتور الاخوانجي، ولو لاقدر الله ابنه احتاج عمليه يعملها في المستشفى الاخوانجي باطباء اخوانجيين، ده بخلاف حياته الاخوانجيه في الجماعه واصحابه من الاخوان، وزوجته اللي ممكن تكون بتدرس في درس ولا مجموعه قرأن لمجموعه منهم اخوان ومنهم بيختبروا كمحبين تمهيدا لضمهم!، بيشتري كراريس ولاده من مكتبات اخوانجيه، المحامي بتاعه اخوانجي، والمهندس اللي اخد منه تخطيط البيت اللي بناه، مهندس اخوانجي.

كائن زي ده عايش في جيتو، زي اليهود ايام ما كانوا عايشين في جيتوز في اوروبا بيتجوزوا من بعض "محرم ع اليهود التزوج سواء من راجل او ست لغير اليهود"، زي ما الاخوانجي صبحي صالح قال: الاخوانجي لا يتزوج غير اخوانجيه، طيب واللي احنا "عملناها"!!!! دي نشحتها؟ "استبدلون الذي هو ادى بالذي هو خير"!!!!!!!!!!!!!!، زي ماهو كمان قال: اللهم امتني على الاخوان!!!!!!!!!!!!!ّ!!!! "وعاوز املى التدوينه كلها علامات تعجب واستفاهم واسى وحزن"

الف به ته اخوانجي: انتا اعلى من غيرك، انتا احسن من غيرك، انتا متتعملش غير مع اللي زيك، انتا متقتنعش غير من خلال اللي زيك، التانيين دول اقل منك، بيضحكوا عليك، ممكن يغشوك ويخدعوك، ممكن يكفروك، حرام فيهم فلوسنا، يفضل عدم التعامل معاهم، حلال الكذب عليهم، غير مستحب الزواج منهم، نحن الفئه الناجيه، المختاره، والباقي هالكوًن!

--

شخصيه زي دي، وانسان بالنفسيه دي، تشبع "زي السفنجه" بهذه الافكار الملوسه، تقدر تتوقع منه اي حاجه، لكن مش هنا لب التدوينه، اللي عاوز اقوله:
ان في كتير منهم بيضحكوا على نفسهم اه "اوسااااخ" وفي كتير منهم "بيضمروا" عداء للبلد دي وللمصريين ولكل انسان غير اخوانجي، ده حقيقي، لكن..
في قله قليله منهم مصدقه الكلام ده فعلا، فاكره ان ده طريق ربنا الوحيد "واستفغر الله ان تكون جماعه وسخه زي دي هي طريق ربنا، وطرق ربنا كتير مفيش طريق وحيد (ده الرحمن)" فاكرين انهم كده صح وانهم كده داخلين الجنه، واننا كفار مش علشان فلان قاله، لالا، علشان هو اقتنع، مين اقنعه مش مهم، لكنه مقتنع انك كافر.

"الحل في حل" فكر الجماعه، مش حل الجماعه، الحل اننا ((ندمر)) الفكر ده، و((ندمر)) اي فكر مشابه للفكر ده زي فكر السلفيين انهم هو كمان الفئه الناجيه والباقون وغيرهم هالكون، ده غير السلفيه الجهاديه اللي خارج منها مئات الجماعات الارهابيه.

الحل في حل الفكر، مش حل الجماعه والكائن الاخوانجي ده محتاج اعادة تأهيل حقيقيه، صريحه وواضحه، علشان ننضف نفوخه من غسيل المخ "او بالاحرى تبلور مخه وتشبعه" بالفكر الوسخ ده!

