انا مش اخوان .. استايل ^_^

وماله ياخويا مش عيب - المصدر:مؤمن مجاهد

بسم الله، السلام عليكم

في الواقع ...

ربنا يخلي باور فاميلي ويخليله امه -_-" .. بصراحه، انا زهقت، وانا بقول غاندي ماله شكله سقعان ليه؟، اتاريه يا حبة عين امه، طلع عينه في محاولات اقناع ناس قافله عقولها، بس كسب بلإراده .. الحديث النهارده مش عن الإراده!، الحديث عن البهايم اللي رافضه تقتنع!، و والله كل واحد ياخد بهايم اللي قصدت اكتبها دي على نفسه زي مايحب، اللي حابب يشوف نفسه بهيمه وزعلان من الشتيمه، هو وراحته :/

حاليا وانا بفر ف الفيس بوكس قابلت صفحه مش فاكر اسمها .. تقريبا اسمها دولة مدنيه "كافره يعني ^_^" وبصراحه .. واخدين الاخوان غسيل ومكوى، كل كوارث الاخوان تلاقيها هناك، اللي قهر في نفسويتي وحزز وعّلم فيها أوي، ان الاخوان رافضين يقتنعوا انهم بلا كلمة، وفاكرين انهم ع الحق :)

في احد الايام كنت بكلم حد .. الله يمسي ايامه بالخير يارب -اللهم امين- وهو على وشك شراء عربية جديده، فيحاول يختار بين المستعمل والجديد، فالشخص ده محتاج عربيه صغيره وسعرها متوسط، المهم رجحت كفة الاختيار على اسبرنزا A113 مستعمل 2007 و هيونداي i10 2012 جديده، وبعدين الشخص ده اقنعته ان الهيونداي احسن والزيرو احسن من المستعل بمشاكله، وهو اقتنع وكان فرحان لحد ما واجهني بالحقيقه، "انا هتأخر شويه على ما اجيب العربيه، رديت: ليه بس؟، قال: اصل العربيات اسرعها هتنزل اوخر السنه، رديت متهكماً استرسلت ساخراً: مش هتنزل ولا حاجه ياعم هم هيشيلوا الدعم عن البنزين علشان كده اسعارها هتنزل ولا ايه ^_^

واذ بي افاجئ مفاجئه العمر! فعلا هيبدوا في تنفيذ خطه طويلة الامد بمقطضاها سيتم رفع الدعم بحلول سنه 2050 "تقريبا" .. والادهى من كده ان الاخوان الحلويين في طريقهم للأقتراض من البنك الدولي "وسلملي على شيوخ ربا القروض" وسيتم تنفيذ سلسلة "إصلاحات"/شروط البنك الدولي ومن ضمنها رفع الدعم عن جميع المنتجات!!!

لما جيت اسئل اخونجي/قفل، رد وقالي يا عم دي امريكا اللي بتتغنوا بيها ليل ونهار -ملحوظه انا مبحبش امريكا ^_^- مش داعمه البنزين ده حتى في لوحه اسعار (الكترونيه -_-") في البنزينات السعر فيها بتغير كل ساعه حسب السعر العالمي!!

رديت على القفل وقولتله يا قفل مهو في اختلاف في سعر صرف العمله يا قفل، مضاف إليه قوة العمله او القيمه الشرائيه، يعني اللتر في امريكا بدولار "فرضا" غير مدعوم واللي بيشتري اللتر ده اساسا مربته 1500 دولار، يعني لو حط فول في عربيه بتاخد 60 لتر، يعني 60 دولار، بالنسبه لنا كأنهم 60 جنيه مصري هنا، لان الدولار هناك قوة الشرائيه زي هنا، بس فرقه عن العملات التانيه ضخم، ومتنساش ان جالون البترول مهما علي سعره بالنسبالهم هيكون سعره قليل، لان ابو 1000 عندهم هيبقى 6000 عندنا، فاحنا غيرهم وهم غيرنا!!

