رسالتي لكل شاب وكل فتاة

بسم الله الرحمن الرحيم، رسالتي لكل شاب وكل فتاه ان المدونة لاتزال تحت الانشاء والتطوير والتعمير، تدوينات قليله انا عارف، ومش مهم لاني مش هدفي الاول اني اكون مدون وياااه واوفر والكلام ده، انا بكتب اللي انا حاسس اني حابب اشاركه مع الناس، وده غالبا مابيحصلش كتير، الصبر مفتاح الفرج ولو صبرت عليا سنه ولا تلاته كده .. احتمال تلاقي المدونة شكلها يعجبك!

الخميس، 18 أبريل، 2013

كلمات تترات مسلسل المرسى والبحار

بسم الله، السلام عليكم

فكرت اسمع اغنيه قديمه حبة كنت بحبها وهي تترات بداية ونهايه مسلسل المرسى والبحار
حبيت اكتب الكلمات هنا، وانا قولت زمان، انا بحط هنا الحاجه اللي بحبها ^^


معلومات عن التترات

كلمات الشاعر العملاق سيد حجاب طبعا
والتترات الحان ياسر عبدالرحمن طبعا
والصوت القوي الحكيم والمحترم ده لمحمد الحلو

-- تتر البدايه --

يا مركب العمر يا مشبوح مابين هلبين
تتشد منهم تعيش في الشك ما بين بين
تنفك منهم تتوه مندوه في بحر البين
ولفين نروح .. ياريت كان لي يا هو قلبين

متقولش اصلك وفصلك، قول حليم ستّار
هتغمي بإديك عنيك، تعمى الخطى وتحتار
عقلك في راسك وملزوم كل تختار
عيش في الحقيقة .. ليندار نصلها البتار
وتحشك النار .. وتتسوى على الجنبين

مين وابن مين الحياه ميهمهاش اصلك
اصلك بفعلك تواصل فعله ويوصلك
فعلك ده من عقلك، ان طاوعته رقص لك ..
زمنك ودنياك .. واذا قصقصته نغص لك ..
زمنك ودنياك، فشوف واختار ما بين دربين

-- تتر النهايه --

يا مركب العمر هو العمر كام .. واحد
يا عيشته كله .. يا ضيعه وعليك واحد
متقولش أصلك وفصلك كلنا واحد
من اصل واحد، ورب الكون إله واحد

تقول زماني رماني او زماني اندار
تتوه في ليل الاماني، في موج عالي وغدار
تقول زماني عماني، وداربي طال بي ودار
تضيع في بحر الزمن، وتعيش غريب الدار
تلقى الحياه راحت

وإن كان زمان الزمان، ملا ليل جدودك نور
واتعصّبوا بتاج دهب في قصور من البنور
ما هم كمان ادوا ياما، وكل شئ بالدور
وهم برضه اللي خلّوا، بينا الزمن ده يدور
والعالم ارتاحت


الترجمه بقى :D
الكلمات مش صعبه على قد ماهي كلها الغاز، نوعيه نضيفه من الكلمات وبصراحه بعد الاغنيتين دول قررت ادور ورا الشعار ولو لقيت حاجه هبقى اكتبها
نبتدي بقى

يا مركب العمر يا مشبوح مابين هلبين
(مشبوح: يعني مشدود من النحتين في نفس الوقت .. يعني ممزوع كده)
(هلبين: دي مثنى لكلمة هيلب
وده اسم المرساه اللي بيترمى من السفن الكبيره
اللي بيكون على شكل صليب مقلوب وبدون راس ومعقوف من تحت
والسواحليه وخط القنال كله مسميه هليب، واحتمال يكون اصل الكلمة Help يعني مساعده بالانجليزي)
تتشد منهم تعيش في الشك ما بين بين
(بين بين: يعني في وسط السلالم، لا طلع ولا نزل
لا محصل سما، ولا ارض، واقف في النص، بين البينين)

تنفك منهم تتوه مندوه في بحر البين
(بحر البين: هو بحر وسط الصحرا)
ولفين نروح .. ياريت كان لي يا هو قلبين

متقولش اصلك وفصلك، قول حليم ستار
هتغمي بإديك عنيك، تعمى الخطى وتحتار
عقلك في راسك وملزوم كل تختار
عيش في الحقيقة .. ليندار نصلها البتار
وتحشك النار .. وتتسوى على الجنبين
(تحشك: يعني تجزك النار، الكلمة ذات نفسها بتستخدم في الفلاحيين وسط المزارعين
الجز هو قطع الحاجه من قبل جزورها، هو غير الخلع لان الخلع من الجزور
انما الحش هو القطع من قبل الجزور)

مين وابن مين الحياه ميهمهاش اصلك
اصلك بفعلك تواصل فعله ويوصلك
(فعلك ده من عقلك، ان طاوعته رقص لك ..
(ان طاوعته رقص لك: يعني لو طاوعت فعلك هيرقص لك الزمن)
زمنك ودنياك .. واذا قصقصته نغص لك ..
(اذا قصقصته نغص لك: يعني لو قصقصت فعلك "قللت منه" هينغص عليك الزمن
زمنك ودنياك، فشوف واختار ما بين دربين

-- تتر النهايه --

يا مركب العمر هو العمر كام .. واحد
يا عيشته كله .. يا ضيعه وعليك واحد
متقولش أصلك وفصلك كلنا واحد
من اصل واحد، ورب الكون إله واحد

تقول زماني رماني او زماني اندار
(اندار: يعني دار ولف حولين نفسه)
تتوه في ليل الاماني، في موج عالي وغدار
تقول زماني عماني، وداربي طال بي ودار
(الدرب: هو الطريق)
تضيع في بحر الزمن، وتعيش غريب الدار
تلقى الحياه راحت

وإن كان زمان الزمان، ملا ليل جدودك نور
(إن كان زمان الزمان: إن كان "زمان" هنا يقصد بيه الماضي
الزمان مع الاف واللام خلى الزمن فاعل
وفعله هو ملا مصطلح بالعامية المصريه محرف من "ملاء" بالفصحى)
واتعصّبوا بتاج دهب في قصور من البنور
(اتعصبوا، يعني لبسوا بس بطريقة اللف مش الوضع
زي معصوب العينين كده)
ما هم كمان ادوا ياما، وكل شئ بالدور
وهم برضه اللي خلّوا، بينا الزمن ده يدور
والعالم ارتاحت


واخيرا، روعه .. مش كده؟ :)
يابخت من دون حاجه مفيده ;)