مصدر الصوره: طريق الاخبار


ويابخت من دوّن وخفف

الأربعاء، 9 أكتوبر، 2013

كلام عقيم

بسم الله، السلام عليكم
تدوينه من غير صوره :)


هو ايه الفرق بين التقليد الاعمى والتقليد الصحي؟، يمكن مفيش فرق!، مش عارف، بس مثلا يعني، اللاب اللي انا بكتب منه التدوينه حاليا ده، تقليد اعمى ^^، مش مصدق؟

فيِ برنامج اسمه "العاب العقل" وثائقي بيجي على NatGeoAd، حلقه من ضمن الحلقات عنوانها "القرار لكم" في وسط البرنامج كان فيه اختبار بسيط، في احدى السنيمات، اتفقوا مع بائعه الفشار تقدم حجمين مختلفين من الفيشار، حجم صغير بسعر 3$ وحجم كبير بسعر 7$، وانتظروا، وكانت النتيجه ان الحجم الصغير "3$" اتباع كتير جدا، والحجم الكبير "7$" لم يباع منه.
فزادوا الحماسه، وقرروا يحطوا حجم جديد "وسط" وسعره هو 6.50$ علشان يكون عند بياعه الفشار تلت احجام (صغير: 3$، وسط 6.50$ (سته دولار ونص)، وكبير 7$ وانتظروا، فبدا الاقبال على الحجم الكبير، واتباع كتير جدا جدا! وطبعا قل الاقبال على الحجم الصغير وانعدم الاقبال على الحجم الوسط!

اللي عاوز اقوله ان احيانا تفتكر انك بتختار بمحض ارادتك، لكن تكتشف انك بختار من خيارات غيرك محددهالك، على سبيل المثال، اشتري لاب توب بسعر 3000 جنيه، ولا اشتري لاب توب بسعر 4500 جنيه؟، وانا اساسا مخترعتش اللابتوب ده، او مش محتاجه، او يكفيني لاب توب بسعر اقل من كده بكتير!
ده غير ان في كم كبير من الاحصائيات عن اشياء بنشتريها "يوميا" ومش محتاجين لها!، غير الهدوم اللي ممكن تشتريها وتلبسها مره واحده في عمرك كله "زي بدلة/فستان الفرح".

نرجع تاني للسؤال، هو ايه الفرق بين التقليد الاعمى، والتقليد الصحي؟
نسنتج مما سبق ان: التقليد الاعمى هو فعل شئ انتا لست بحاجه إليه وتفعله لمجرد ان هناك مّن وّجهك لهذا، سواء بطريقه مباشرة "زي خدعة الفشار" او بطريقه غير مباشرة "زي انك تشتري موبايل لمجرد انه مع صاحبك وعجبك!" (تعليق: للي بيسئل، لاء يابو لسان طويل، انا هشتري الـ Samsung Note 2 لاني محتاجه فعلا ^^)
والتقليد الصحي هو "اني اشتري لاب توب فعلا لاني محتاجه" او اشتري فشار كتير فعلا لان الفيلم طويل، او انا بحب الفشار!


اعمل للكلام السابق ده اسقاط على السياسه ازاي؟
"بورص ياسيدي" كانت وجهة نظري من الاول "إن" كان من مصلحة "مورسي العياط" إن "الشفيق" يصفي قصاده "يعني يعيدوا قدام بعض في المرحلة النهائيه" وبرده كان من مصلحة الشفيق، ان مورسي العياط يكسب قصاده!، علشان الشعب يتحط بين
بالنسبه لشفيق: الاسلام الرديكالي "الاخوان واتباعهم السلفيين والجهاديين" ميحكمش، فكنايه فيه، الناس تنتخب شفيق والعكس صحيح
بالنسبه لمورسي العياط: الدولة العميقه (الفلول واعوان مبارك وشلته) ميحكمش، فكناية فيه، الناس تختار مورسي العياط "وقد كان"
كنا بنشوف الحشد والحشد المضاد، دول يقولوا لدول يا فلول، ودول يقولوا لدول يا اخوان، ودول يردوا: فلول احسن ما اكون اخوان، ودول يردوا: اخوان احسن ما اكون فلول! (تعليق: بردو لاء يابو لسان طويل، انا قاطعت)


تيجي في الدستور ^^
نسيب المادة 228 ولا نشيلها؟ نقوم احكام الشريعه ولا مقاصدها؟ نقول الاديان السماويه ولا نشيل كلمة السماويه؟