وعلشان القفل = يقفل ويريد فقط الخروج من هذا النقاش وهو منتصر يستطيع ان يأخذك لاي طريق يثبت فيه ان كلامه صح ولو بنسبه 1% وبالتالي يبقى بقيت الكلام صح!، وعلشان معتابة النذل اجتنابه وعلشان الحكمه القائله لا تخاطب الاحمق فقد يخطئ الناس في التفريق بينكما، رخضت لأنتصاره الرخيص ذو الحيل وقولتله الكلمة المشهور .. طيب طيب ريح نفوخك

المهم يعني، اني مش عضو التحالف الشعبي ولا حاجه، بس انتخبت حمدين :D

خلاصة الكلام ده كله .. ربنا يمسي ايام الشخص ده بالخير

ملحوظه -صفحه -دولة مدنية المذكوره سالفاً- مش بتاعتي-

يابخت من دوّن وخفف

وانا بقرا كتاب، اتكلمت مع سلفي!!

بسم الله، السلام عليكم
زي ما بيقولوا، يمكن فعلا التاريخ بيحاول وبيسعى مثابرا انه يعيد نفسه!، الجمله في حد ذاتها بالنسبالي شيك، "التاريخ يعيد نفسه" بس التاريخ في الحقيقه لا يعيد نفسه، الناس هي اللي بتعيد التاريخ!
وجهة نظري المتواضعه تتخلص في عباره بسيطه قالها احد اهم علماء الارض، البرت اينشتاين @ويكيبيديا

قال اينشتاين في تعريف الغباء: هو فعل نفس الشئ مرتين بنفس الاسلوب ونفس الخطوات مع انتظار نتائج مختلفة

 يبقى التاريخ لا يعيد نفسه، بس الناس هي اللي بتعيد نفس افعال الماضي بنفس الاسلوب ويمكن بنفس الخطوات، فبتالي بتلاقي نفس نتائج الامس، وبالتالي التاريخ يعيد نفسه .. جمله صعبه مش كده؟
انا كنت بقرأ كتاب اسمه "خوارق اللاشعور/اسرار الشخصيه الناجحه" المؤلف عامل بحث بيصفه بانه ضخم، ولاني مش قارئ سريع ولا متميز، فانا بقالي اسبوع ولسه ف الفصل التاني لظروف الشغل
في اول فصل وفي المقدمه، كان في نبذات سريعه عن الكتاب وفصوله والكاتب بيشرح انه هيتعمق اكتر في الفصول اللاحقه، إلخ إلخ، واثناء سرده للمقدمه، حاول "عن علم او جهل" انه يفتح عقل القارئ بشكل (شيك) -_-"
حاول انه يفهمنا ويعرفنا ان تقبل واقتناع الناس بوجهات نظر مختلفه، مش صعب، وعرج على موضيع كتير وسرد حكايات سريعه كتير، كتاب متميز من وجهة نظري، وطلما بقرأ يبقى انا بفتح عقلي على عقول كتاب اخرين ومهيئ نفسي اقتنع باللي يلائمني من وجهات نظرهم وارائهم وتفنيدهم او الاسانيد والحجج بتاعتهم!
عرفت من الكتاب ده برده، ان من السهل انك تشيل جبل، بالمقارنه انك بتحاول تقنع حد بوجهة نظرك، المؤلف عذر المتشددين في وجهات نظرهم، وفند حججهم في التشدد في وجهات نظرهم وان دي الطبيعه البشريه، وناوي إن شاء الله لو قدرت ابقى احط لينك له تقرأوه معايا
وحانت لحظه التطبيق، كالعاده قاعد باكل في المحل اللي جنبي "جيران العمل يعني" وصاحب المحل على طريق السلفيه يتلمس اولى خطواته، بالفعل قلبه متعلق بالسلفيه، بيحبهم، ونفسه يكون زيهم، وواصف نفسه بالعاصي لانه لسه مش ملتزم بالطلاق الليحه والتحلي بسنن النبي صلى الله عليه وسلم، سلفي قلبا ولسه على القالب بتاعه شويه!
اثناء منا باكل كان في اعاده لماتش الاهلي والزمالك، فبرخامه المصري المحنك زنقته في سؤال، هي مش الماتشات حرام؟ رد ببراءه حرام لو على فلوس، اي شئ على فلوس حرام، قولتله وتبقى حرام لو لهتك عن الصلاه، صح؟، قالي صح طبعا، قولتله يعني الاغاني حلال طلما مش بتلهينا عن الصلاه "سؤال خبيث وينم عن جهل شديد وفقر معلومات السائل 1" رد: لاء طبعا الغناء حرام حرميه مطلقه، يعني فكره الغنا ذات نفسها حرام!! قولتله اه بس في أمام حللها تحت ضوابط، رد: الأئمه بيحللوا ويحرموا على مزجاهم، قولتله "عن جهل" انه احد الأئمه الاربعه، فسكت!!
فعرجنا على ابن تيميه، وقولتله شيخك وشيخ السلفيه وشيخنا الجليل ابن تيميه وصلني عنه انه قال، ان الله يقيم دولة العدل لو كانت كافره ويهلك دولة الظلم ولو كانت مؤمنه، فرد، اه عاوزنا نكون زي امريكا، واثناء كلامنا عن ابن تيميه قال، ان صحيح مسلم اصح كتاب بعد القرأن الشريف!!!!!!
جمله استفزني جدا لدرجة اني قولتله: كلً يؤخذ منه ويرد يا سيد فلان، فرد: إلا سيد الخلق طبعا، قولتله عليك نور، وابن تيميه مهما كان هيفضل بشر، هل هو منزه عن الاخطاء؟، رد لا بس ده كان عالم بدينه وشيخ جليل، قومت عايد نفس الجمله بحماس اكبر، كلً يؤخذ منه ويرد يا استاذ فلان!!!
خلاصه القول ان السلفيه مش مجرد فئه تسعى لله جهاده، دول عاوزين ينتشروا ف الارض والناس تتبعهم، اهلا بيهم لو كانوا في حالهم، اهلا بيهم لو مكنوش في حالهم، وعلاقه الموضوع ده بأينشتاين ايه؟ انزل تحت سطر
اقرا بقى عن التخلص/والانقلاب/والثوره على الحكم الديني او بمعنى ادق، الحكم الكنسي في اوروبا في القرون الوسطى واوائل عصور التنوير!!

