حذف صورك من على الانترنت عموما وبعض المواقع خصوصا

بسم الله الرحمن الرحيم

السلام عليكم ورحمة الله

اولا، المقال ده مش تطبيقي يعني مش هذكر خطوات العمليه خطوه بخطوه

هو مقال او تدوينه علشان تفهم انتا او انتي لازم تعملوا ايه لما تتعرض خصوصيتكوا للإنتهاك على الانترنت

قبل اي حاجه، علشان نتأكد ان صورتنا على الانترنت فعلا في طريقه واحده بس اعرفها وهي طريقه من وجهة نظري فيها خطوره (تابع القراءه علشان تعرف الخطوره) لكن مش اوي، وكمان علشان تعرف صورك فين بظبط على الانترنت يعني تتعقب صورك.

الطريقه كلأتي:

هنستخدم جوجل صور ويفضل جوجل عالمي اللي هو www.google.com

مش جوجل مصر او جوجل السعوديه، جوجل عالمي

واللي صفحة الرئيسية عنده جوجل بلد يدخل على اللينك ده هيتحول جوجل عالمي على طول

http://www.google.com/ncr

تاني حاجه من فوق تضغط على كلمة images او صور، طبعا هتتحول على بحث الصور بتاع جوجل

وهتضغط على ايقونه البحث بواسطة الصوره - Search by image

صورة ايقونة جوجل بحث بواسطه الصوره - Google Search by image

ارفع الصوره من جهازك او حط رابط الصوره لو كانت مرفوعه على موقع بالفعل ودوس بحث بواسطة الصوره بالإنجلش - Search by image

وبكده هيجيلك نتائج البحث بكل المواقع المتضمنه للصوره اللي بحثت عنها

*الخطوره في الموضوع ده: ان جوجل بتخزن الصور المرفوعه على سيرفرتها، بس لا تستخدمها، بمعنى انها مش بتحطها في نتايج البحث او بتنشرها، هي بس بتحتفظ بيها علشان تقارنها بصور تانيه او حاجه زي ما هم بيقولوا.

لو لقيت صورك على الانترنت، تعمل ايه؟

اولا- لازم تبلغ مباحث الانترنت: لان مباحث الانترنت او مكافحه جرائم المعلومات دي اكتر جهه هتساعدك في انك تتعقب اللي عمل كده  خصوصا لو كان بيبتزك، وانك تحذف الصور بتاعتك او الفيديوهات او اي شئ يمس خصوصيتك عموما من على الانترنت وهيقدمولك المشوره والمساعده في ده، ويفضل انك تروح مع محامي لكن مش شرط، لانهم هناك متفاهمين ومتعاونين عن باقي قطاعات الداخليه ومحدش يسئلني ازاي وليه!! -- ودي البيانات بتاعتهم.

مباحث الانترنت - مكافحة جرائم المعلومات

الإدارة العامة للمعلومات و التوثيق:

العنوان: مبنى وزارة الداخلية شارع الشيخ ريحان باب اللوق وسط البلد 

27921490 - 27921491 - 27921487

مع مراعاة اضافة 02 من خارج القاهره

و202 من خارج مصر

ثانيا - صوّر بطاقتك او جواز سفرك: لازم تكون مستعد انك تثبت شخصيتك قانوناً: بمعنى انك تصور صوره بطاقتك او يفضل جواز السفر، ولازم تكون بتعرف انجلش كويس، او تجيب حد يساعدك في موضوع الانجلش ده.

ثالثا - احفظ جميع نتائج البحث اللي لقتها لما استعملت جوجل صور في ملف .txt: علشان تعمل ملف .txt بتروح على اي مكان فاضي على سطح الشاشه، وتدوس كلك يمين وبعدين اقف على كلمة New ومن القائمه الجانبيه دوس على Text Document، وادخل على جميع الروابط اللي فيها صورتك وخدها كوبي (طباعه) وبست (لصق).

لازم تكون بتعرف انجلش كويس، او تجيب حد يساعدك في موضوع الانجلش ده علشان هنبدء نستخدمها اهو

--لازم تفهم--

رابط الصوره ذات نفسه هيكون شكله في الغالب كده

http://examplewebsite.com/image.jpg

ورابط الصفحه اللي فيها الصوره بتاعتك سواء على شكل رابط او معروضه هيكون في الغالب شكله كده

http://examplewebsite.com/page

http://examplewebsite.com/page.html

http://examplewebsite.com/image.php

http://examplewebsite.com/page.php?=f1

اللي مطلوب انك تحفظه هو رابط الصفحه اللي فيها صورتك، مش رابط صورتك

رابعا - ابدا التبليغ: ادخل على جوجل بحث واكتب اسم الموقع اللي فيه الصوره بتاعتك من غير اي اضافات جنب الرابط غير اتمداد الرابط، بمعنى؛