طيب بالنسبه للدستور اللبيرالي؟، بزمتك، انتا هتناقش واحد بيتكلم في بقاء الماده 228 والماده التانيه، في انك عاوز دستور لبيرالي؟

هع


يابخت من دون وخفف

الاثنين، 23 سبتمبر، 2013

واهلا وسهلا بكم على متن الرحلة المتجه إلى: ارض النفاق

انفصام الشخصية

بسم الله، السلام عليكم

فاكرين في فيلم شنبوه في المصيده بتاع الفنان الله يرحمه مهندس الضحكه فؤاد المهندس، لما الدكاتره كانوا بيحاولوا يشخصوا حالته وقعدوا يتخانقوا: شيزوفرينيا، بارانويا، لسه المشهد ده فاكره وخصوصا ان الكلمتين دول اتقالوا بطريقه مسرحية هزلية اقرب منها لتمثيل، كان فيلم جميل، بس ده مش موضوع التدوينه.
** -لينك علشان تقرا عن الفصام/شيزوفيرينا (او شيزو او سيزو) شويه بدل ما اكتب عنه-

صعب انك تعيش وسط ناس عندها فصام، في النهايه، انتا مش عارف بتتعامل مع انهي شخصيه، اللي بيحبك ولا اللي بيكرهك، اللي عاوز الخير ولا الشر.. وقيس على كده بقى كل حاجه.

لكن في مجتمع، مصاب بالفصام باختياره، يبقى مش مصاب بالفصام ولا حاجه، احنا مجتمع منافق ومش بتكلم عن المجتمع المصري خصوصا، انا بتكلم عن المجتمع العربي كمان، مجتمع اختار النفاق وسيله لتحقيق المبتغى، الغايه فيه تبرر الف وسيله (وسيله وسخه).

قبل ما ابدا، لازم اشير لحاجتين، الكدب غير النفاق، لان الكدب بيخرجك من موقف او مواقف معينه، كدب للموقف، مش للحياه، لكن المنافق، هو المنافق الذي يقول عكس ما يؤمن به، او يؤمن عكس ما يقول، وينطبق الموضوع على الافعال.
كمان لازم اشير إلى ان دي آفه من آفات الانسان (الوسخ): احيانا نحب نجامل حد (النفاق في مصطلح منقح)، يعني اقولك انك لبسك شيك وانتا لابس من ابو اتنين ونص!، او اقولك واو وانتا حاطط (بيرفيوم) تلت خمسات، وده بيتجلى كمان في المجتمعات الغربيه زي القساوسه المتحرشين بالاطفال (واحيانا مغتصبين)، وزي الساسه اللي عايشين حياتهم على طريقه الاغنيه الشهره (انا اللي عشتي حرام × حرام) نفاق في نفاق، وكدب في كدب، وزي الممثلين وكتير من المشاهير (مش كلهم ومش معظمهم).

لكن في مصر والعالم العربي تتجلى صور النفاق في ابهى حلة، النفاق زي ما قال الكتاب، وفي امثله بالهبل على كده، خد عندك

من 16 لحد ما توصل 25 سنه:
البنات: الطرحه على البناطيل سكني-Skinny، المحجبات اللي كاشفين جزء من (او معظم) رسغ اليد (الرسغ هو المنطقه بين الكف والكوع)، والعبط الجديد (العبط هو الموضه في وجهة نظري)، سمعت عن البناطيل اللي بتتشمر ^_^، علشان الخلخال يظهر!، ده غير انها مبتحبش تتعاكس ومصممه تمشي في مجتمع مكبوت بلبس ضيق او ملفت للنظر، ده غير المنقبات (النص لبّه) واجارك الله على النوع ده من المنقبات، والبنات اللي بتكلم 70 واحد بحجه انها بتحبهم، ده غير البنات الايزي (ههههههههه) اللي بتصحاب اي حد بديل تلاقيه (بحجة انها حبشيتو) وبتكلم 4 غيره علشان هي (لسه محتاره)، انزل بقى الكرونيش وخدلك كروز بوت من ابو 10 جنيه في الساعه ده، هتلاقي كوارث، محجبات بيرقصوا ولا عاهرات نوادي اوروبا المرخص لهم بالدعاره.
-
الولاد، قمصان (شعر الصدر) اللي الفتحه لحد الصره دي، العيال الخضرا دي اللي بتمشي زي البنات، يعاكس بنات الناس بس محدش يعاكس اخته ولا مامته!، يشرب سجاير ومخدرات اه، لكن اخوه الصغيره يشرب (يولع فيه)، له خصوصيه في البيت، اوضته محدش يجي جبنها، لكن من حقه يقتحم خصوصيات اخواته عادي، طالما الكبير، يحب ويخرج حبيبته ايزي، لكن اخته (البقره بالنسباله) تحب؟ .. نهارها اسود!