صباح الخير ياهامش
1: بعد بحث مطول بعد ما اتكلمت مع جاري ف المحل ده عرفت اني كنت غلطان لان الأئمه الاربعه الكبار او بمعنى اصح أئمه المذاهب الاربعه اجمعوا على تحريم الغناء، بس احب اوضح انه كان سؤال خبيث مش اكتر

نفسي ارجع اكتب تدوينات صغيره مختصره زي زمان :/
يابخت من دوّن وخفف!

عالم مجنون مجنون

بسم الله الرحمن الرحيم، السلام عليكم ورحمة الله وبركاته

عادةً، لما ببدء البداية دي ببقى بتكلم بجد، وبحاول ابعد قدر الامكان عن التهريج والسخريه اللي بقت جزء مننا كمجتمع مصري ويمكن عربي، إذا مكنش عالمي!

في الاول لولا الاختلاف لما كنا موجودين، دي حقيقه مستقره لازم نتفق او نقول ارض لازم كلنا نبقى واقفين عليها.

الاختلاف ضروره حتميه لاستمرار الحياه، مينفعش كل البشر تلبس واحد، تتكلم نفس اللغه، تفكر بنفس الطريقه، لو ربنا عاوزنا كده كان خلقنا من الاول كده، بالعكس، ربنا اعطى لنا مساحه واسعه من التفكر والخروج بأطروحات ووجهات نظر نختلف فيها، رحمة بينا ومش في الحياة بس، لا حتى في الدين، الاختلاف على قسوة أحيانا، وشذوذه احيان اخرى، إلا انه مفيد للتنوع البشري، مفيد لنا كبشر، مفيد للأرض المطلوب تعميرها، ربنا لم يخلق نوع واحد من الباكتيريا ونوع واحد من الحشرات في اسفل هرم السلسله الغذائيه ويستمر بقيت هرم السلسله الغذائه على نوع واحد في كل درجة بيتغذى على النوع اللي تحته!!