لو كانت الصوره بتاعتك في صفحه http://examplewebsite.com/page اكتب في جوجل اسم المواقع بس كلآتي

examplewebsite.com

ثم اكتب جنب اسم الموقع الجمله دي: report privacy violation

علشان تبقى جمله البحث على بعضها زي كده

examplewebsite.com report privacy violation

ولو كان الموقع .net هيبقى

examplewebsite.net report privacy violation

خامسا - دور في نتائج البحث: دور على نتيجه تابعه للموقع اللي انتا لقيت صورك عليه، وانا لما كتبت في البحث الجمله الاتيه: tagged.com report privacy violation ظهرلي من ضمن نتائج البحث موقع http://safety.tagged.com/reportabuse ولما دخلت على الصفحه لقيت معلومات قيمه عن كيفية التبليغ عن صورة في الموقع تنتهك خصوصيتي ولو اتبعتها اكيد هشيل صورتي "إن وجدت يعني" من على الموقع.

طيب لو لم يستجيب الموقع بحذف صورك من عليه خلال 5-7 ايام؟

هترجع تاني لجوجل وتكتب الجمله دي email OR contact

وبعدين اكتب اسم الموقع متبوع بالامتداد بتاعته examplewebsite.com علشان يكون كده

 email OR contact examplewebsite.com

**لازم تكون كلمة OR حروف كبيره**

شوف النتائج اللي ظهرت لك واختار النتيجه التابعه للموقع اللي عليه صورتك، وانا في حالتي ظهرت لي النتيجه دي

http://contact.tagged.com

http://about.tagged.com/contact/

وبعدين هتدخل على رابط التواصل مع الموقع وهتملى بياناتك وتبعت رسالتك باللغه الانجليزيه ويفضل تكون انجليزية صحيحه دقيقه لغويا، ولو مطلوب منك "تختار: من ضمن خيارات موجوده مسبقا" اختار ان تكون رسالتك ليها علاقه بالخصوصيه او انتهاك الخصوصيه والعنوان بتاع الرساله لازم يكون واضح جدا انك باعت الرساله بخصوص  (انتهاك خصوصيتي - Violation of my privacy).

لازم تعرف <-- ان اللي بيقرأ رسالتك ده إنسان زيي وزيك، بلاش تستفذه او تهدده، لانه في الاخر شغال في الشركه دي مش صاحبها، يعني لو قولتله انك هترفع عليهم قضيه وهتولع في الشركه هو مش هيهمه، لانه ببساطه مش عليه ضرر!

حاول تستعطفه، وتفهمه ان خصوصيتك منتهكه و ان صورتك او الفيديو بتاعك مسروق واللي حاطه شهّر بيك او بيبتزك وانك بتترجاه يمسح الصوره موضوع الرساله

متنساش <-- تبعت صوره من بطاقتك او جواز سفرك وتنوه إن ده اثبات شخصيه يثبت ان الصوره او الفيديو بتاعتك، ولازم تعرفه انك بلغت التبليغ العادي بالطريقه المتبعه وانك استنيت فتره X من الايام ولم يتم تمرير البلاغ او التصرف فيه، وعليه انتا بتطلب انه يتعطف ويمسح الصوره لانها بتسبب لك مشاكل وتشكره على انه قرأ رسالك وتقوله انك متابع الموضوع لو رد عليك

ومتنساش كمان تستخدم اميل انتا بتسخدمه علشان لو كان فيه رد عليك تشوفه وتتابع معاهم الخطوات المطلوبه، يمكن يطلبوا منك حاجه زياده او يسفسروا عن حاجه

احذف نتائج بحث جوجل اللي ظهرت لك في البحث بواسطه الصوره

ادخل على الرابط ده https://www.google.com/webmasters/tools/removals?pli=1 (لازم يكون عندك حساب في جوجل) ولازم تسجل في خدمه Google Webmaster ودي حاجات سريعه ومشروحه مليون مره على الانترنت، خد الرابط بتاع (الصفحه) مش رابط الصوره ذات نفسها خده كوبي وباست (نسخ ولصق)، ودوس على زرار  Create a new removal request وبعدين حط الرابط اللي اخدته كوبي في خانه رابط الموقع ودوس زرار Continue

كرر العمليه دي مع جميع الروابط بتاعت الصفحات اللي فيها الصور بتاعتك على الانترنت كللللها

 وانتظر يومين تلاته هتلاقي الرابط اتمسح إن شاء الله من نتايج بحث جوجل

ولو عملت كل ده ولسه صورك متمسحتش من الموقع اللي صورك محطوطه فيه، او من نتائج بحث جوجل، او من جوجل والموقع اللي فيه صورك مع بعض، يبقى ادخل ابحث عن طرق تانيه من خلال البحث في جوجل عن الكلمة دي: report privacy violation

