رسالتي لكل شاب وكل فتاة

بسم الله الرحمن الرحيم، رسالتي لكل شاب وكل فتاه ان المدونة لاتزال تحت الانشاء والتطوير والتعمير، تدوينات قليله انا عارف، ومش مهم لاني مش هدفي الاول اني اكون مدون وياااه واوفر والكلام ده، انا بكتب اللي انا حاسس اني حابب اشاركه مع الناس، وده غالبا مابيحصلش كتير، الصبر مفتاح الفرج ولو صبرت عليا سنه ولا تلاته كده .. احتمال تلاقي المدونة شكلها يعجبك!

الاثنين، 6 يناير، 2014

طبعا كلنا نسينا سد النهضه الاثيوبي :)

بسم الله، السلام عليكم

الكل عاوز يكبر على قفاك، دي ادق جمله لوصف المرحله اللي بتمر بيها مصر و وزارة خارجيه مصر المترهله

امبارح او اول امبارح تقريبا، قطر، طلعت البيان المعروف، ومصر ردت بايه؟ بإستدعاء السفير القطري لتبليغه بان مصر رافضه القرار، يا فرحتي!، وامبارح او النهارده الصبح، أُعلن عن فشل الجولة التالته من المفوضات الثلاثيه بين مصر واثيوبيا والسودان، والسبب؟: مصر قدمت 3 مقترحات واثيوبيا رفضت حتى تتناقش فيهم، ده غير ان في كلام ان سد النهضه هيحجز مياه مش هتستخدم في توليد الكهربا، اللي هي الوظيفه الرئيسيه والاساسيه "ويمكن الوحيده" للسد!

وتوصيف كل اللي بيحصل ده، سواء من قطر، او اثيوبيا، او حتى تركيا، ان مصر مش واخده مكانها كويس، وكل الدول دي عاوزه تاخد مكان على قفانا :)، يا خوفي يجي اليوم اللي مصر متلاقيش فيه كوبايه الميه، مصر هبة النيل، وهبة دي تبقى ولامؤخذه كده، مرات ابوك :)


ايه المانع من تأسيس مجلس حرب؟، يضم يرأسه رئيس الجمهوريه المؤقت، وينوب عنه وزير الدفاع، بعضوية كل من وزير الدفاع والانتاج الحربي، وجميع قائدي الجيوش، والاسلحه، ووزير الري ووزير الماليه، والبيترول والصحه، والخارجيه والاتصالات والطيران المدني
ويكون اول بيان له، انه يتابع ما يدور حول سد النهضه الاثيوبي عن كسب :)

بس، وتبقى الرساله وصلت ووصلت اوي كمان

ويابخت من دوّن وخفف