فإذاً الاختلاف مطلوب، طب نيجي نبص على اللي عارف ربنا ومقرب منه اكتر مني، واحد زي الاستاذ خالد عبدالله، نلاقي انه رافض مجرد فكره الاختلاف معاه في توجهاته العامه، بلاش نقول تفصيل توجهاته او منهجه، بل بالعكس بيتهم الغير بإتهامات ممكن تكون مش صحيحه

استاذ خالد لم اذكره عبثا او استرشادا في التديونه دي، لا بالعكس التدوينة دي اساس وجدوها هو اني اتفرجت على حلقه قديمة للأستاذ خالد @يوتيوب: منهج عمرو خالد ومصيبة معز مسعود ومصطفى حسني 1 واستفز رغبتي في الدفاع عن الناس اللي ذكرها استاذ خالد في برنامجه على قناة الناس

استاذ خالد عبدالله، شيخ من شيوخ الدعوى الافضال، له مواقفه اللي اغلبها يحترم "معادا موقفه مع البنت اللي اتهرست من الجيش" واتهم حد زي الاستاذ عمرو خالد والاستاذ معز مسعود والاستاذ مصطفى حسني "برغم اني مش من متابعي استاذ مصطفى" بانهم صوفيين، لا والاخطر انهم في طريقهم لأخراج دين جديد!!!

طيب انا كان نفسي اسئل استاذ خالد عبدالله سؤال واحد، هو حضرتك كنت سبب في هداية كام من البشر؟، 10؟ 50 الف؟ مليون؟، الهدايه لإيه بظبط بقى؟، لأنهم يصلوا ويصوموا ويعبدوا الله؟، كويس جدا، جزاك الله الف خير عنهم وعني، لكن هو الدين عباده بس؟، هو الاساس ف الدين هو العباده اصلا؟، سؤال فلسفي مش كده؟، انا هنا مش بشكك في العبادات، بالعكس، بس انا هنا بشكك في اللي عاوز يقصر الدين على العباده، يحضرني حديث مش فاكر رواية لكن مجملة قال رسول الله صلى الله عليه وسلم (لأن تمشي في حاجة أخيك المسلم خير لك من أن تعتكف في مسجدي هذا شهرا) يا الله ويا جمال الاسلام، ان الانسان يمشي في حاجه اخيه المسلم خير له من ان يعتكف في مسجد رسول الله شهر كامل؟، ناهيك عن حاجات كتير لو عملتها كانت موازيه لعابدات لن تستطيع فعلها اصلا زي ليلة القدر، اللي لو اقمتها خير لك من الف شهر، يعني 83 سنه، كتير مننا لا يعيش 83 سنه، يعني لو اقمت ليلتين قدر بس طول حياتك يبقوا خير لك من 166 سنه، يا رحمن يارحيم، شوفوا رحمة ربنا بعباده

يقوم يجي الاستاذ خالد عبدالله ويقصر الدين على العباده، ياراجل، هو لو ربنا محتاج عبادتنا حاشى لله؟، ربنا خلقنا علشان نعمر الارض، والعباده وحدها لا تعمر الارض، ناس كتير زي ابو بكر الصديق، صاحب رسول الله وونيسه في غار حراء، ده اللي ربنا اشار له في الاقرأن بقوله تعالى، { إِذْ هُمَا فِي الْغَارِ إِذْ يَقُولُ لِصَاحِبِهِ لا تَحْزَنْ إِنَّ اللَّهَ مَعَنَا } [التوبة:40] في عهده لم تقم حضاره ولا عثمان ابن عفان ذو النورين جامع القرأن، كما قامت في عهد الفاروق عمر ابن الخطاب، ولم يقام العدل إلا من سلاله عمر وهو عمر ابن عبدالعزيز ابن ام عاصم ليلى بنت عاصم ابن عمر ابن الخطاب

على سبيل المثال وليس الحصر، حد متفتح وكلامه موزون زي استاذ معز مسعود، أقدر من استاذ خالد عبدالله على توصيل الاسلام الصحيح إلى الغرب بتفتحه على ثقافتهم، وحد زي الاستاذ عمرو خالد، أقدر من حضرتك على بناء حضاره واتفرج على صناع الحياه، مؤسسه خيريه لا تهدف إلى الربح هدفها الاول مش مساعده الناس، لا تنميه الناس وهناك اختلاف وفرق شاسع بين مساعده تنفع وتذهب، وتنميه تنفع وتبقى