بكره إن شاء الله هحدث التدوينه وهشرح طريقه مسح الصور من على الفيس بووك كمان لان الطريقه دي مطلوبه ومهم اننا نعرفها

انا عاوز البوست ده يوصل لاكبر عدد من الناس، فياريت تساعدني بنشر الموضوع حتى لو مش هتذكر اسمي انا مسامح

لو حابب تنقله في مدونتك او موقعك او لو حابب تعمله شير على الفيس بوك في صفحتك او بروفايلك يبقى عملت فيا خدمه

لو انتا لم تستفيد يمكن غيرك يستفيد وهي معلومات يمكن تكون اساسيه وصغيره او بسيطه بس في ناس كتير متعرفهاش

وفي ناس كتير بتحبث عنها اكيد، فساعد غيرك على قدر استطاعك علشان ربنا يساعدك لو وقعت في ديقه

حذف صورك من الانترنت عموما وبعض المواقع خصوصا

حذف الصور من facebook الفيس بوك

حذف الصور من tagged

Viewpoint at إسلام, Why we're مسلمين؟

بسم الله الرحمن الرحيم

السلام عليكم ورحمة الله وبركاته

تحت شعار (قليل من الكفر يصلح الإيمان) هفكر معاكوا بصوت عالي

هو ربنا مكنش قادر يجبر إبليس يسجد لآدم؟

طيب ربنا مكنش قادر يمنع ابليس منه انه يُغويِ آدم علشان ياكل من شجرة التفاح؟

طيب ربنا مكنش يقدر يمنع آدم انه ياكل من شجره التفاح؟

ده .. لُب العقيده خد بالك

الحكايه بدات كلأتي

وَإِذْ قُلْنَا لِلْمَلاَئِكَةِ اسْجُدُواْ لآدَمَ فَسَجَدُواْ إِلاَّ إِبْلِيسَ أَبَى وَاسْتَكْبَرَ وَكَانَ مِنَ الْكَافِرِينَ {34} وَقُلْنَا يَا آدَمُ اسْكُنْ أَنتَ وَزَوْجُكَ الْجَنَّةَ وَكُلاَ مِنْهَا رَغَداً حَيْثُ شِئْتُمَا وَلاَ تَقْرَبَا هَـذِهِ الشَّجَرَةَ فَتَكُونَا مِنَ الْظَّالِمِينَ {35} فَأَزَلَّهُمَا الشَّيْطَانُ عَنْهَا فَأَخْرَجَهُمَا مِمَّا كَانَا فِيهِ وَقُلْنَا اهْبِطُواْ بَعْضُكُمْ لِبَعْضٍ عَدُوٌّ وَلَكُمْ فِي الأَرْضِ مُسْتَقَرٌّ وَمَتَاعٌ إِلَى حِينٍ {36} [البقرة:34-36]

اللي افهمه انا وسيادتك من القصه دي ان ابليس تحدى ربنا واغواهم وطلعهم من الجنه بانه خلاهم يكلوا من الشجره اللي ربنا قال لهم متجوش جنبها، وبكده ربنا خرج آدم وزوجته من الجنه ونزلهم الارض وقالهم بعضكم لبعض عدو ولكم في الارض مستقر ومتاع إلى حين، ونرجع نكرر الاسئله تاني: 

هو ربنا مكنش قادر يجبر إبليس يسجد لآدم؟

طيب ربنا مكنش قادر يمنع ابليس منه انه يُغويِ آدم علشان ياكل من شجرة التفاح؟

طيب ربنا مكنش يقدر يمنع آدم انه ياكل من شجره التفاح؟

والاجابه: طبعا كان قادر، وهنا اللُب، لُب العقيده!!

خد بالك معايا من الحته الجايا دي ياللي بتقرأ

ربنا ساب ابليس بمزاجه ولم يجبره انه يسجد لآدم، وساب أبليس بمزاجه يُغويِ آدم، وساب آدم بمزاجه يسمع كلام إبليس

وهنا اول قاعده في الإيمان عموما لا إكراه في الدين، ولا إكراه في اي شئ على الاطلاق

يعني انتا مينفعش تجبرني ابقى مسلم او مسيحي، مينفعش تجبرني ابقى سني او شيعي

مينفعش تجبرني اتحكم (بلإسلام) او بالمسيحيه!

انا اللي اختار

وعلشان كده انا بقول ان ربنا من رحمته بينا هو اللي اسس لمفهوم الديمقراطيه!!