(بالنسبه للبنات، انا مش بتهمهم ولا بحاكمهم ولا ليا ادخل في لبسهم وانا مليش دعوى اصلا بالبسهم، ومش شايف ان الهدوم الضيقه مبرر للتحرش والمعاكسه، لكن انا بردو مع ان البنات تاخد بالها ان مصر لسه مصر، مبقتش اوروبا، تلبس اللي هي عوزاه وكمان تقدر تمنع اللي قدامها من التحرش بيها بسبب لبسها)
 (وانا علشان ولد هنتقد براحتي بقى :P)

من بعد 25 سنه لحد قبل ما ربنا ياخده ب5 سنين كده، ودول ستات على رجالة:
يمشي او تمشي في الشارع يكسر بعربيته على عربيات الناس عادي، لكن محدش يكسر عليه، يكلكس في شوارع الناس وتحت بيوتها ايزي، لكن يشتم ويلعن اللي يعمل كده تحت بيته، يركن ويخلص مشوارع ويرجع يلاقي حد راكن صف تالت وقافل عليه، يقعد يتشم ويلعن فيه، وهو اساسا راكن صف تاني، وقافل على واحد غيره، يرمي زبالته قدام بيوت الناس، لكن يولع في اللي بيرمي زباله قدام بيته، تقول لولادها الكدب والغيبه حرام، واول ما التليفون الارضي يرن، ردي وقولي للحربايه دي انا في السوق، واول ما تشوفها، اموه اموه اموه، ازيك يا "حبيبتي"، تشتري من المحلات الشيك الفخمه عبايه ولا حاجه تلبسها بـ 1000 و2000 جنيه، والمحل كسبان منها اصلا اكتر من 40%، وتتشطر على الغلبانه بتاعت الفجل ولا بتاع الخضار في جنيه ونص جنيه!
تخرج تشتي من الهايبر بمئات واحيانا اكتر من الف جنيه، وتيجي عند كوشك السجاير اللي على اول الشارع وتقولي البيض بتاعك غالي 10 ساغ!
يتجوز على مراته في السر علشان حيوان، وتطلع اسرار بيتها علشان جوزها مش مريحها، والاتنين يلعنوا في بعض للناس من ورا ضهور بعض، ويناموا جنب بعض بليل: تصبحي على خير يا حبيبتي، تصبح على خير يا حياتي!

ده غير الراجل اللي يخلص صلاه في الجامع، ويخرج يحلف لزبون في المحل ميت يمين ان الجزمه دي جملتها 100 جنيه وهو بيبعها بـ 110 علشان يكسب، وهو اساسا اشتراها بـ 50 60 جنيه :)
ولا الست النشاله اللي عملت ولادها ولا وبنتها السرقه وبعد ما تسرق تقول للعيال: الحمد لله ربنا سترها!
اوبس، نسيت حيوانات رمضان: رمضان جانا، وفرحنا به، بعد غيابه، يلا نهجم بقى ع الجوامع علشان ربنا يغفر لنا ذنوب السنه، ويلا نصلي ونصوم الصبح، ونشرب مخدرات بليل، ولا مخدرات يوم الوقفه دي كمان، اوبس ع الكلام.
ولا النايت كلابس بتاعت رمضان، قافلين الصبح وفتحين لحد الفجر ^_^، ده غير الاشكال اللي رايحه وخصوصا البنات، اول ما توصل للكباريه تقلع العبايه السودا وتفك الطرحه، وتقلب ميريام فارس شارع شبرا في دقيقه.