اختم كلامي ده بقوله تعالى: { يَا أَيُّهَا الَّذِينَ آمَنُوا لَا يَسْخَرْ قَوْمٌ مِنْ قَوْمٍ عَسَى أَنْ يَكُونُوا خَيْرًا مِنْهُمْ وَلَا نِسَاءٌ مِنْ نِسَاءٍ عَسَى أَنْ يَكُنَّ خَيْرًا مِنْهُنَّ وَلَا تَلْمِزُوا أَنْفُسَكُمْ وَلَا تَنَابَزُوا بِالْأَلْقَابِ بِئْسَ الِاسْمُ الْفُسُوقُ بَعْدَ الْإِيمَانِ وَمَنْ لَمْ يَتُبْ فَأُولَئِكَ هُمُ الظَالِموُن } [الحجرات:11]

رد: الديمقراطيه، اسم لا حقيقة له

صندوق انتخابي شفاف - مصدر:ويكيميديا

بسم الله، السلام عليكم

كالعاده وانا بفر في جوجل وقعت على مقال كويس جدا منقول عن مجلة البيان-عدد 196 للكاتب السوداني، جعفر شيخ ادريس، بصراحه اسبابه وحججه ومنطقه، كويس، ويُنَاقِش بعقلانيه، لكن اغلبيه المقال كانت عن تفنيد كلمة ديمقراطيه في حد ذاتها، واستغلال الأمم لها، ومعروف ان لفظ ديمقراطيه، اساسا اطلقه افلاطون على دولة تنفلت الغرائز وتسود ديكتاتورية العوام، ومعروف ان اللفظ اعاد انتاج نفسه في عصر التنوير، للخروج من ديكتاتوريه نظام الحكم الديني في اوروبا، واستغلال النفوذ الديني للحكم واستعباد الشعب، وسواء رضينا ام لم نرضى، فقد تم تطويره على مدى العصور وحاول الكثير ترويض مفهوم الديمقراطيه ووضع اسس وقواعد منظمه لعملية الديمقراطيه، واستخدام مبدء افلاطون او مسماه، وفصل الجزء السئ عن الجزء الجيد، وهو ان تسود فقط ديكتاتوريه العوام، مؤخرا يعاز إلى الديمقراطيه انحرافها او ممكن نقول انها بدات ترجع للمسار الطبيعي اللي رسمه لها افلاطون، وهو انفلات الغرائز، ولها اشكال كتير زي اقرار جواز المثليين، لكن يظل ف النهايه ده شئ غلط بمفومنا احنا الاسلامي للحياه، لكن المفهوم الغربي الذي اقر فيه هذا المبدء، يظل مفهوم لا اسلامي وله نظره او وجهات نظر مختلفه عن زواج المثليين مثلا، وبالتالي اقروه

الديمقراطيه مش قالب تضع الشعوب فيه نفسها، ومش منهج حياة، هو ببساطه حكم الشعب بما يتوافق مع معتقاد الشعب وذاكره الامه، مطلباتها، وتطلعتها، من وجهة نظر جماعيه، المشكله في الحكم الديني، مش مشكله الدين ذات نفسه، لان لو مشكله الدين ذات نفسه، لماذا انا معتنق ومؤمن بالدين الاسلامي؟، المشكله في التطبيق، ومش في التطبيق وبس، المشكله في القائمين على التطبيق، على مدى العصور الفر الاسلامي بشكل او بأخر رسخ نفسه على انه دين محتاج سيف ودرع، والسيف قبل الدرع!، نتيجه لصراعات داخليه وفتاوى عدم الخروج عن الحاكم، -تعليق:هو الحاكم مقدس علشان يُفتى بتحريم الخروج عنه؟- ونتيجه لمطامع خارجيه في الارض والثروات العربيه على مدار العصور والحملات الصليبيه، الاسلام دين التسامح، ودين لا يحتاج لا سيف ولا درع، بدليل ان الاروبيين لما بيسمعوا بيه، بيقتنعوا بيه في هدوء وبراحه ومحبه وسلام، وبيلتزموا بيه اكتر من العرب انفسهم