طبعا بالمفهوم اللي نعرفه اليومين دول مش مفهوم سقراط وارسطو ^_^

ملحوظه رفعيه: انا مش بقول ان الديمقراطيه هي فلسفه، ولا بقول انها اعظم نظام حكم، بس على الاقل هي احسن نظام حكم متعارف عليه حاليا في اختيار الاصلح والاحسن من بين الموجودين، وعلى الاقل هي احسن من الملكيه اللي بتجبر شعب كامل على حاكم لمجرد ان والده هو من اختاره @BBC عربي: أمير قطر حمد بن خليفة يسلم السلطة إلى ولي العهد تميم بن حمد آل ثاني ولا حاكم لمجرد انه الابن الاكبر بين اخواته!!، او حاكم لمجرد انه صحي بدري -على رأي عمرو اديب- وعمل انقلاب زي الاخ بتاع السودان عمر البشير اللي انقلب على الصادق المهدي، وفي امثله كتير زي دكتاتوريات مزبلة التاريخ وملوك وسلاطين كانت المؤامره هي طريق وصولهم لعروشهم.

هو ربنا مش قادر يصلح حال الكره الارضيه في ثواني معدوده؟، طيب ليه ده مش بيحصل!

القاعده العامه <لا إكراه في الدين هي مش قاعده عامه على التدين بدين الإسلام بس> هي قاعده عامه تنطبق على اي/وكل حاجه، بمعنى انه:

• لا إكراه في الدين (مسلم، مسيحي، بوذي، ملحد، بتعبد البقر) براحتك
• لا إكراه في العمل (تشتغل محامي، طبيب، عامل نظافه، جاسوس) براحتك
• لا إكراه في الحجاب (تلبسي حجاب، تلبسي من غير هدوم) براحتك
• لا إكراه في الجواز (تتجوز ناديه، او منى) انتا اللي هتشيل الليله ^_^
• لا إكراه في طريقه حياتك (تصحى بليل، تنام بليل وتصحى الفجر) انتا وظروفك
• لا إكراه في اللي يحكمني (يحكمني مسلم، يحكمني علماني، انا اللي احدد)
• لا إكراه في طريقه الحكم (انا احب اتحكم بنظام ديمقراطي، اسلامي، علماني، ملكي او جمهوري) انا اللي اقول

لا إكراه في اي حاجه وفي كل حاجه لسبب بسيط واقرأه مره واتنين وتلاته، واقرأه كويس اوي اوي اوي

لو انتا مسلم وانا اجبرتك تغير دينك، يعني جيت لك في يوم وقولتلك يا <عبدالله>، انتا هتغير دينك يإما هتموت انتا واسرتك كلها ومش اي موته لاء، ده انا هسلخ جلدك بميه نار قبل ما اقطع كل حته فيك وبعدين اولع فيك ولو لسه عايش انتا واسرتك بعد كل ده، هحطك تحت قطر، فأنتا علشان تتقي شري، قولتلي انا غيرت ديني، انتا بقيت مسيحي كده؟، ولو حصل العكس، ينفع مسيحي يَسلم بالترهيب؟، إسلامه هيتقبل؟

بظبط هي كده الحياه، ربنا عاوز كل واحد براحته خالص، علشان يوم القيامه ميقولش ده انا كنت مجبر يارب، ده انا كنت خايف يارب، ده انا كنت مهدد يارب.

هديك مثال تاني يبسط لك موضوع الترهيب، هفرض اني عندي مشكله في الحمام بتاعي وجبت سباك يصلحها، وبقول للسباك ده الشغلانه هتاخد قد ايه وقت وفلوس، قالي هتاخد 10 ايام و100 جنيه، جيت انا رفعت مسدس في نفوخه وقولت له، هتاخد 5 جنيه بس وقدامك 10 دقايق تخلص فيهم
تفتكر الراجل ده هيقدر؟ اكيد لاء، بس هو علشان خايف انه يموت -هيلكلك- اي حاجه كده ويغور من الوش المفتري اللي جابه ده، هكذا هي الحيااااه، ربنا قالك ادي الطريق الصح، وادي الطريق الغلط، وانتا عليك تختار بمزاجك هتمشي في انهي طريق، علشان يوم ما تقف وتتعرض عليا تبقى مختار بمزاجك محدش اجبرك على حاجه وبالتالي تستاهل الثواب او العقاب.

حتى في الاديان، في الاسلام وانا اعتقادي انه الدين الصح، وعند المسيحي المسيحيه صح، وعند اليهودي اليهوديه صح، ولما نقف قدام ربنا ساعتها ربنا يحاسبنا بقى زي ما هو شايف.

الموضوع مش عقائدي او فلسفي ومش مستاهل كلام كبير وتقيل ورخم، هي ببساطه وجهة نظر في الاسلام وليه احنا مسلمين

احنا مش مسلمين علشان ده اللي وجدنا عليه ابائنا واجددنا، انا عن نفسي قريت في ديانات كتير غير الاسلام، وانا عن نفسي فعلا اتولدت مسلم والحمد لله على النعمه دي، بس ده وانا صغير، وانا كبير الحمد لله تاني اني سبت كل الاديان دي "واخترت" الاسلام