مجتمع ابن كلب، من الاخر يعني!
واخيرا: يود قباط الرحلة المنكوبة المتجه إلى ارض النفاق ان يعلم سيادتكم ان الرحلة اضطرت للعوده إلى مطار المغادره

الأربعاء، 18 سبتمبر، 2013

انا بطلت سجاير ...

بسم الله الرحمن الرحيم
السلام عليكم ورحمة الله وبركاته


تدوينه للتاريخ
انه في يوم 18 سبتمر 2013، الساعه 4:00 مساء (العصر يعني يا مثقف :@)
اقلع محمد سمير عن التدخين
بدأت اكتب في التدوينة دي الساعه 5:27 مساء (بعد العصر اكيد يعني)

الاسباب والدوافع اكيد معروفه،
تعبت وقرفت من السجاير،
نفسي بقى اقصر،
صدري بدا يتعب،
مبقتش بقدر اجري كتير.

بشرب سجاير من زمان جدا -برغم اني لسه صغير-،
كنت مدخن شره، كنت ممكن اشرب عبلتين في اليوم،
اخر فتره وصلت (بالعافيه) ل4 علب في الاسبوع.

ملابسات الاقلاع ^^
عندي برد ونفسي بقى اقصر من الاول وده ساعدني اخد القرار الحاسم،
مطبق من بقالي حوالي 24 ساعه، وده هيساعدني انام وقت اطول شويه،
عندي رغبه حقيقيه اني ابطل، لان زمان كان عندي رغبه لكن مكنتش حقيقيه،
كمان بحاول بقالي سنه اني ابطل، لكن محاولات مش جاده،
لان مكنش عندي رغبه حقيقيه اني ابطل.


وبدات تظهر عليا اعراض الانتسحاب من النيكوتين
خلقي داق (عصبيه) لكن لسه متحكم في اعصابي، زي ما يكون دماغي مش فيا، مشتت ومش مركز، دماغي بتفكر في كذا حاجه ومبتفكرش في اي حاجه في نفس الوقت، ده بخلاف اني حاسس اني دماغي مش بتاعتي اصلا، برغم اني مطبق لكن معنديش رغبه قويه او ملحه اني انام، برغم اني حاسس اني عاوز انام، لكني لو جيت انام مش هنام بسهوله.
دوخه طبعا ده اكيد، وعدم تركيز
اهم حاجه: اني معنديش رغبه ملحه اني اشرب سيجاره، لكن عارف ان مهما فضلت متجنب الرغبه دي، هتظهر عاجلا ام آجلا، ولازم اتغلب عليها.

انا عملت ايه؟
اول حاجه عملتها اني قولت في قراره نفسي وبكل حزم وثقه، انا بطلت سجاير.
تاني حاجه، اخدت علبة السجاير والولاعه وخبيتهم (اه لسه مرمتهمش، بس دي خطوه كويسه اني اخبيهم)
نبهت على كل اللي في البيت، انا بأبطل سجاير، استحملوني، محدش يدايقني لاي سبب، محدش يزعل مني او يزعلني،
محدش يناقشني في مواضيع خلافيه او ياخد رايي في حاجه، محدش يستفزني، باختصار محدش له دعوى بيا خالص اليومين دول.


نصيحتي ليك:
استمر على شرب السجاير، متبطلش
متبطلش غير لما تحس انك عاوز تبطل،
انك لازم تبطل،
ان معندكش خيار تاني غير انك تبطل،
بس انجز قبل ما يفوت الآوان :)

ملحوظه:
لو انتا متابع للمدونه "ده لو يعني المدونة العجيبه دي ليها متابعين اصلا!":
شوفلك اي حاجه اعملها اليومين اللي جايين دول، لاني في الغالب مش هكتب اليومين دول لحد ما ابطل

الأربعاء، 11 سبتمبر، 2013

عهر عاهرات البياده :)

بسم الله الرحمن الرحيم
السلام عليكم ورحمة الله وبركاته

الموضوع ما يختلفش كتير عن عهر عاهرات الحكام!