الاهم، ان الاسلام فيه جوانب كتير مش محسومه، ده بخلاف ان فيه 4 اأئمه كبار، وهم الأمام ابو حنيفه النعمان، وألامام الشافعي، والامام مالك، والامام ابن حنل، كل واحد له نظره في الدين مختلفه شويه عن الاخر، بخلاف الثواب طبعا

الاسلام مش دين عبادات وبس، الاسلام دين روح، كل واحد يحاسب على وجهة نظره في الايمان، وربنا له الكلمة العليا وله في خلقه شئون، وربنا طلب مننا نتفكر فيه وفي الدين وفي كل شئ، علشان كده المجال مفتوح وهيفضل مفتوح لكل العالم انه يبحث ويطرح اطروحات ويتفكر، ربنا عرفوه بالعقل زي ما بيقولوا، وعلشان كل واحد له وجهة نظر مختلفه وبيتفكر كيفما شاء، فمينفعش نتبع وجهة نظر واحده تبقى دي منهجنا في اسلامنا وحكمنا، لان حتى مناهج الحكم متغيره على مر العصور، منها الخلافه والمُلك والانتخاب

ياريت الاقي حد يمولني علشان اقول الكلمتين دول -والجمله دي لها تدوينة خاصه جديده إن شاء الله ^_^-

يابخت من دوّن وخفف - كان شعار مدونتي القديم :D

مدونتي الشخصيه، مش شخصيه

بسم الله، السلام عليكم

قرفت من السياسيه لدرجة اني بحاول اشوف اي بتنجان غيرها اتكلم فيه، ومش هتكلم فيها خلاص، معاني كنت مستني محمد مرسي يبقى رئيس علشان اقطع فروته واقعد اشوف وعود الاخوان واقسيها بالمقياس، يمكن يصدقوا واغير وجهة نظري فيهم، بس بصراحه جالي احباط، حسيت انها اسودت بعد ما حمدين صباحي خرج منها، بس يلا مش مشكله، المهم اني خلاص، اعتزلت سياسيه، انا اساسا فاتح المدونة دي اتكلم فيها عن نفسي وحياتي عني يعني، مش عن السياسيه!، ايوه انا عارف ان السياسه جزء مهم ف حياتنا، بس مش كل حياتنا سياسيه، ومش عاوز يتحرق دمي وانا صغير، اه انا لسه يدوبك مقفل ال20 ف 16/6 اللي فات

هو اينعم مكنش يوم كويس يوم 16/6 ده "اللي هو عيد ميلادي يعني" بس اهو بقى .. عدت على خير الحمد لله، عموما هحاول اتكلم في اي بتنجان غير السياسه، سياسه .. طيري إنتي!

اللي خارج اخر واحد "لو سمحت، اطفي النور وراك"

بسم الله، السلام عليكم

ذات مومنت لما تحس انك ملكش اي 30 35 لازمه، ولما تحس ان كل اللي عملته .. بح خالص، ولما تدخل تشوف خبر زي ده @اليوم السابع: بنات عمر سليمان والجنزورى يغادرن القاهرة إلى أبو ظبى وفرانكفورت .. عمرو اديب .. ابقى طفي النور وراك

لقد وقعنا ف الفخ، وانا بين نارين

بسم الله، السلام عليكم

لقد وقعنا ف الفخ هو العنوان العريـ"ـض" للمرحله الانتقاميه الحاليه، حقا كم نحن اذكياء!