ايام مبارك، كانوا كتير عاهرات على اسره رأس الدولة، اذكر مثلا الداخليه .. كنت تقدر تجيب سيرة مبارك بسوء؟، امن الدولة كانت هتلعقك!، كمان كان في الحزب الواطي (الحزب الوطني)، معهد المعرضين الاول للسلطة، معهد لجميع خدمات التعريض، من تبرير إلى تسفيق، من نفاق ورياق إلى تجميل صورة، من دعم إلى مؤازرة، عاهرات الحكام كتير، مش هذكر اسماء، لكن فاكرين جمعه قندهار؟ والهتافات اللي للمجلس العسكري؟ .. واول قرار اخده العبيط، كان انه اقاله، وجاب غيره، عهر عهر يعني!

فاكرين ايه اللي وداها هناك، ولابسه ع اللحم؟ الشيخ بتاع يا واد يا مؤمن، طيب فاكرين (لا مانع من ترشح السيد جمال مبارك) ولا (مبارك ابو المصريين)، ابناء مبارك، الحالمون بعودة دولة البرطعه، عاهرات الحكام في مصر اكتر من الهم ع القلب، اه والمصحف، ولو قعدنا نعد ونذكرهم هناخد وقت كتييير علشان بس نقراهم، فمابالك باني افتكر ومابالك باني اكتب عن مواقفهم، واساسا مش حابب -اوسخ- المدونه بتاعت باسماء ناس ملهاش لزمه في الحياه، غير انها ليها لسان، هي دي شغلانتهم!

عهر المحكوم ده احيانا بيبقى مش بإيده، هو زي ما تقول كده، معندوش مبدء، فالتيار بيرميه ورا اي حد يشوف انه واكل الجو اليومين دول، على سبيل المثال، تلاقي ان ابناء مبارك، هم هم، جامعي توقيعات عمر سليمان الله يجازيه، هم هم، اللي كانوا عاوزين طنطاوي رئيس، هم هم، اللي انتخبوا شفشق، هم هم، اللي نصهم بيجري ورا الفريق السيسي.

الفريق السيسي!!!

كل ما اشوف حملة دعم الفريق السيسي اللي لسه مرشحش نفسه اساسا افتكر تشبيه كنت بقنع بيه حد قريب، مش معنى ان استجدع معاك النهارده، يبقى جدع!
مش بشوه في السيسي، معملش حاجه بالعكس، ساند رجالة 25 يناير بانه وقف جنب الحق واختار مصر برغم ان كنت قلقان منه علشان السمعه اللي طلعت عليه وانه احتمال يكون اخوانجي او قريب من التيارات الاسلاميه، مكنتش قلقان ع الجيش لان الجيش مش بتاع السيسي والسيسي لو كان اخوانجي -ده لو كان- ميقدرش يأخون الجيش، جيش مصر مش شوية كتائب سهل التأثير عليها، ولا هو جيش صغير وسهل استمالته او التحكم فيه لمصالح شخصيه او فئوية.

بالرجوع تاني للجدعنه، مش شرط يكون السيسي يصلح قائد لبلد زي مصر سياسيا واداريا علشان مجرد انه ساند الثورة، مينفعش اقعد اجري اتمسح فيه واعمله بطل وقائد مغوار علشان وقف جنب الحق، ربنا يجازيه، واحنا نقوله -شكرا يا سيسي، بس مطلعش اجري وافضل الحس في البيادة واقوله ونبي اترشح علشان انتخبك، افرعنه ليه.

بلد متعملتش ولا هتتعلم الدرس، احنا اول من فرعن الفراعنه، واحنا اللي لسه بنفرعن الفراعنه برده!

حاجه .. تفقع (المراره)

السبت، 31 أغسطس، 2013

إنتبهْ مِن فضْلِك ألثوّرة ترْجع إلى الخلف - 30/6 تصحيح ثوري :)


تصحيح مسار

بسم الله الرحمن الرحيم الرحيم
السلام عليكم ورحمة الله وبركاته


لكل اللي ميعرفنش، أنا محمد سمير، موليد سنة 1992، تحديدا 16/6، انا اللي كان عمري 19 سنه في ثوره 25/يناير 2011 وانا اللي عملت كل اللي اقدر عليه، علشان انزل الناس، وانا اللي شتمت واتشمت بسبب ثورة يناير، من عيال مبارك وغيرهم من اللي كانوا مصدقين، موهومين، مقتنعين ان مصر مبارك، كانت جنه!، بس الحقيقه انها لا كانت مصر، ولا ينفع تبقى مصر مبارك، مصر هتفضل مصر .. وبس.


نفس الشخص اللي شارك في ثورة 25/يناير 2011 هو نفس الشخص اللي مش اخوان، واللي بيكرهم، هو نفسه اللي مرضاش يعصر ليمون لما جه وقت العصر، وقاطع، وهو نفس الشخص اللي اتمرد لما حان وقت التمرد، علشان مصر كانت بتتحول واحده واحده من مصر وبس، إلى مصر الاخوان.

انا من اصحاب ثورة يناير، مش اللي كان قاعد ع الكنبه بيأزأز لب وبيستنى يشوف مين هيفوز علشان يرفع رجليه ويصقفله، انا من اللي شارك في 25 يناير، مش من اللي نزل في مصطفى محمود يقوله احنا اسفين يا ريس، انا من اصحاب ثورة 25 يناير مش من اللي ركبوا عليها بعد ما نجحت.

وانا نفس الشخص اللي اخوه كان بيتعالج عند دكتور "محب" واحتمال يكون "عامل" ومعرفتش غير يوم ما كان بيعمل عمليه في مستشفى اخواني وكنت بشتم فيهم في قلب مستشفاهم، وانا طالع ونازل كنت اشوف صوره مرسي في الرسبشن اتحسبن عليه قدام موظفين الرسبشن كلهم، وانا نفس الشخص اللي مرضاش يشرب بق ميه من المستشفى ونزلت اشتريت ميه من فلوسي.

انا نفس الشخص اللي قعد يضحك ويضحك معاه كتير من اللي كانوا في المستشفى على كتاب انجازات مرسي اللي لقيته بالصدفه في الاوضة اللي بات اخويا فيها ليلة الوحيده في المستشفى.

يبقى انا لما اقول على 30/6 2013 تصحيح ثوري، تبقى تصحيح ثوري، لاني وقت ما جات تمرد اتمردت، ومبخلتش على تمرد زي ما انا مبخلتش على يناير، كان اخويا في المستشفى بيعمل عمليه "خفيفه الحمد لله ونجحت" وانا بجري عليه، كنت بقنع الناس في كل مكان اقابلهم بانهم يمضوا على استمارات تمرد وينزلوا يوم 30/6.

--

يوم ما وافقنا ان الاخوان وبقية "المتأسلمين" يدخلوا وسيطنا في الميدان -بحجة حمايه شباب الجماعه لينا- (ايوه انا كنت مصدق كده في الاول، ماهم كانوا لازم يقوموا بدور بردو!) وافقنا اننا نسمح لاي حد غير ثوري انه يكون وسطنا، وايوه انا عندي تصنيف عنصري بحت، في انسان ثوري، وإنسان غير ثوري!!!!
زي ما في تصنيفات عنصريه تانيه كتيره، في نساء وفي رجال، في شباب وفيه شيوخ، فيه ابيض وفي اسود، وجود هذه النوعيات هو امر محتوم، ولما اجي اتكلم عن هذه النوعيات لازم اسميها بإسمها، لا يعني عنصريه، لكن انا قولت اني عنصري علشان اريح اي حد هيفكر يقول عليا عنصري، لو كانت تصنيفات ثوري وغير ثوري هي تصنيفات عنصريه، نعم انا عنصري، لكني لم اتعمد ان اكون عنصري، انا بس بوصفات التصينفات دي في المجتمع المصري!!!!!!