فليذهب الرئيس شفيق إلى الجحيم وهو على كرسي الحكم بتلك النظارات اللعينه وتلك التكشيره التي ما انفكت لا تفارق وجهه، "ايه؟!" وليذهب معه الرئيس محمد المرسي وهو على كرسي الحكم بتلك الذقن البيضاء ونفس النظارات اللعنه وتلك النظره التي يملائها الغباء السياسي وعدم الحنكه حتى في محاورة الاعلام، وليذهبوا الاثنين إلى الجحيم حتى لا يعود لمصر سوى 999.998 هم عدد الذين انتبخوا هاذان ذوّ النظارات "التي بالمناسبه ارتي مثلها" فكرهي لهم من كرهي لها -,-

نتكلم بجديه اكتر من كده؟، موافق، بس ساعات الواحد من كتر الهم بيحاول يخرج نفسه من المود بأي هبل حتى لو هنتريق ع النظارات

محمد مرسي صاحب صاحب مشروع النهضه، "بوبي" المرشد

احمد شفيق صاحب الفلول "بوبي" مبارك، تعالوا نعد الحسانات

اخوان VS فلول

نــــار VS نـــار

حد يفكرني بكلمة قالوها الاخوان ونفذوها؟، مفيش، طيب نروح لشفيق؟ "ايه؟!" .. اه سوري نرجع لمرسي، مشروع نهضه؟ .. مش بتاعه، خلاص شفيق؟، موقعه الجمل، "ايه؟!" اه لامؤخذه، مرسي، شغال في وكاله ناسا الامريكيه اللي مش بتشغل غير اللي معاهم الجنسيه الامريكيه؟ خلاص يبقى هو شفشوق رمز الوطنيه، هرب فلوس البلد؟ "ايه؟!" اه مرسي يعني الانجازات العظيمه والتاريخ يتحدث اعتقالات بقى، اسلامي متشدد، يووه خلاص شفيق، اخر رئيس وزراء لمبارك، "ايه؟!" طيب مرسي؟ .. هيخلي البلد كلها اخوان، شفيق؟ بايع ارض بلميارات لعلاء وجمال مبارك في البحيرات المره؟ "ايه؟!" اه سوري خلينا ف مرسي ارحم من شفيق، بتاع معادن وملوش ف السياسيه، طيب نرجع لشفيق اهو ده سايس قصدي سياسي عقيم، اومال الثوره قامت على مين؟ "ايه؟!"،

كفااااااااااااااااااااااااااياااااااااااااااااااااااااااااااااااااااااااااااااااا

لو ابطلت صوتي واسيب المتخلفين يغرقوا ابقى وحش؟ .. لاء، ليه؟ اللي جاب الغبي يغرق، واللي جاب الغبي؟ يغرق، بس المشكله انهم مش خيغرقوا لوحدهم، ولا حتى المشكله انهم هيغرقونا معاهم، المشكله هتبقى مصر كلها على بعضها، مش مصر ككيان اعتباري اللي هو الناس المجتمعه بين خطي عرض مش عارف كام وخطي طول مش عارف كام وخلاص، البلد دي مش شوية ناس متجمعين بين خطوط على حريطه ومكان التجمع متسمي مصر، مصر حضاره وتاريخ ومستقبل وافكار وفن وثقافه وعماره ورياده، مش ال90 مليون نصف جاهل اللي مسح عقولهم بأستيكه مبارك واللي حوليه

احنا بلد متقعش، بس لو حد من الاستاذه مسكوها .. ولو هموت بكره، هموت وانا زعلان ان مصر الكيان الغير اعتباري، هيموت .. هخاف ع البلدي دي زي ما كنت هخاف على ابني لو عندي، او امي او اخويا، مش معنى وجودي اني كنت او هعمل لهم حاجه، او هعمل لمصر حاجه، لان امي او ابني او اسرتي اكبر مني، ومصر اكبر مننا، بس هبقى زعلان اني مش هبقى فرد ف جنود مصر اللي بيدافعوا عن الحق، بيدافعوا عن عدم الجهل والتخلف والتشدد والانحلال، ضد الاخوان والسلفيين المتشددين الكذابين والمناخير والفلول واقباط المهجر، ضد الصهاينه والاسرائليين، ضد العرب اللي طمعانين والغرب اللي فرحانين او شمتانين، ضد الغباء الامريكي، ادافع عن الفلسطنيين وعن الاسلام والمسلمين، عن اخواتي المسيحيين .. لو مت بكره وصوتي فرق .. مش هندم، بس هزعل على حال البلد

واذا متنا جميعا، فلتحيا مصر .. ويابخت من دون وخفف