ثوار 25/يناير، نزلوا يوم 30/6؟ المفاجئه، ان لو ثوار 25/يناير مكنوش نزلوا يوم 30/6، مكنش هيبقى في يوم 30/6 اصلا!
30/6 هي بمباركه ثوريه من ثوار 25/يناير
وايييوه، كان وسطنا فلول، بس معلش معلش، كان في يوم من الايام وسطنا اخوان :)
هي الثورات كده، لازم في طرف مبيحلقهاش غير لما تخلص علشان يركبها :)
بس المرادي الفلول مش هتركب، لان الثوره كانت اصلا على اللي هم فلولهم!

بس كده

الثلاثاء، 27 أغسطس، 2013

التوبة مقبولة إلا في وقت الحرب / دينا الوديدي - دين الجدعنه

بسم الله، السلام عليكم

 دينا الودادي - دين الجدعنه
كلمات: مصطفى ابراهيم - جرجس شكري
 
--
أدين بدين الجدعنه وبدين رفاق الدرب
وبقولة إحنا مش أنا في المعمعه والضرب
وبدين ما كنت مصدقهُ في المعركه الاولى
وبدين جثث في المشرحه، أسميها مجهوله

زينوا جسمه باللى عندنا ماحنا سبايا وراحوا أهالينا
زينوا جسمه باللى سابوه خربوا بلادنا و الطفل قتلوه

وادين مّن ساب على الأسفلت اخواته مقتوله
واقوله التوبه مقبوله إلا في وقت الحرب

الأربعاء، 21 أغسطس، 2013

انا اللي داس Restart

كله معايا؟ .. يلا يلا ..

بسم الله، السلام عليكم
القصه بدات كده


كان ياما كان،
كان في شعب مخنوق من طاغوت مفتري، اسمه ايه يا حلوين؟ .. محـمـد حـسني مبــارك، قام الشعب لما جاب اخره، نزله في الشوارع علشان يمشيه، وقد كان
ومشي الطاغوت مــبــارك الملعون..

كان في شعب مخنوق من طاغوت مفتري، اسمه ايه يا حلوين؟ .. حكم المجلس العسكري، قام الشعب لما جاب اخره، نزله في الشوارع علشان يمشيه، وقد كان
ومشي الطاغوت العسكري المعلون..

كان في شعب مخنوق من رئــيـس اهـــبـل، اسمه ايه يا حلوين؟ .. محمـد مرسـي العـيـاط، قام الشعب لما جاب اخره، نزله في الشوارع علشان يمشيه، وقد كان
ومـشي الاهبل محمد مرسي العياط..

كان في شعب مخنوق من ...

--
عارفة سواد العسل اهو ده اللى حالك ليه وصل
ازاى قوليلى مكملة وكل ده فيكى حصل

يا بلد معاندة نفسها يا كل حاجة وعكسها
ازاى وانا صبرى انتهى لسه بشوف فيكى امل

الاثنين، 19 أغسطس، 2013

كده هنلوث تراب مصر بدم الغزو

بسم الله


احنا لا سوريين بنهاجر، ولا ليبيين بنهرب من الحروب، احنا مصريين يا كلاب، مصرين طول عمرهم معروفين بجدعنتهم، بالعدوان الثلاثي واكتوبر 73 وحرب الاستنزاف والتاريخ فيه مئات المعارك والحروب اللي سطرت اسم مصر والمصريين والجيش المصري بحروف من نور على قائمه الدول التي لا يمكن اختراقها ولا هزيمه شعبها

انا نفسي ده يحصل، علشان التاريخ يزود سطور في كتاب مصر المشرف واسمي يكتب جنبه شهيد وبطل، وكتيير نفسهم ده يحصل علشان نرجع روح المصري القوي اللي جوانا

اعملوها وشوفوا المصريين اللي ديما جدعان، اللي ساعة الضرب تلاقيهم اول ناس بيجروا عليه يشوفوا في ايه
والله العظيم والله العظيم لو ده حصل، هتبقى يا مصر مقبره تاني للغزاه، التاريخ كله هيتغير لو ده حصل

نصيحه لبريطانيا وللملكه اللي مخها خرف: إعمليها :)